Getuieniswerk op die markplein

TOE die apostel Paulus in die stad Atene was, het hy elke dag na die markplein gegaan om die goeie nuus oor Jesus te verkondig (Hand. 17:17). Paulus het die markplein gekies omdat dit die middelpunt van die Ateners se lewe was.

Byna 2 000 jaar later gebruik Jehovah se volk nog steeds die markplein om die boodskap van God se Koninkryk bekend te maak. Waarom? Omdat baie mense daar gevind kan word. Vandag kan die markplein ’n winkelsentrum wees. Sommige Getuies verkry toestemming van die bestuurder of eienaar en gebruik dan ’n tafel of ’n stalletjie om Bybellektuur uit te stal.

In ’n winkelsentrum in New Jersey, VSA, is daar byvoorbeeld ’n aantreklike uitstalling van lektuur gereël, met die tema “Behou gesinswaardes—Hoe?” Die resultaat? In een dag is 153 boeke in ses tale versprei.

Een vrou wat na die lektuurstalletjie gekom het, het aandagtig geluister na die verduideliking wat een van die Getuies gegee het. Die vrou het saamgestem dat dit belangrik is om God in ons lewe en in ons gesin te hê. Sy het die volgende publikasies geneem: Leer by die Groot Onderwyser, Die geheim van gesinsgeluk en Vrae wat jongmense vra—Antwoorde wat werk.

Vroeg die middag het ’n man op pad na die winkel langsaan by die lektuuruitstalling verbygeloop. Die Jongmense vra-boek het sy oog gevang. Die suster wat die stalletjie beman het, kon aan die man se gesig sien dat hy belangstel. Sy het hom gevra: “Stel jy belang in een van die boeke?” Hy het sy kop geknik en na die Jongmense vra-boek gewys. Sy het hom die boek gegee, waarna hy alreeds sy hand uitgesteek het. Hy het gesê dat hy drie kinders het. Gedurende die gesprek het hy genoem dat hy een keer per week besprekings met hulle het. Sy twee oudste kinders is tieners. Terwyl hy die boek deurgeblaai het, het hy gesê dat hy dit baie maklik as ’n handleiding vir party van hulle gesinsbesprekings sal kan gebruik. Die verkondiger het ook sy aandag op Die geheim van gesinsgeluk gevestig en hom verseker dat hy en sy vrou uiters nuttige raad in verband met gesinsbesluite daarin sal vind. Die man het die voorstel waardeer, ’n bydrae gegee en ingestem dat iemand hulle kan besoek.

Hoe het die Getuies gevoel oor hulle dag van getuieniswerk in die winkelsentrum? “Ek het hierdie vorm van predikingswerk geniet”, het een suster gesê. “Wat ’n ondervinding was dit tog vir my!” ’n Ander suster het gesê: “Jehovah sê dat die goeie nuus tot in die mees afgeleë deel van die aarde verkondig sal word. Vandag het hierdie goeie nuus mense van verskillende tale in Paramus, New Jersey, bereik. Dit was wonderlik om deel van hierdie reëling te wees. Almal wat daaraan deelgeneem het, was gelukkig. Nie een van ons wou aan die einde van die dag huis toe gaan nie.”

Kan jy die goeie nuus op meer maniere verkondig? Ons vernaamste metode is deur van huis tot huis te gaan (Hand. 20:20). Sal jy dit egter oorweeg om op die markplein of in ’n winkelsentrum getuieniswerk te doen?