’n Ope dag met ’n doel
“WAT doen hulle daar?” Baie mense wat by die groot kompleks van Jehovah se Getuies in Mogale City (Krugersdorp) verbyry, vra hierdie vraag. Die Getuies het dus besluit om ’n ope dag op 12 sowel as 13 Oktober 2007 by die takkantoorkompleks te hou. Dit het ’n tweeledige doel gedien—om ’n einde aan valse gerugte te maak en om die publiek te wys wat die takkantoor doen om die werk te ondersteun wat volgens Jesus Christus se bevel gedoen moet word.—Matteus 28:19, 20.
Die takkantoorpersoneel het groot tekens by die ingang gesit wat die publiek uitgenooi het, en hulle het spesiale uitnodigings by die bure afgelewer. Sakekennisse en hulle gesinne is genooi. Wat was die reaksie? Meer as 500 mense wat nie Getuies is nie, het op ’n toer deur die fasiliteite gegaan.
’n Groot aantreklikheid was die MAN Roland Lithoman-rolpers wat tot 90 000 tydskrifte per uur druk. Die ontsaglike versendingsafdeling wat daagliks meer as 14 ton lektuur hanteer, sowel as die boekbindery, het die besoekers ook beïndruk. Getuies in die verskillende afdelings het aantreklike uitstallings voorberei, met inbegrip van een wat ’n opsomming gee van die geskiedenis van gemeganiseerde drukwerk—van Gutenberg tot moderne lito-rubberdrukwerk. ’n Ander uitstalling het gewys hoe die takkantoor vir die omgewing sorg. ’n Spesiale eenheid raak byvoorbeeld ontslae van gifgasse en reuke wat deur die droërs op die perse afgegee word, en filters vang papierstof op sodat dit verwyder kan word.
’n Plaaslike koerant het ’n artikel gepubliseer wat gesê het dat die 700 vrywillige werkers wat op die perseel woon, “geordende bedienaars is wat hulle aan Jehovah toegewy het”. Dit het ook kommentaar gelewer oor “hoe pragtig skoon dit is en hoe presies op tyd alles gebeur” in die drukkery. ’n Man wat Jehovah se Getuies teëgestaan het, het op ’n toer gegaan. Daarna het hy ’n brief geskryf wat sê: “Veels geluk. ’n Mens sien nie dikwels voortreflikheid op so ’n skaal nie.”
Talle besoekers het hulle waardering uitgespreek vir die toer deur die fasiliteite en was verbaas om te sien dat die takkantoor Bybellektuur in 151 tale in voorraad het en publikasies vir 18 lande in Suider- en Sentraal-Afrika druk. Wêreldwyd is die takkantore van Jehovah se Getuies oop vir toere gedurende werksure. Kom gerus met die tak in jou omgewing in aanraking om uit te vind op watter tye toere beskikbaar is.
[Prent op bladsy 14]
Toergroepe kom by die takkantoor aan
[Prent op bladsy 14]
Uitnodiging
[Prente op bladsy 15]
Die Suid-Afrikaanse takkantoorkompleks in Mogale City
[Prent op bladsy 15]
MAN Roland Lithoman-rolpers
[Prent op bladsy 15]
Boekbindery
[Prent op bladsy 15]
Versendingsafdeling