Aanvaar Jehovah se gesag
“Dít is wat die liefde vir God beteken, dat ons sy gebooie bewaar; en tog is sy gebooie nie swaar nie.”—1 JOH. 5:3.
1, 2. (a) Waarom stuit die idee om hulle aan gesag te onderwerp, vandag baie mense teen die bors? (b) Is diegene wat sê dat hulle nonkonformiste is, werklik onafhanklik? Verduidelik.
“GESAG” is vandag nie ’n gewilde woord nie. Die idee om hulle aan die wil van iemand anders te onderwerp, stuit baie mense teen die bors. Die uitdrukking: “Niemand sê vir my wat om te doen nie”, som die gesindheid op van diegene wat sê dat hulle nonkonformiste is. Maar is hierdie mense werklik onafhanklik? Nouliks! Die meeste onderwerp hulle eenvoudig aan die standaarde van tallose ander wat “na hierdie stelsel van dinge gevorm” is (Rom. 12:2). Hulle is glad nie onafhanklik nie, maar is eerder “slawe van verderflikheid”, soos die Christenapostel Petrus dit gestel het (2 Pet. 2:19). Hulle wandel “volgens die stelsel van dinge van hierdie wêreld . . . , volgens die heerser van die gesag van die lug”, Satan die Duiwel.—Ef. 2:2.
2 Een skrywer het gespog: “Ek gee nie my ouers of ’n priester of ’n predikant of ’n ghoeroe of die Bybel die mag om vir my te besluit wat die waarheid is nie.” Party mense misbruik weliswaar hulle gesag en verdien miskien nie ons gehoorsaamheid nie. Maar is die oplossing dan om enige behoefte aan leiding heeltemal te ontken? ’n Vlugtige kykie na koerantopskrifte bied ’n sombere antwoord. Gedurende ’n tyd wanneer die mens leiding bitter nodig het, is dit tragies dat die meeste mense minder geneig is as ooit tevore om dit te aanvaar.
Ons beskouing van gesag
3. Hoe het eerste-eeuse Christene getoon dat hulle hulle nie blindelings aan mensegesag onderwerp nie?
3 As Christene neem ons ’n standpunt in wat verskil van dié van die wêreld. Dit is nie dat ons blindelings alles doen wat ons aangesê word nie. Inteendeel, soms moet ons weier om ons aan die wil van ander te onderwerp, selfs al beklee hulle gesagsposisies. Dit was ook die geval met eerste-eeuse Christene. Toe die apostels byvoorbeeld beveel is om op te hou preek, het hulle nie geswig voor die hoëpriester en ander gesagsfigure wat lede van die Sanhedrin was nie. Hulle het nie hulle regte gedrag laat vaar om hulle aan mensegesag te onderwerp nie.—Lees Handelinge 5:27-29.
4. Watter voorbeelde in die Hebreeuse Geskrifte toon dat baie van God se knegte ’n ongewilde weg gevolg het?
4 Baie knegte van God in die voor-Christelike tydperk het net so vasbeslote opgetree. Byvoorbeeld, Moses het “geweier om die seun van Farao se dogter genoem te word en verkies om liewer saam met die volk van God sleg behandel te word”, al het dit hom “die toorn van die koning” op die hals gehaal (Heb. 11:24, 25, 27). Josef het die toenaderings weerstaan van Potifar se vrou, wat wraak kon neem en hom skade kon berokken (Gen. 39:7-9). Daniël “het in sy hart besluit dat hy hom nie sou verontreinig met die lekkernye van die koning” nie, al was dit vir die hoofhofbeampte van Babilon nie maklik om sy standpunt te aanvaar nie (Dan. 1:8-14). Hierdie voorbeelde toon dat God se knegte deur die geskiedenis heen ’n sterk standpunt ingeneem het vir wat reg is, ongeag die gevolge. Hulle het nie geswig voor mense bloot om in hulle guns te kom nie; ons moet ook nie.
5. Hoe verskil ons beskouing van gesag van dié van die wêreld?
5 Ons moedige standpunt moenie verwar word met blote hardkoppigheid nie; ook is ons nie soos party wat in opstand kom net om te wys dat hulle nie met ’n politieke saak saamstem nie. Ons is eerder vasbeslote om Jehovah se gesag bo dié van enige mens te aanvaar. Wanneer die mens se wet met God se wet bots, is dit nie moeilik om te besluit wat ons gaan doen nie. Soos die apostels in die eerste eeu is ons eerder aan God as heerser gehoorsaam as aan mense.
