Geheim 4
Kies jou vriende wyslik
WAT LEER DIE BYBEL? “Hy wat met wyses wandel, sal wys word.”—Spreuke 13:20.
WAT IS DIE UITDAGING? Ons vriende sal ons óf meer óf minder vergenoeg laat voel. Hulle gesindhede en gesprekke sal beslis ons lewensuitkyk beïnvloed.—1 Korintiërs 15:33.
Dink byvoorbeeld aan die Bybelverslag van 12 manne wat van ’n verkenningstog in Kanaän teruggekeer het. Die meeste van hulle “het ’n slegte berig onder die kinders van Israel versprei oor die land wat hulle verken het”. Twee van die manne het nietemin positiewe dinge oor Kanaän gesê en dit “’n baie, baie goeie land” genoem. Maar die negatiewe gesindheid van die tien spioene het onder die volk versprei. “Die hele vergadering [het] hulle stem verhef”, sê die verslag, “en al die kinders van Israel het . . . begin murmureer.”—Numeri 13:30–14:9.
Vandag is baie mense eweneens “murmureerders, klaers oor hulle lewenslot” (Judas 16). Dit is moeilik om vergenoeg te bly in die geselskap van vriende wat nooit tevrede is nie.
WAT KAN JY DOEN? Ontleed jou gesprekke met jou vriende. Spog jou vriende dikwels oor hulle besittings, of kla hulle die hele tyd oor wat hulle nie het nie? En watter soort vriend is jy? Probeer jy jou vriende afgunstig maak, of moedig jy hulle aan om vergenoeg te wees met wat hulle het?
Kyk na die voorbeeld van Dawid, wat koning sou word, en Jonatan, die seun van koning Saul. Dawid het as ’n vlugteling in die wildernis gelewe. Koning Saul het bedreig gevoel deur Dawid en wou hom dood hê. Hoewel Jonatan normaalweg die volgende koning sou gewees het, het hy ’n hegte vriend van Dawid geword. Jonatan het erken dat God Dawid as die volgende koning aangestel het en was tevrede om sy vriend te ondersteun.—1 Samuel 19:1, 2; 20:30-33; 23:14-18.
Jy het sulke vriende nodig, vriende wat daarna streef om vergenoeg te wees en wat jou belange op die hart dra (Spreuke 17:17). As jy sulke vriende wil hê, moet jy natuurlik self hierdie eienskappe aan die dag lê.—Filippense 2:3, 4.
[Prent op bladsy 7]
Laat jou vriende jou meer of minder vergenoeg voel?