Hoe die Bestuursliggaam georganiseer is
DIE Bestuursliggaam van Jehovah se Getuies bestaan uit toegewyde manne wat gesalfde knegte van God is. Hulle tree op as verteenwoordigers van “die getroue en verstandige slaaf”-klas, wat die verantwoordelikheid het om geestelike voedsel te voorsien en die Koninkrykspredikingswerk regoor die aarde te rig en te bevorder.—Matt. 24:14, 45-47.
Die vergaderinge van die Bestuursliggaam word elke week gehou, gewoonlik op Woensdag. Dit stel hierdie broers in staat om in eenheid saam te werk (Ps. 133:1). Die lede van die Bestuursliggaam dien ook op verskillende komitees. Elke komitee hou toesig oor ’n sekere aspek van Koninkryksbelange, soos hieronder uiteengesit word.
◼ KOÖRDINEERDERSKOMITEE: Hierdie komitee bestaan uit die koördineerder van elk van die Bestuursliggaam se ander komitees en ’n sekretaris wat ook ’n lid van die Bestuursliggaam is. Dit verseker dat al die komitees vlot en doeltreffend funksioneer. Dit sien ook om na groot noodgevalle, vervolgingsveldtogte, rampe en ander dringende sake wat Jehovah se Getuies wêreldwyd raak.
◼ PERSONEELKOMITEE: Die broers op hierdie komitee hou toesig oor die reëlings vir die persoonlike en geestelike welsyn van en bystand aan Bethelgesinslede regoor die aarde. Hierdie komitee hou ook toesig oor wie as nuwe lede van Bethelgesinne gekies en as sodanig uitgenooi word en behartig vrae oor hulle Betheldiens.
◼ UITGEWERSKOMITEE: Hierdie komitee hou toesig oor die druk, uitgee en versending van Bybellektuur regoor die wêreld. Dit hou ook toesig oor die drukkerye en eiendomme wat besit en bestuur word deur die verskillende korporasies wat deur Jehovah se Getuies gebruik word. Hierdie komitee reël dat fondse wat vir die wêreldwye Koninkrykswerk bygedra word, op die beste manier gebruik word.
◼ DIENSKOMITEE: Die lede van hierdie komitee hou toesig oor die predikingswerk en sake rakende gemeentes, pioniers, ouer manne en reisende opsieners. Dit hou ook toesig oor die voorbereiding van Ons Koninkryksbediening en nooi persone om die Gileadskool en die Bedieningsopleidingskool by te woon en gee later aan die gegradueerde studente hulle toewysings.
◼ ONDERRIGTINGSKOMITEE: Hierdie komitee hou toesig oor die onderrigting wat by byeenkomste en gemeentelike vergaderinge voorsien word. Dit reël geestelike programme vir Bethelgesinne en hou toesig oor verskillende skole, soos die Gileadskool en die Pionierdiensskool, sowel as oor die voorbereiding van oudio- en videoprogramme.
◼ SKRYFKOMITEE: Hierdie komitee het die verantwoordelikheid om toe te sien dat geestelike voedsel in geskrewe vorm omgesit word sodat dit gepubliseer en onder medegelowiges en die algemene publiek versprei kan word. Hierdie komitee beantwoord Bybelvrae en keur materiaal soos dramatekste en toespraaksketse goed. Dit hou ook toesig oor die vertaalwerk wat wêreldwyd gedoen word.
Die apostel Paulus het die gemeente van gesalfdes met ’n menseliggaam vergelyk en die aandag gevestig op die belangrike funksie van al die lede asook op hulle onderlinge afhanklikheid, liefde en samewerking om godgegewe werk te verrig (Rom. 12:4, 5; 1 Kor. 12:12-31). Die Hoof, Jesus Christus, voorsien die lede van die liggaam van wat nodig is vir goeie samewerking, koördinasie en geestelike voeding (Ef. 4:15, 16; Kol. 2:19). Op hierdie manier is die Bestuursliggaam georganiseer om die leiding te neem terwyl Jehovah hulle deur middel van heilige gees rig.