Het jy geweet?
Waarom het Jesus ’n blinde man geleidelik genees?
In Markus 8:22-26 lees ons dat Jesus ’n blinde man by Betsaida genees het. Die verslag sê dat Jesus eers speeksel op die man se oë gesit het en hom toe gevra het wat hy kan sien. Die man se antwoord het getoon dat hy effens verward was: “Ek sien mense, want ek bemerk iets wat soos bome lyk, maar hulle loop rond.” Jesus het toe die man se oë weer aangeraak, met hierdie gevolg: “Die man het goed gesien, en hy is herstel en het alles helder gesien.” Blykbaar het Jesus die man geleidelik genees. Waarom?
Die Bybel beantwoord hierdie vraag nie ten volle nie, maar kom ons kyk na ’n moontlike verklaring vir dié spesifieke geval. Om vir die eerste keer te kan sien, nadat ’n mens jare lank—of selfs jou hele lewe lank—blind was, is baie om aan gewoond te raak. Ter toeligting: Ponies is voorheen gebruik om in myne te werk. Hulle het so gewoond geraak aan die donkerte dat wanneer hulle bogronds gekom het, hulle tot ’n hele dag nodig gehad het om aan sonlig gewoond te raak. In die geval van blindheid sal hierdie aanpassing selfs groter wees. In moderne tye kon chirurge in ’n paar gevalle meganiese probleme in die oë van blindes regstel sodat hulle weer kon sien. Maar die pasiënte is dikwels oorweldig deur die stroom inligting wat van hulle oë na hulle brein oorgedra is. Hulle is verwar deur ’n wêreld van kleure, vorms en dieptewaarneming, sodat hulle nie eers bekende voorwerpe kon herken nie. Mettertyd leer die brein om te interpreteer wat die oë sien.
Die feit dat Jesus die blinde man by hierdie geleentheid geleidelik genees het, was dalk ’n teken van liefdevolle besorgdheid oor die man. Uiteindelik het die man “alles helder gesien”, en kon hy sin maak van wat hy gesien het.
Waarom was dit in Jesus se dag ongemaklik om uit ’n boekrol te lees?
Die velle waarvan boekrolle gemaak is, was gewoonlik tussen 23 en 28 sentimeter lank en tussen 15 en 23 sentimeter breed. ’n Aantal van hierdie velle is met gom aanmekaargeplak of met gare aanmekaargewerk. In party gevalle is langer velle gebruik. Die Dooie See-rol van Jesaja is van 17 perkamentstroke gemaak, waarvan die bewaarde deel tans ongeveer sewe meter lank is. Die boekrol van Jesaja wat Jesus in die sinagoge in Nasaret gebruik het, was dalk net so lank.—Lukas 4:16, 17.
Aangaande hierdie verslag sê Alan Millard in sy boek Discoveries From the Time of Jesus: “Die leser het die boek[rol] vasgehou en dit met sy linkerhand afgerol, terwyl hy die ander kant in sy regterhand geneem het en dit opgerol het terwyl hy kolom vir kolom gelees het. Om uit te kom by Jesaja 61, die hoofstuk wat Jesus in die sinagoge gelees het, sou hy die meeste van die boekrol afgerol en weer opgerol het.”
Destyds was die boek Jesaja nie soos vandag in hoofstukke en verse verdeel nie. Toe die boekrol van Jesaja in die sinagoge in Nasaret vir Jesus gegee is, moes hy die gedeelte vind wat nou Jesaja 61:1, 2 in ons Bybel is. Jesus het maklik “die plek gevind”, wat toon hoe goed hy God se Woord geken het.