1 Bou vertroue op in die Bybel

“Die hele Skrif is deur God geïnspireer en is nuttig om te onderrig, om tereg te wys, om dinge reg te stel.”—2 Timoteus 3:16.

WAT IS DIE UITDAGING? Baie mense hou vol dat die Bybel bloot ’n boek van menslike wysheid is. Party glo dat dit geskiedkundig onakkuraat is. Ander beweer dat die Bybel se raad onprakties of outyds is.

HOE KAN JY DIE UITDAGING OORKOM? Diegene wat die betroubaarheid of nut van die Bybel in twyfel trek, het dikwels nie die saak self ondersoek nie. Hulle herhaal bloot wat ander sê. Maar die Bybel waarsku: “Iemand wat onervare is, glo elke woord, maar die skerpsinnige gee ag op sy voetstappe.”—Spreuke 14:15.

Moenie blindweg aanvaar wat ander sê nie, maar volg eerder die voorbeeld van die eerste-eeuse Christene wat in Berea gewoon het, in wat nou Noord-Griekeland is. Hulle het nie maar net aanvaar wat ander vir hulle gesê het nie. Trouens, hulle was daarvoor bekend dat hulle “die Skrif elke dag sorgvuldig ondersoek [het] of hierdie dinge so was” (Handelinge 17:11). Kom ons kyk kortliks na twee redes waarom jy die vertroue kan hê dat die Bybel die geïnspireerde Woord van God is.

Die Bybel is geskiedkundig akkuraat. Deur die jare heen het skeptici die Bybel se akkuraatheid ten opsigte van die name van mense en plekke wat dit meld, bevraagteken—en hulle doen dit nog steeds. Maar die getuienis het keer op keer bewys dat die skeptisisme ongegrond en die Bybelverslag betroubaar is.

Geleerdes het byvoorbeeld ’n tyd lank die bestaan van die Assiriese koning Sargon, wat in Jesaja 20:1 gemeld word, in twyfel getrek. Maar in die 1840’s het argeoloë die paleis van hierdie koning begin opgrawe. Nou is Sargon een van die bekendste Assiriese konings.

Kritici het die bestaan van Pontius Pilatus, die Romeinse goewerneur wat beveel het dat Jesus tereggestel word, bevraagteken (Matteus 27:1, 22-24). Maar in 1961 is ’n steen met Pilatus se naam en rang daarop naby die stad Sesarea in Israel ontdek.

Aangaande die geskiedkundige akkuraatheid van die Bybel het die U.S.News & World Report van 25 Oktober 1999 gesê: “Die hedendaagse argeologie het die geskiedkundige kern van die Ou en Nuwe Testament op buitengewone maniere bevestig—dit het sleutelgedeeltes van die verhale van Israel se aartsvaders, die Eksodus, die Dawidiese monargie en die lewe en tye van Jesus gestaaf.” Hoewel geloof in die Bybel nie afhanklik is van argeologiese ontdekkings nie, sal ’n mens sulke geskiedkundige akkuraatheid verwag van ’n boek wat deur God geïnspireer is.

Die praktiese wysheid wat die Bybel bevat, strek mense uit alle agtergronde tot voordeel. Lank voordat mikro-organismes en hulle rol in die verspreiding van siekte ontdek is, het die Bybel higiëniese gebruike aanbeveel wat vandag nog steeds toepaslik is (Levitikus 11:32-40; Deuteronomium 23:12, 13). Gesinslede wat die Bybel se raad toepas oor hoe om mekaar te behandel, is gelukkiger (Efesiërs 5:28–6:4). Iemand wat volgens Bybelbeginsels lewe, sal moontlik ’n pligsgetrouer werknemer of ’n redeliker werkgewer word (Efesiërs 4:28; 6:5-9). Die toepassing van Bybelbeginsels is ook bevorderlik vir emosionele gesondheid (Spreuke 14:30; Efesiërs 4:31, 32; Kolossense 3:8-10). Sulke praktiese raad is wat ons van ons Skepper sal verwag.

WAT IS DIE BELONING? Die wysheid in die Bybel kan selfs ’n onervare persoon wys maak (Psalm 19:7). En wanneer ons vertroue in die Bybel opgebou het, kan dit ons meer as enige ander boek help om die volgende stap tot sterker geloof te doen.

Vir verdere inligting, sien hoofstuk 2, “Die Bybel—’n Boek wat van God kom”, in die boek Wat leer die Bybel werklik?a

[Voetnoot]