Hoe om een van God se kinders te word God se kinders
SOWAT 30 jaar ná die Koreaanse Oorlog het die Koreaanse Uitsaainetwerk ’n program geloods om mense te help om verlore familielede op te spoor wat sedert die oorlog vermis is. Die resultaat? Meer as 11 000 mense is met hulle geliefdes herenig—met trane, uitroepe en omhelsings. Die Korea Times het berig: “Nog nooit in hulle geskiedenis het die Koreaanse volk soveel trane van vreugde spontaan en gelyktydig gestort nie.”
In Brasilië is Cézar as ’n baba weggegee om skuld af te betaal. Ongeveer tien jaar later was hy so bly om sy werklike ma te vind, dat hy sy ryk pleegouers verlaat het om by haar te gaan bly.
Hoe verheug is familielede tog wanneer hulle mekaar vind nadat hulle geskei en verlore was! Die Bybel beskryf hoe mense tragies van God se gesin geskei is. Dit vertel ook hoe hulle nou vreugdevol herenig word. Hoe het dit gebeur? En hoe kan jy in hierdie vreugde deel?
Hoe God se gesin geskei is
Die psalmis het oor Jehovah God, die Skepper, gesê: “By u is die bron van die lewe” (Psalm 36:9). Jehovah is die Vader van ’n groot universele gesin van getroue intelligente wesens. Hierdie gesin het ’n hemelse deel wat uit engele bestaan, wat sy geesseuns is, en ’n aardse deel wat uit mense bestaan, wat sy aardse kinders sal wees.
Toe God se eerste menseseun, Adam, in opstand gekom het, soos in die vorige artikel beskryf is, was die droewige gevolg dat die mensdom van hulle liefdevolle Vader en Skepper geskei is (Lukas 3:38). Dit is omdat Adam, deur sy opstand, die voorreg om kinders van God te wees, vir homself en vir sy ongebore nakomelinge verbeur het. Deur sy kneg Moses het God die gevolge beskryf van wat daar gebeur het: “Hulle het self verderflik gehandel; hulle is nie [God se] kinders nie, die gebrek lê by hulle.” “Die gebrek”, of sondige natuur, het mense vervreem van God, wat in elke opsig heilig en volmaak is (Deuteronomium 32:4, 5; Jesaja 6:3). In sekere sin het die mensdom dus verlore, vaderloos, geword.—Efesiërs 2:12.
Om die afsondering van die mensdom te beklemtoon, verwys die Bybel na diegene buite God se gesin as “vyande” (Romeine 5:8, 10). Omdat die mensdom van God vervreemd is, het hulle weens die wrede heerskappy van Satan en die dodelike gevolge van oorgeërfde sonde en onvolmaaktheid gely (Romeine 5:12; 1 Johannes 5:19). Kan sondige mense deel van God se gesin word? Kan onvolmaakte skepsele in die volste sin van die woord kinders van God word, soos Adam en Eva was voordat hulle gesondig het?
Vervreemde kinders word byeengebring
Uit liefde het Jehovah voorsienings gemaak tot voordeel van onvolmaakte mense wat hom liefhet (1 Korintiërs 2:9). Die apostel Paulus verduidelik dat “God deur middel van Christus ’n wêreld met homself versoen het en hulle hulle oortredings nie toegereken het nie” (2 Korintiërs 5:19). Soos in die vorige artikel verduidelik is, het Jehovah God Jesus Christus as ’n losprys vir ons sondes voorsien (Matteus 20:28; Johannes 3:16). Die apostel Johannes het met waardering geskryf: “Kyk watter liefde het die Vader ons gegee, sodat ons kinders van God genoem sou word” (1 Johannes 3:1). Voorsiening is dus gemaak vir gehoorsame mense om weer eens deel van Jehovah se gesin te word.
Alle mense wat in God se gesin ingebring word, sal wonderlike eenheid onder die sorg van hulle hemelse Vader geniet, maar let op hoe die Bybel beskryf dat hulle in twee groepe byeengebring word. Ons lees: “Dit is volgens [God se] welbehae wat hy in homself voorgeneem het om aan die voleinding van die vasgestelde tye ’n administrasie te hê, naamlik om alles weer byeen te bring in die Christus, die dinge in die hemele en die dinge op die aarde” (Efesiërs 1:9, 10). Waarom administreer God sake op hierdie manier?