6. Waarom is dit altyd die beste om Jehovah se gebooie te gehoorsaam?
6 Wat het ons gehelp om God se gesag te aanvaar? Ons neem die standpunt in wat in Spreuke 3:5, 6 gemeld word: “Vertrou op Jehovah met jou hele hart en moenie op jou eie begrip steun nie. Slaan ag op hom in al jou weë, en hy sal jou paaie reguit maak.” Ons glo dat enigiets wat God van ons vereis, uiteindelik tot ons beswil is. (Lees Deuteronomium 10:12, 13.) Jehovah het hom inderdaad aan die Israeliete beskryf as “die Een wat jou leer om jouself te bevoordeel, die Een wat jou laat loop op die weg wat jy moet bewandel”. Toe het hy bygevoeg: “Ag, as jy maar aan my gebooie aandag sal skenk! Dan sal jou vrede net soos ’n rivier word, en jou regverdigheid soos die golwe van die see” (Jes. 48:17, 18). Ons het vertroue in hierdie woorde. Ons is oortuig daarvan dat dit altyd tot ons voordeel is om God se gebooie te gehoorsaam.
7. Wat moet ons doen as ons ’n gebod wat in God se Woord gemeld word, nie ten volle verstaan nie?
7 Ons aanvaar Jehovah se gesag en gehoorsaam hom selfs al verstaan ons nie ten volle die rede vir ’n sekere vereiste wat in sy Woord gemeld word nie. Dit is nie goedgelowigheid nie; dit is vertroue. Dit weerspieël die hartgrondige vertroue dat Jehovah weet wat goed is vir ons. Ons gehoorsaamheid is ook ’n blyk van ons liefde, want die apostel Johannes het geskryf: “Dít is wat die liefde vir God beteken, dat ons sy gebooie bewaar” (1 Joh. 5:3). Maar daar is nog ’n aspek van ons gehoorsaamheid wat ons nie oor die hoof moet sien nie.
Die oefening van ons waarnemingsvermoëns
8. Watter verband is daar tussen ‘die oefening van ons waarnemingsvermoëns’ en die aanvaarding van Jehovah se gesag?
8 Die Bybel sê vir ons dat ons “waarnemingsvermoëns . . . geoefen [moet wees] om te onderskei wat reg sowel as verkeerd is” (Heb. 5:14). Ons bedoeling is dus nie om God se wette werktuiglik te gehoorsaam nie; ons wil eerder op grond van Jehovah se standaarde kan “onderskei wat reg sowel as verkeerd is”. Ons wil die wysheid van Jehovah se weë insien, sodat ons soos die psalmis kan sê: “U wet is in my ingewande.”—Ps. 40:8.
9. Hoe kan ons ons gewete volgens Jehovah se standaarde instel, en waarom is dit belangrik?
9 Om net soveel waardering vir God se wette soos die psalmis te hê, moet ons peins oor wat ons in die Bybel lees. Wanneer ons byvoorbeeld van ’n sekere vereiste van Jehovah lees, kan ons ons afvra: ‘Waarom is hierdie gebod of beginsel wys? Waarom is dit tot my voordeel om dit te gehoorsaam? Watter slegte gevolge het diegene ervaar wat God se raad in hierdie opsig geïgnoreer het?’ Wanneer ons gewete op hierdie wyse volgens Jehovah se weë ingestel word, is die kanse groter dat ons besluite sal neem wat met sy wil ooreenstem. Ons kan ‘voortgaan om te begryp wat die wil van Jehovah is’ en dan gehoorsaam daarvolgens lewe (Ef. 5:17). Dit is nie altyd maklik nie.
Satan probeer God se gesag ondermyn
10. Wat is een gebied waarop Satan probeer om God se gesag te ondermyn?
10 Satan probeer al lank om God se gesag te ondermyn. Sy onafhanklike gees word op baie maniere geopenbaar. Neem byvoorbeeld die gebrek aan respek vir die goddelike instelling van die huwelik. Party verkies om net saam te bly, terwyl ander planne beraam om van hulle huweliksmaat bevry te word. Albei groepe stem moontlik saam met ’n welbekende aktrise wat gesê het: “Monogamie is vir albei geslagte onmoontlik.” Sy het bygevoeg: “Ek ken niemand wat getrou is of wat getrou wil wees nie.” ’n Gewilde akteur wat nagedink het oor sy eie mislukte verhoudings, het eweneens gesê: “Ek is nie seker of dit regtig in ons natuur lê om lewenslank saam met een persoon te wees nie.” Dit sal goed wees as ons ons afvra: ‘Aanvaar ek Jehovah se gesag wat die huwelik betref of het die wêreld se losse sedes my denke beïnvloed?’
