Kies die lewe in daardie nuwe wêreld
GOD het natuurlik ’n voorneme gehad toe hy hierdie unieke juweel van ’n planeet geskep het. En hy het besluit dat die mensdom ’n sleutelrol daarin moet speel (Jesaja 45:18). Die verskriklike toestand waarin ons aarde verval het, strek God nie tot eer nie. Maar glo jy werklik dat hy hierdie situasie sal laat voortduur? Beslis nie!
Die mens hunker na ’n nuwe wêreld vanweë ’n begeerte na iets wat die mensdom vroeër besit het. Dit was ’n werklike, tasbare aardse paradys. Die eerste mensepaar is in so ’n tuiste geplaas en die Skepper se oorspronklike voorneme was dat die mensdom vir ewig daardie Paradys op aarde moes geniet.—Genesis 1:28.
Jehovah God bied jou nou die geleentheid om in sy nuwe wêreld te lewe, waar hy die getroues sal seën deur hulle hartsbegeertes te vervul (Psalm 10:17; 27:4). Gaan jy kies om daar te lewe?
Jy het ’n keuse
Die Israeliete wat Moses se afskeidstoespraak aangehoor het, moes ’n soortgelyke besluit neem. Hulle moes óf God se heerskappy kies, óf dié van die nasies van daardie tyd. Moses se raad was: “Die lewe en die dood . . . het ek jou voorgehou. Kies dan die lewe, dat jy kan lewe, jy en jou nageslag, deur die HERE jou God lief te hê, na sy stem te luister en Hom aan te hang” (Deuteronomium 30:19, 20). Ja, jou keuse is ook ’n saak van lewe en dood.
Dit is waarom hierdie artikels oor God se nuwe wêreld verskyn—om jou hart te raak sodat jy dít sal kies pleks van jou hoop te stel op mense se ydele beloftes om ’n nuwe wêreld te skep. Daar is talle wonderlike dinge wat jy oor God se nuwe wêreld moet leer.
Watter bewys is daar byvoorbeeld dat hierdie nuwe wêreld ophande is? Hoe sal dit al die regerings van die aarde vervang? Watter gebeurtenisse sal daartoe aanleiding gee? Hoe kan ons seker wees dat die Bybel se beloftes sal uitkom?
Die antwoorde op hierdie en talle ander vrae is beskikbaar. Jehovah se Getuies sal jou met graagte die tekste in jou eie Bybel wys wat nie net die seëninge van God se nuwe wêreld beskryf nie, maar ook aandui presies wanneer en hoe God se regering begin heers en uiteindelik daardie heerskappy uitbrei om oor die hele aarde te regeer.
Ons moedig jou aan om te reageer soos die eerste-eeuse Bereane wat na die apostel Paulus geluister het. Hulle het tyd daaraan bestee om “elke dag die Skrifte [te] ondersoek of hierdie dinge so was” (Handelinge 17:11). Dit sal verstandig wees as jy dieselfde doen. Jy kan seker wees dat jou Bybelbesprekings met Jehovah se Getuies jou geestelik baie tevredenheid sal verskaf terwyl jy leer oor die wonderlike toekoms wat God ons belowe.
Jy moet kies—óf om God en die belange van sy Koninkryksregering te dien, óf om jou vertroue en hoop in mensepogings ten opsigte van selfbestuur te stel. Ons moedig jou aan om soveel moontlik oor God se beloftes te leer sodat jy ’n oorwoë besluit kan neem. As jy Bybelkennis opdoen, sal dit nie net jou hoop vir die toekoms verlewendig nie, maar dit sal jou help om deur die laaste dae van menseheerskappy heen geestelik lewend te bly.—2 Timotheüs 1:13.
Die mens se baie jare van hunkering na ’n nuwe wêreld is amper verby. Jehovah se Getuies wil hê jy moet in daardie nuwe wêreld kan ingaan en die lewe vir ewig geniet. Dit is wat God ook wil hê. Ons hoop van ganser harte dat jy God se nuwe wêreld sal kies. As jy dit doen, sal jy sien dat die mensdom se hunkering na ’n nuwe wêreld nooit tevergeefs was nie.