Kom nader aan God
Hy verstaan ons pyn
“EMPATIE is jou pyn in my hart.” Dit is hoe ’n bejaarde sendeling van Jehovah se Getuies eenkeer hierdie kosbare eienskap omskryf het. Jehovah God is die beste voorbeeld van empatie. Hy voel persoonlik die pyn wat sy volk ervaar. Hoe kan ons daarvan seker wees? Jehovah se tere empatie is volmaak weerspieël in die woorde en dade van Jesus toe hy op die aarde was (Johannes 5:19). Kyk byvoorbeeld na die voorval wat in Johannes 11:33-35 beskryf word.
Toe Jesus se vriend Lasarus ’n ontydige dood gesterf het, het Jesus na Lasarus se dorpie gereis. Lasarus se susters, Maria en Marta, was natuurlik diep bedroef. Jesus het hierdie gesin innig liefgehad (Johannes 11:5). Hoe sou hy dus reageer? Die verslag sê: “Toe Jesus [Maria] sien huil en die Jode wat saam met haar gekom het, sien huil, het hy in die gees gekreun en verontrus geword; en hy het gesê: ‘Waar het julle hom neergelê?’ Hulle het vir hom gesê: ‘Here, kom kyk.’ Jesus het trane gestort” (Johannes 11:33-35). Waarom het Jesus gehuil? Sy geliefde vriend Lasarus was weliswaar dood, maar Jesus was op die punt om dit te verander deur hom op te wek (Johannes 11:41-44). Was daar iets anders wat Jesus hartseer gemaak het?
Kyk weer na die woorde wat hierbo aangehaal word. Let daarop dat Jesus “gekreun” en “verontrus geword” het toe hy Maria en dié by haar sien huil het. Die woorde wat hier in die oorspronklike taal gebruik is, dui op intense emosies.a Jesus is diep geroer deur wat hy gesien het. Die opwelling van sterk emosies in hom was duidelik toe sy oë vol trane geskiet het. Ander se pyn het beslis Jesus se hart geraak. Het jy al ooit begin huil omdat iemand vir wie jy omgee, gehuil het?—Romeine 12:15.
Jesus se empatie gee ons waardevolle insig in die eienskappe en weë van sy Vader, Jehovah. Onthou dat Jesus sy Vader se eienskappe so volmaak weerspieël het dat hy kon sê: “Hy wat my gesien het, het ook die Vader gesien” (Johannes 14:9). Wanneer ons dus lees dat ‘Jesus trane gestort het’, kan ons seker wees dat Jehovah persoonlik die pyn van sy aanbidders voel. Trouens, ander Bybelskrywers bevestig hierdie feit (Jesaja 63:9; Sagaria 2:8). Wat ’n tere God is Jehovah tog!
Empatie trek mense aan. Wanneer ons mismoedig of terneergedruk is, voel ons aangetrokke tot iemand wat ons omstandighede kan verstaan en in ons pyn kan deel. Hoeveel te meer voel ons dan aangetrokke tot Jehovah, ’n medelydende God wat ons pyn voel en die rede vir ons trane verstaan!—Psalm 56:8.
[Voetnoot]
a Die Griekse woord wat met “trane gestort” vertaal word, verwys dikwels na “stilweg huil”, terwyl die woord wat gebruik word om Maria en die ander se gehuil te beskryf, “’n harde gehuil, ’n geweeklaag” kan beteken.