Kom nader aan God
Hy “ken die hart van die mensekinders”
WIE van ons het nie al oorweldig gevoel deur die lewe se uitdagings en probleme nie? Dit lyk dalk soms of daar niemand is wat werklik verstaan met watter probleme ons te kampe het of watter diep pyn ons ervaar nie. Maar daar is iemand wat ons gevoelens ten volle verstaan—Jehovah God. Ons kan vertroosting put uit Salomo se woorde in 2 Kronieke 6:29, 30.
Salomo doen ’n gebed by die inwyding van die tempel in Jerusalem in 1026 VHJ. In sy gebed, wat moontlik tien minute duur, verheerlik Salomo Jehovah as ’n God van lojaliteit, die Vervuller van beloftes en die Hoorder van die gebed.—1 Konings 8:23-53; 2 Kronieke 6:14-42.
Salomo smeek God om die dringende versoek van sy aanbidders te hoor (vers 29). Hoewel Salomo baie beproewinge (vers 28) meld, sê hy dat elke aanbidder “sy eie plaag” ken en “sy eie pyn” ervaar. Een persoon word dalk deur een ding bedroef, terwyl iemand anders moontlik ’n heeltemal ander innerlike las dra.
Hoe dit ook al sy, godvresende mense hoef nie hulle laste alleen te dra nie. In sy gebed verwys Salomo na die individuele aanbidder wat moontlik beweeg word om ‘sy palms uit te strek’, dit wil sê om Jehovah in innige gebed te nader.a Salomo onthou miskien dat sy vader, Dawid, toe hy in groot benoudheid verkeer het, gesê het: “Werp jou las op Jehovah.”—Psalm 55:4, 22.
Hoe sal Jehovah op opregte smekinge om hulp reageer? Salomo smeek Jehovah: “Mag u dan hoor vanuit die hemel, u woonplek, en u moet vergewe en aan elkeen gee volgens al sy weë” (vers 30). Salomo weet dat die “Hoorder van die gebed” nie net vir sy aanbidders as ’n groep omgee nie, maar ook as individue (Psalm 65:2). Jehovah voorsien die nodige hulp, insluitende vergifnis aan die sondaar wat met sy hele hart tot God terugkeer.—2 Kronieke 6:36-39.
Waarom is Salomo seker dat Jehovah die smekinge van die berouvolle aanbidder sal verhoor? Salomo sê verder in sy gebed: “Omdat u [Jehovah] sy hart ken (want u alleen ken die hart van die mensekinders goed).” Jehovah is bewus van die plaag of pyn wat elke getroue aanbidder moontlik in sy hart dra, en sy benoudheid is vir Hom van belang.—Psalm 37:4.
Ons kan vertroosting put uit Salomo se gebed. Ander mense verstaan miskien nie ons innerlike gevoelens—ons “eie plaag” en ons “eie pyn”—ten volle nie (Spreuke 14:10). Maar Jehovah ken ons hart, en hy is diep besorg oor ons. As ons ons hart in gebed voor hom uitstort, kan dit ons laste makliker maak om te dra. “[Werp] al julle sorge op hom”, sê die Bybel, “want hy sorg vir julle.”—1 Petrus 5:7.
[Voetnoot]
a Om ‘die palms uit te strek’, dit wil sê om die hande met die palms na bo uit te steek, was in Bybeltye ’n gebaar wat met gebed gepaardgegaan het.—2 Kronieke 6:13.