11, 12. (a) Waarom is dit miskien vir jongmense moeilik om Jehovah se gesag te aanvaar? (b) Vertel ’n ondervinding wat toon hoe dwaas dit is om Jehovah se wette en beginsels te verontagsaam.
11 Is jy ’n jong persoon in Jehovah se organisasie? Dan is jy dalk ’n spesiale teiken in Satan se pogings om Jehovah se gesag te ondermyn. “Die begeertes wat eie is aan die jeug” tesame met portuurdruk kan jou tot die slotsom laat kom dat God se wette swaar is (2 Tim. 2:22). Moenie dat dit gebeur nie. Probeer om die wysheid van God se standaarde in te sien. Die Bybel sê byvoorbeeld vir jou om ‘vir die hoerery te vlug’ (1 Kor. 6:18). Ook hier moet jy jou afvra: ‘Waarom is hierdie gebod wys? Hoe sal gehoorsaamheid in hierdie opsig my tot voordeel strek?’ Jy ken dalk mense wat God se raad geïgnoreer het en toe duur vir daardie fout betaal het. Is hulle nou werklik gelukkig? Geniet hulle ’n beter lewe as toe hulle met Jehovah se organisasie omgegaan het? Het hulle werklik die een of ander geheim tot geluk gevind wat die res van God se knegte misgekyk het?—Lees Jesaja 65:14.
12 Kyk na wat ’n Christen met die naam Sharon ’n ruk gelede gesê het: “Omdat ek Jehovah se wet verontagsaam het, het ek die dodelike siekte vigs opgedoen. Ek dink dikwels terug aan die talle gelukkige jare wat ek in Jehovah se diens gehad het.” Sy het besef dat dit dwaas was om Jehovah se wette te verbreek en dat sy die grootste respek daarvoor moes gehad het. Jehovah se wette is daar om ons te beskerm. Net sewe weke nadat Sharon die woorde hierbo geskryf het, is sy oorlede. Soos haar tragiese ondervinding toon, het Satan niks goeds om vir diegene aan te bied wat deel van hierdie goddelose stelsel word nie. As “die vader van die leuen” maak hy baie beloftes, maar dit loop op niks uit nie, net soos die een wat hy aan Eva gemaak het (Joh. 8:44). Ja, dit is altyd die beste om Jehovah se gesag te aanvaar.
Waak teen ’n onafhanklike gees
13. Wat is een gebied waarop ons teen ’n onafhanklike gees moet waak?
13 Om Jehovah se gesag te aanvaar, moet ons waak teen ’n onafhanklike gees. ’n Hoogmoedige gesindheid kan ons laat dink dat ons niemand se leiding nodig het nie. Byvoorbeeld, ons verset ons miskien teen die raad van diegene wat die leiding onder God se volk neem. God het ’n reëling ingestel waarvolgens ’n “getroue en verstandige slaaf”-klas geestelike voedsel op die regte tyd voorsien (Matt. 24:45-47). Ons moet nederig erken dat dit die manier is waarop Jehovah vandag vir sy volk sorg. Wees soos die getroue apostels. Toe party dissipels gestruikel het, het Jesus die apostels gevra: “Julle wil nie miskien ook gaan nie?” Petrus het geantwoord: “Here, na wie toe sal ons weggaan? U het woorde van die ewige lewe.”—Joh. 6:66-68.
14, 15. Waarom moet ons ons nederig aan Bybelraad onderwerp?
14 Om Jehovah se gesag te aanvaar, behels dat ons gehoor gee aan raad wat op sy Woord gegrond is. “Die getroue en verstandige slaaf”-klas waarsku ons byvoorbeeld herhaaldelik om “wakker en nugter van verstand [te] bly” (1 Tess. 5:6). Dié raad is uiters gepas gedurende hierdie laaste dae waarin baie mense “liefhebbers van hulleself [en] liefhebbers van geld” is (2 Tim. 3:1, 2). Kan hierdie heersende gesindhede ons beïnvloed? Ja. Niegeestelike doelwitte kan ons geestelik aan die slaap sus, of ons kan ’n materialistiese gesindheid ontwikkel (Luk. 12:16-21). Hoe wys is dit dan tog om die Bybel se raad te aanvaar en die selfsugtige lewenstyl te vermy wat so algemeen in Satan se wêreld is!—1 Joh. 2:16.