Die manier waarop Jehovah sy kinders in twee groepe organiseer, dra in werklikheid by tot die harmonie van sy gesin. Dit is nie moeilik om te verstaan waarom nie. God se gesin is so groot dat dit met ’n nasie vergelyk kan word. In enige nasie word ’n paar gekies om ’n regering uit te maak sodat die res wet en orde kan geniet. Geen menseregering het natuurlik al ware vrede meegebring nie, maar God voorsien sy gesin van ’n volmaakte regering. Die eerste groep, “die dinge in die hemele”, bestaan uit die kinders van God wat deur Jehovah gekies word om ’n regering, of Koninkryk, in die hemel te vorm. Van daar af “gaan [hulle] as konings oor die aarde heers”.—Openbaring 5:10.
Kinders van God op die aarde
Jehovah bring ook “die dinge op die aarde”, dit wil sê miljoene mense regoor die aarde, byeen sodat hulle uiteindelik sy aardse kinders kan word. As ’n liefdevolle Vader leer hy hulle sy weë van liefde sodat hulle, al kom hulle uit baie nasies, harmonies verenig is. Selfs mense wat gewelddadig, selfsugtig, onsedelik en ongehoorsaam aan God is, word genooi: “Raak met God versoen.”—2 Korintiërs 5:20.
Wat van diegene wat God se uitnodiging verwerp om as sy kinders met hom versoen te raak? Om vrede en harmonie in sy gesin te verseker, sal Jehovah streng teen hierdie persone optree. Daar sal ’n “dag van die oordeel en van die vernietiging van die goddelose mense” wees (2 Petrus 3:7). God sal die aarde reinig van opstandige mense. Watter verligting sal dit tog vir die gehoorsames bring!—Psalm 37:10, 11.
Dan sal daar duisend jaar van vrede wees, waartydens almal wat op God se liefde reageer, geleidelik herstel sal word tot die volmaakte lewe wat Adam verloor het. Selfs die dooies sal opgewek word (Johannes 5:28, 29; Openbaring 20:6; 21:3, 4). Só sal God sy belofte vervul dat “die [mense]skepping self ook van die slawerny aan die verderflikheid vrygemaak sal word en die glorieryke vryheid van die kinders van God sal hê”.—Romeine 8:21.
Hoe om met jou Vader verenig te word
Cézar en die duisende Koreane wat aan die begin van hierdie artikel gemeld word, moes iets doen om met hulle gesinne herenig te word. Daardie mense in Korea moes by die program aansluit, en Cézar het sy pleegouers verlaat. Net so sal jy moontlik daadwerklik moet optree om versoen te raak met jou hemelse Vader, Jehovah God, en deel te wees van sy gesin. Wat moet jy doen?
Om nader te kom aan God as jou Vader, moet jy sy Woord, die Bybel, bestudeer sodat jy sterk geloof in hom en in sy beloftes kan opbou. Jy sal leer om te vertrou dat dit tot jou voordeel is om te doen wat God beveel. Jy sal ook God se teregwysing en dissipline moet aanvaar, want die Bybel sê vir Christene: “God behandel julle soos seuns. Want watter seun is daar wat nie deur ’n vader gedissiplineer word nie?”—Hebreërs 12:7.
As jy hierdie stappe neem, sal dit jou hele lewenswyse verander. Die Bybel sê: “Julle [moet] vernuwe . . . word in die krag wat julle verstand aandryf en julle met die nuwe persoonlikheid . . . beklee, wat na God se wil in ware regverdigheid en lojaliteit geskep is” (Efesiërs 4:23, 24). Slaan dan ag op die apostel Petrus se vermaning: “As gehoorsame kinders moet julle nie langer gevorm word volgens die begeertes wat julle vroeër in julle onkunde gehad het nie.”—1 Petrus 1:14.
Vind jou werklike gesin
Toe Cézar sy ma gevind het, was hy verheug om te hoor dat hy ook ’n broer en ’n suster het. Net so sal jy, wanneer jy nader kom aan jou hemelse Vader, vind dat jy baie broers en susters in die Christengemeente het. Wanneer jy met hulle assosieer, sal jy moontlik nader aan hulle begin voel as aan jou eie familielede.—Handelinge 28:14, 15; Hebreërs 10:24, 25.
Die uitnodiging is daar vir jou om met jou werklike Vader en jou werklike broers en susters verenig te word. Die vreugde wat jy sal ervaar, kan net so groot wees soos die vreugde wat Cézar en die duisende in Korea ervaar het toe hulle met hulle gesinne herenig is.
[Prent op bladsy 8]
Cézar op 19-jarige ouderdom saam met sy ma
[Prente op bladsy 10]
Neem stappe om nader aan God te kom