Trane in ’n leersak

DIE jong man was ’n vlugteling. Oorweldig en ontsteld, met trane wat glinster in sy oë, het hy hom op die goedhartigheid en medelye van sy God, Jehovah, beroep en gesmeek: “Sit tog my trane in u leersak” (Psalm 56:8). Daardie man was Dawid, wat later die koning van Israel sou word. Maar wat was die leersak waarna hy verwys het, en hoe kan God ons trane in een sit?

Dawid was bekend met leersakke. Dit was ’n houer wat gebruik is om water, olie, wyn of selfs botter in te hou. Nomade van die Sahara, soos die Toearegs, gebruik nog steeds leersakke wat van die volledige huid van ’n bok of ’n skaap gemaak is. Sulke sakke kan tientalle liters water hou. Leersakke is bekend daarvoor dat dit water koel hou, selfs in die intense hitte van die woestynson. In die verlede is dit oor die algemeen deur donkies of kamele vervoer. Deesdae sal jy dalk selfs een sien wat aan die voorkant van ’n vierwielaangedrewe voertuig vasgemaak is!

Dawid se roerende woorde oor die leersak kan ook vir ons iets beteken. Hoe so? Wel, die Bybel verduidelik dat Satan hierdie wêreld beheer en dat hy in ons dag “groot toorn” het. Gevolglik ondervind die aarde vreeslike weë (Openbaring 12:12). Daarom is daar baie wat, soos Dawid, met emosionele, verstandelike of fisiese lyding te kampe het—veral diegene wat God probeer behaag. Beskryf dit jou? “Al is dit huilend”, volhard sulke getroue mense moedig in hulle pogings om ’n lewe van onkreukbaarheid te lei (Psalm 126:6). Hulle kan daarvan seker wees dat hulle hemelse Vader nie net die beproewinge sien waarmee hulle te kampe het nie, maar ook die emosionele impak van daardie beproewinge. Hy verstaan werklik die pyn wat sy knegte ervaar, en hy onthou met medelye hulle trane en swaarkry. Figuurlik gesproke bewaar hy dit in sy leersak.