Wat ons by Jesus leer

Oor die ware God

Het God ’n naam?

Jesus het geleer dat God ’n naam het. Jesus het gesê: “Julle moet dan só bid: ‘Ons Vader in die hemele, laat u naam geheilig word’” (Matteus 6:9). Volgens die Bybel is God se naam Jehovah (Psalm 83:18). Jesus het, met verwysing na sy dissipels, in gebed tot sy Vader gesê: “Ek het u naam aan hulle bekend gemaak.”—Johannes 17:26.

Wie is Jehovah?

Jesus het Jehovah “die enigste ware God” genoem, want Jehovah is die Skepper (Johannes 17:3). Jesus het gesê: “Het julle nie gelees dat hy wat hulle geskep het, hulle van die begin af man en vrou gemaak het nie?” (Matteus 19:4). Jesus het ook gesê: “God is ’n Gees” (Johannes 4:24). Ons kan God dus nie sien nie.—Eksodus 33:17-20.

Wat verwag God van ons?

Toe iemand Jesus gevra het wat die grootste gebod is, het hy geantwoord: “Die eerste is: ‘Hoor, o Israel, Jehovah ons God is een Jehovah, en jy moet Jehovah jou God liefhê met jou hele hart en met jou hele siel en met jou hele verstand en met al jou krag.’ Die tweede is dit: ‘Jy moet jou naaste liefhê soos jouself.’”—Markus 12:28-31.

Hoe kan ons toon dat ons God liefhet?

Jesus het gesê: ‘Ek het die Vader lief.’ Hoe het hy sy liefde getoon? Hy het gesê: “Ek [doen] net soos die Vader my die gebod gegee het om te doen” (Johannes 14:31). Hy het ook gesê: ‘Ek doen altyd die dinge wat hom behaag’ (Johannes 8:29). Ons kan God behaag deur oor hom te leer. Terwyl Jesus vir sy dissipels gebid het, het hy gesê: “Dít beteken die ewige lewe, dat hulle kennis inneem van u, die enigste ware God.”—Johannes 17:3; 1 Timoteus 2:4.

Hoe kan ons oor God leer?

Een manier om God te leer ken, is deur die dinge wat hy gemaak het, waar te neem. Jesus het byvoorbeeld gesê: “Hou die voëls van die hemel noukeurig dop, want hulle saai nie saad nie en hulle oes nie en hulle maak nie in voorraadskure bymekaar nie; nogtans voed julle hemelse Vader hulle. Is julle nie meer werd as hulle nie?” Wat was Jesus se punt? Ons moenie toelaat dat angstigheid oor ons fisiese behoeftes ons keer om God te dien nie.—Matteus 6:26-33.

Die beste manier om Jehovah te leer ken, is deur sy Woord, die Bybel, te bestudeer. Jesus het die Skrif “die woord van God” genoem (Lukas 8:21). Jesus het vir God gesê: “U woord is die waarheid.”—Johannes 17:17; 2 Petrus 1:20, 21.

Jesus het mense gehelp om die waarheid omtrent Jehovah te leer. Een van Jesus se dissipels het aangaande hom gesê: “Het ons hart nie gebrand toe hy op die pad met ons gepraat het, toe hy die Skrif ten volle vir ons geopen het nie?” (Lukas 24:32). As ons oor God wil leer, moet ons nederig wees, gewillig om geleer te word. Jesus het gesê: “Tensy julle omdraai en soos jong kinders word, sal julle hoegenaamd nie in die koninkryk van die hemele ingaan nie.”—Matteus 18:3.

Waarom bring kennis van God geluk mee?

God bevredig ons behoefte om die doel van die lewe te verstaan. Jesus het gesê: “Gelukkig is dié wat bewus is van hulle geestelike behoefte” (Matteus 5:3). Jehovah leer ons wat die beste lewensweg is. “Gelukkig is . . . dié wat die woord van God hoor en dit nakom!” het Jesus gesê.—Lukas 11:28; Jesaja 11:9.

Vir meer inligting, sien hoofstuk 1 van die boek Wat leer die Bybel werklik?a

[Voetnoot]

[Prent op bladsy 16]

“Ek het u naam aan hulle bekend gemaak.”—Johannes 17:26

[Prente op bladsy 16, 17]

Die skepping en die Bybel kan ons omtrent Jehovah leer