Ons lesers vra
Waarom neem Jehovah se Getuies nie deel aan oorlog nie?
Ongeag waar Jehovah se Getuies woon, hulle is al lank daarvoor bekend dat hulle nie aan oorloë tussen nasies of tussen strydende partye in dieselfde nasie deelneem nie. “Jehovah se Getuies handhaaf streng neutraliteit tydens oorloë”, het die Australian Encyclopædia ’n halfeeu gelede gesê.
’n Vername rede waarom die Getuies nie aan oorlog deelneem nie, is dat deelname aan sulke konflikte hulle Christelike gewete sal skend. Hulle gewete is deur die gebooie en voorbeeld van die Here Jesus Christus gevorm. Hy het sy volgelinge aangesê om hulle naaste lief te hê. Hy het ook beveel: “Hou aan om julle vyande lief te hê, om goed te doen aan dié wat julle haat” (Lukas 6:27; Matteus 22:39). Toe een van sy dissipels Hom met ’n swaard probeer verdedig het, het Jesus vir hom gesê: “Sit jou swaard terug in sy plek, want almal wat die swaard opneem, sal deur die swaard vergaan” (Matteus 26:52). Deur woord en voorbeeld het hy dus duidelik getoon dat sy volgelinge nie oorlogswapens moet gebruik nie.
Nog ’n rede waarom Jehovah se Getuies nie aan oorlog deelneem nie, is dat hulle lede van ’n wêreldwye gemeenskap van gelowiges is. Oorlog sal broer teenoor broer stel, en dit sal reëlreg in stryd wees met Jesus se gebod dat hulle “liefde onder mekaar” moet hê.—Johannes 13:35.
Die bogenoemde beginsels aangaande liefde is nie bloot ’n teorie vir Jehovah se Getuies nie. Neem as voorbeeld hulle optrede gedurende die Tweede Wêreldoorlog, 1939-1945. In die Verenigde State is meer as 4 300 Getuies van Jehovah in federale gevangenisse opgesluit omdat hulle geweier het om militêre diens te doen. In Brittanje is meer as 1 500, insluitende oor die 300 vroue, opgesluit omdat hulle geweier het om werk in verband met die oorlog te verrig. In Nazi-Duitsland is meer as 270 Getuies op bevel van die Staat tereggestel omdat hulle geweier het om die wapen op te neem. Onder die Nazi-regime is meer as 10 000 Getuies gevange gehou, in tronke of in konsentrasiekampe. Getuies in Japan het ook verskriklik gely. Enigiemand wat geliefdes verloor het op die slagvelde van die Tweede Wêreldoorlog—of trouens, in enige oorlog daarna—kan seker wees dat nie ’n enkele Getuie van Jehovah vir daardie sterftes verantwoordelik was nie.
Jehovah se Getuies se beskouing ten opsigte van oorlog word goed weergegee deur die laaste woorde van Wolfgang Kusserow. In 1942 het die Nazi’s hierdie 20-jarige Duitser onthoof omdat hy geweier het om aan oorlog deel te neem (Jesaja 2:4). Hy het voor die krygsraad gesê: “Ek is as een van Jehovah se Getuies grootgemaak, volgens God se woord soos uiteengesit in die Heilige Skrif. Die grootste en allerheiligste wet wat hy die mensdom gegee het, is: ‘Jy moet jou God bo alles en almal liefhê en jou naaste soos jouself.’ Ander gebooie sê: ‘Jy mag nie doodmaak nie.’ Het ons Skepper dit alles vir die bome laat neerskryf?”—Markus 12:29-31; Eksodus 20:13.
Jehovah se Getuies glo dat slegs Jehovah, die almagtige God, blywende vrede op die aarde sal teweegbring. Hulle vertrou op hom om sy belofte te vervul dat hy “oorloë [sal laat] ophou tot aan die einde van die aarde”.—Psalm 46:9.