Kom nader aan God

Jehovah gee ons ’n keuse

Deuteronomium 30:11-20

“EK HET dikwels die onredelike vrees gehad dat ek aan Jehovah ontrou sou wees.” Dit is wat een Christenvrou gesê het wat gevoel het dat haar slegte ondervindinge as kind haar tot mislukking gedoem het. Is dit die geval? Is ons werklik hulpelose slagoffers van omstandighede? Nee. Jehovah God het ons die gawe van wilsvryheid gegee, en ons kan dus self kies hoe ons gaan lewe. Jehovah wil hê dat ons die regte keuses moet maak, en sy Woord, die Bybel, sê vir ons hoe ons dit kan doen. Beskou Moses se woorde in Deuteronomium hoofstuk 30.

Is dit moeilik om te weet wat God van ons vereis en dit dan te doen?a Moses sê: “Hierdie gebod wat ek jou vandag beveel, is nie te moeilik vir jou nie, en ook is dit nie ver nie” (vers 11). Jehovah verwag nie die onmoontlike van ons nie. Sy vereistes is redelik en bereikbaar. Ons kan ook uitvind wat dit is. Ons hoef nie “in die hemel” op te vaar of “na die oorkant van die see” te reis om uit te vind wat God van ons verwag nie (verse 12, 13). Die Bybel sê duidelik vir ons hoe ons moet lewe.—Miga 6:8.

Jehovah dwing ons egter nie om hom te gehoorsaam nie. Moses sê: “Ek hou jou vandag die lewe en die goeie voor, en die dood en die kwaad” (vers 15). Ons is vry om te kies tussen die lewe en die dood, die goeie en die kwaad. Ons kan kies om God te aanbid en te gehoorsaam, met seëninge in die vooruitsig, of ons kan kies om aan hom ongehoorsaam te wees en die gevolge dra. Hoe dit ook al sy, dit is ons keuse.—Verse 16-18; Galasiërs 6:7, 8.

Maak dit vir Jehovah saak watter weg ons kies? Natuurlik! Moses is deur God geïnspireer om te sê: “Jy moet die lewe kies” (vers 19). Maar hoe kies ons die lewe? Moses het verduidelik: “Deur Jehovah jou God lief te hê, deur na sy stem te luister en deur hom aan te kleef” (vers 20). As ons Jehovah leer liefkry, sal ons gehoorsaam na hom wil luister en hom lojaal wil aankleef, ongeag wat gebeur. Deur so ’n weg te volg, kies ons die lewe—die beste lewenswyse nou, met die vooruitsig op die ewige lewe in God se komende nuwe wêreld.—2 Petrus 3:11-13; 1 Johannes 5:3.

Moses se woorde leer ons ’n gerusstellende waarheid. Ongeag wat jy in hierdie goddelose wêreld ondervind het, jy is nie ’n hulpelose slagoffer nie; en jy is ook nie tot mislukking gedoem nie. Jehovah het jou die gawe van wilsvryheid gegee. Ja, jy kan kies om Jehovah lief te hê, na hom te luister en aan hom lojaal te bly. As jy so ’n keuse maak, sal Jehovah jou pogings seën.

Hierdie waarheid—dat ons vry is om Jehovah uit eie keuse lief te hê en te dien—het die vrou vertroos wat aan die begin aangehaal is. Sy sê: “Ek hét Jehovah lief. Soms het ek vergeet dat my liefde vir Jehovah die allerbelangrikste is. Ek kan dus getrou wees.” Met Jehovah se hulp kan jy ook getrou wees.

[Voetnoot]