15 Die geestelike voedsel van “die getroue en verstandige slaaf”-klas word deur die aangestelde ouer manne aan die plaaslike gemeentes oorgedra. Die Bybel vermaan ons: “Wees gehoorsaam aan dié wat die leiding onder julle neem en wees onderdanig, want hulle waak oor julle siel as dié wat rekenskap sal gee; sodat hulle dit met vreugde kan doen en nie met ’n gesug nie, want dit sal vir julle skadelik wees” (Heb. 13:17). Beteken dit dat gemeentelike ouer manne onfeilbaar is? Natuurlik nie! God sien hulle onvolmaaktheid duideliker as wat enige mens kan. En tog verwag hy van ons om onderdanig te wees. As ons met die ouer manne saamwerk, ten spyte van hulle onvolmaaktheid, lewer dit bewys dat ons Jehovah se gesag aanvaar.
Die belangrikheid van nederigheid
16. Hoe kan ons respek toon vir Jesus as Hoof van die Christengemeente?
16 Ons moet altyd onthou dat Jesus die ware Hoof van die gemeente is (Kol. 1:18). Dit is een rede waarom ons ons nederig onderwerp aan die leiding van die aangestelde ouer manne en “meer as buitengewone agting” aan hulle betoon (1 Tess. 5:12, 13). Die gemeentelike ouer manne kan natuurlik wys dat hulle ook onderdanig is deur seker te maak dat hulle God se boodskap aan die gemeente oordra, nie hulle eie menings nie. Hulle ‘gaan nie verder as die dinge wat geskrywe staan’ ten einde die een of ander persoonlike idee te bevorder nie.—1 Kor. 4:6.
17. Waarom is ’n eersugtige gees gevaarlik?
17 Almal in die gemeente moet daarteen waak om hulle eie heerlikheid te soek (Spr. 25:27). Dit was klaarblyklik ’n valstrik vir een spesifieke dissipel met wie die apostel Johannes te doen gehad het. Hy het geskryf: “Diotrefes, wat daarvan hou om die eerste plek onder hulle te beklee, ontvang niks van ons met respek nie. Daarom sal ek, as ek kom, sy werke in herinnering bring wat hy bly doen deur met goddelose woorde oor ons te klets” (3 Joh. 9, 10). Selfs vandag kan ons ’n les hieruit leer. Ons het goeie rede om enige spoor van eersug wat ons miskien in onsself bespeur, uit te roei. Die Bybel sê vir ons: “Trots kom voor ’n ineenstorting en ’n hoogmoedige gees voor struikeling.” Diegene wat God se gesag aanvaar, moet die valstrik van vermetelheid vermy, andersins sal dit tot oneer lei.—Spr. 11:2; 16:18.
18. Wat sal ons help om Jehovah se gesag te aanvaar?
18 Ja, stel jou dit ten doel om die wêreld se gees van onafhanklikheid te weerstaan en om Jehovah se gesag te aanvaar. Peins van tyd tot tyd met waardering oor die groot voorreg wat jy het om Jehovah te dien. Die feit dat jy onder God se volk is, is bewys dat hy jou deur middel van sy heilige gees getrek het (Joh. 6:44). Moet nooit jou posisie voor God as vanselfsprekend aanneem nie. Streef in alle aspekte van die lewe daarna om te toon dat jy ’n onafhanklike gees verwerp en dat jy Jehovah se gesag aanvaar.
Onthou jy?
• Wat behels dit om Jehovah se gesag te aanvaar?
• Watter verband is daar tussen die oefening van ons waarnemingsvermoëns en die aanvaarding van Jehovah se gesag?
• Op watter gebiede probeer Satan God se gesag ondermyn?
• Waarom is nederigheid belangrik as ons Jehovah se gesag wil aanvaar?
[Prent op bladsy 18]
“Ons moet eerder aan God as heerser gehoorsaam wees as aan mense”
[Prent op bladsy 20]
Dit is altyd wys om God se standaarde te volg