Wat Jesus ander oor homself geleer het

“Jesus het glad nie getwyfel oor wie hy was, waar hy vandaan gekom het, waarom hy ons wêreld betree het en wat die toekoms vir hom ingehou het nie.”—DIE SKRYWER HERBERT LOCKYER.

VOORDAT ons Jesus se leringe kan aanvaar en geloof daarin kan stel, moet ons eers iets van hom weet. Wie was Jesus werklik? Waar het hy vandaan gekom? Wat was sy doel in die lewe? In die Evangelies—Matteus, Markus, Lukas en Johannes—kan ons die antwoorde as ’t ware uit Jesus se eie mond hoor.

Hy het gelewe voordat hy op die aarde gebore is Jesus het eenkeer gesê: “Voordat Abraham in aansyn gekom het, was ek” (Johannes 8:58). Abraham het ongeveer 2 000 jaar voordat Jesus gebore is, gelewe. Tog het Jesus gelewe selfs voordat hierdie getroue aartsvader op die aarde was. Maar waar het Jesus gelewe? “Ek het uit die hemel neergedaal”, het hy verduidelik.—Johannes 6:38.

Die Seun van God Jehovah het baie engeleseuns. Jesus is egter uniek. Hy het na homself verwys as “die enigverwekte Seun van God” (Johannes 3:18). Hierdie uitdrukking beteken dat Jesus die enigste skepping is wat regstreeks deur God geskep is. Die enigverwekte Seun is die een deur wie God alle ander dinge geskep het.—Kolossense 1:16.

“Die Seun van die mens” Jesus het hierdie uitdrukking meer as enige ander gebruik om na homself te verwys (Matteus 8:20). Hy het sodoende getoon dat hy nie ’n gematerialiseerde engel of ’n inkarnasie is nie. Hy was eerder in alle opsigte ’n mens. Deur middel van God se heilige gees het Hy sy Seun se lewe vanuit die hemel na die baarmoeder van die maagd Maria op die aarde oorgeplaas, sodat sy swanger geword het. Gevolglik is Jesus as ’n volmaakte, sondelose mens gebore.—Matteus 1:18; Lukas 1:35; Johannes 8:46.

Die beloofde Messias “Ek weet dat die Messias kom”, het ’n Samaritaanse vrou vir Jesus gesê. Hy het geantwoord: “Dit is ek, ek wat met jou praat” (Johannes 4:25, 26). Die woord “Messias”, soos die woord “Christus”, beteken “Gesalfde”. Jesus is gesalf, of deur God aangestel, om ’n spesiale rol in die vervulling van God se beloftes te speel.

Sy vernaamste werk Jesus het eenkeer gesê: “Ek [moet] die goeie nuus van die koninkryk van God bekend maak, want hiervoor is ek uitgestuur” (Lukas 4:43). Hoewel hy talle goeie dade gedoen het vir mense wat hulp nodig gehad het, het hy hom hoofsaaklik op die verkondiging van God se Koninkryk toegespits. Ons sal later bespreek wat hy ander oor die Koninkryk geleer het.

Dit is duidelik dat Jesus nie ’n gewone mens was nie.a Soos ons sal sien, het die lewe wat hy in die hemel gehad het, meer betekenis verleen aan die woorde wat hy op die aarde gespreek het. Is dit dan enigsins verbasend dat hy ’n boodskap verkondig het wat die lewe van miljoene die wêreld oor sou raak?

[Voetnoot]