Het mense in Bybeltye werklik so lank gelewe?

JEANNE LOUISE CALMENT is op 4 Augustus 1997 in haar tuisdorp in die suidooste van Frankryk oorlede. Sy was 122 jaar oud!

Vooruitgang in die wetenskap, gesondheidsorg en op ander gebiede help mense vandag om langer te lewe. Nietemin word min mense 100 jaar of ouer. Dit is miskien waarom die hoë ouderdom van dié wat wel so lank lewe, soms in die nuus kom, soos in die geval van madame Calment.

Volgens die Bybel het mense in die ou tyd baie langer gelewe, in sommige gevalle byna duisend jaar. Is dit waar of geloofwaardig? Het mense in Bybeltye werklik so lank gelewe? En is dit vandag vir ons van belang?

Mense wat lank gelewe het

Die Bybelboek Genesis meld sewe mense wat langer as 900 jaar gelewe het—hulle is almal voor die vloed van Noag se dag gebore. Dit was Adam, Set, Enos, Kenan, Jared, Metusalag en Noag (Genesis 5:5-27; 9:29). Die meeste mense weet dalk nie eens van hierdie mans nie, maar hulle was almal onder die eerste tien geslagte in die mensegeskiedenis. Metusalag is bekend daarvoor dat hy die langste gelewe het—hy het ’n rekordouderdom van 969 bereik!

Die Bybel meld ten minste nog 25 mense wat langer gelewe het as wat vandag algemeen die geval is. Party van hulle het 300, 400, selfs 700 jaar of langer gelewe (Genesis 5:28-31; 11:10-25). Maar vir baie mense is Bybelverslae oor persone wat so lank gelewe het, niks anders as mites nie. Is dit werklik so?

’n Mite of ’n betroubare verslag?

Volgens ’n dokument wat deur die Max Planck-instituut vir Demografiese Navorsing in Duitsland gepubliseer is, het navorsers die ouderdom van madame Calment, wat vroeër gemeld is, bevestig deur middel van ’n paar “eenvoudige, bewysbare verklarings” wat deur haar gemaak is. Hierdie verklarings het gehandel oor haar of haar familielede op die tyd toe sekere gebeure plaasgevind het. Wat sy gesê het, is toe vergelyk met munisipale, notariële en kerkdokumente sowel as met koerantartikels en sensusse. Interessant genoeg, hoewel dit onmoontlik was om elke besonderheid te bevestig, het die direkte en indirekte bewyse wat beskikbaar is, dit moontlik gemaak om haar lewensduur te bevestig.

Wat van die verslae in die Bybel? Is dit betroubaar? Beslis! Hoewel nie al die besonderhede deur beskikbare sekulêre bronne bevestig word nie, het die bewyse oor en oor getoon dat wat in die Bybel gesê word, uit ’n geskiedkundige, wetenskaplike en chronologiese oogpunt betroubaar is.a Dit behoort ons nie te verbaas nie, want die Bybel sê self: “God praat die waarheid, selfs al is alle ander persone leuenaars” (Romeine 3:4, Contemporary English Version). Ja, aangesien dit ’n boek is wat “deur God geïnspireer” is, is daar geen plek in die Bybel vir fiksie nie.—2 Timoteus 3:16.

Moses, wat deur Jehovah God gerig is om die Pentateug, of die eerste vyf Bybelboeke, te skryf, word ongetwyfeld as een van die invloedrykste en mees gerespekteerde persone in die mensegeskiedenis gereken. Jode beskou hom as die grootste onder al hulle leraars. Moslems beskou hom as een van hulle grootste profete. Wat Christene betref, is Moses ’n voorloper van Jesus Christus. Sal dit dan redelik wees om tot die slotsom te kom dat die geskrifte van so ’n belangrike geskiedkundige figuur onbetroubaar is?

Is tyd anders gemeet?

Party het beweer dat tyd destyds anders gemeet is en dat wat ’n jaar genoem is, eintlik ’n maand was. ’n Ontleding van die Genesisverslag laat egter geen twyfel nie dat mense destyds dieselfde begrip van tyd gehad het as wat ons vandag het. Kyk na twee voorbeelde. In die Vloedverslag lees ons dat die Vloed begin het toe Noag 600 jaar oud was, “in die tweede maand, op die sewentiende dag van die maand”. Dan sê dit dat die water die aarde 150 dae lank oorweldig het en dat die ark “in die sewende maand, op die sewentiende dag van die maand, . . . op die Araratberge tot rus gekom” het (Genesis 7:11, 24; 8:4). Hiervolgens is ’n tydperk van vyf maande—van die 17de dag van die tweede maand tot die 17de dag van die sewende maand van daardie jaar—gelyk aan 150 dae. Dit is duidelik dat die bewering dat ’n jaar eintlik ’n maand was, heeltemal ongegrond is.

Kyk nou na ’n tweede voorbeeld. Volgens Genesis 5:15-18 het Mahalalel ’n seun op die ouderdom van 65 gehad, toe nog 830 jaar gelewe en op die ouderdom van 895 gesterf. Sy kleinseun Henog het ook ’n seun gehad toe hy 65 jaar oud was (Genesis 5:21). As ’n jaar werklik net ’n maand was, sou hierdie twee mans ouers geword het toe hulle slegs vyf jaar oud was! Maak dit hoegenaamd sin?

Die argeologie help ons ook in hierdie verband, want dit stem ooreen met Bybelverklarings oor langlewende persone. Aangaande die aartsvader Abraham sê die Bybel dat hy van die stad Ur was, dat hy later in die stad Haran en toe in die gebied Kanaän gewoon het en dat hy teen Kedorlaomer, die koning van Elam, geveg het en hom verslaan het (Genesis 11:31; 12:5; 14:13-17). Die bestaan van hierdie plekke en mense is deur opgrawings bevestig. Die argeologie het ook lig gewerp op aspekte van die lande en kulture van die volke wat in verband met Abraham gemeld word. Aangesien hierdie Bybelverklarings oor Abraham akkuraat is, waarom moet sy ouderdom van 175 jaar dan bevraagteken word?—Genesis 25:7.

Daar is dus geen rede om skepties te wees oor wat die Bybel aangaande die buitengewoon lang lewens van party mense in die ou tyd sê nie. Maar jy kan jou afvra: ‘Waarom moet dit vir my van belang wees of daardie mense so lank gelewe het of nie?’

Jy kan langer lewe as wat jy dink!

Die uitsonderlike lang lewensduur van daardie mense wat voor die Vloed gelewe het, bewys dat die menseliggaam ’n merkwaardige potensiaal vir lewe het. Die moderne tegnologie het wetenskaplikes in staat gestel om die menseliggaam en sy wonderlike ontwerp, insluitende sy verbasende vermoë om hom te hernieu en te genees, van naderby te ondersoek. Hulle gevolgtrekking? Dit kan vir ewig lewe. “[Veroudering]”, sê Tom Kirkwood, ’n professor van geneeskunde, “bly een van die groot raaisels van die mediese wetenskap.”

Vir Jehovah God is veroudering egter nie ’n raaisel of ’n onoplosbare probleem nie. Hy het die eerste mens, Adam, volmaak geskep, en dit was sy voorneme dat mense vir ewig moet lewe. Ongelukkig het Adam besluit om sy rug op God te draai. Gevolglik het hy in sonde verval en onvolmaak geword. Hierin lê die verklaring waarna wetenskaplikes soek: ‘Deur een mens het die sonde in die wêreld ingekom en die dood deur die sonde, en die dood het só tot alle mense deurgedring omdat hulle almal gesondig het’ (Romeine 5:12). Dit is weens sonde en onvolmaaktheid dat ons siek word, oud word en sterf.

Maar ons liefdevolle Skepper se voorneme het nooit verander nie. As ’n merkwaardige bewys hiervan het hy die losprysoffer van sy Seun, Jesus Christus, voorsien, wat volmaaktheid en die ewige lewe moontlik maak. Die Bybel sê: “Soos hulle almal in Adam sterwe, so sal hulle ook almal in Christus lewend gemaak word” (1 Korintiërs 15:22). Mense wat voor die Vloed gelewe het, was nader aan volmaaktheid as ons, en daarom het hulle langer—baie langer—gelewe as wat ons tans lewe. Maar ons is vandag nader aan die tyd wanneer God se belofte vervul sal word. Alle spore van sonde en onvolmaaktheid sal binnekort tot die verlede behoort, en mense sal nie meer hoef agteruit te gaan en te sterf nie.—Jesaja 33:24; Titus 1:2.

Hoe kan jy hierdie seëninge ontvang? Moenie aanneem dat wat God belowe het, net ’n droom is nie. Jesus sê: “Hy wat my woord hoor en hom glo wat my gestuur het, het die ewige lewe” (Johannes 5:24). Neem dus Bybelkennis in en pas dit toe. As jy dit doen, sal jy die voorbeeld volg van dié wat die apostel Paulus gesê het “vir hulleself ’n goeie fondament vir die toekoms veilig as ’n skat . . . bewaar, sodat hulle ’n stewige houvas op die werklike lewe kan kry” (1 Timoteus 6:19). Jy kan seker wees dat die God wat dit vir mense in Bybelse tye moontlik gemaak het om so lank te lewe, jou vir ewig kan laat lewe!

[Voetnoot]

[Grafiek op bladsy 12]

(Sien publikasie vir oorspronklike teksuitleg)

1000*

969* METUSALAG

950* NOAG

930* ADAM

900*

800*

700*

600*

500*

400*

300*

200*

100* OUDER-DOMME