Ons lesers vra . . . 

Het God die Duiwel geskep?

▪ Aangesien die Bybel sê dat God “alles geskep het”, het party tot die gevolgtrekking gekom dat God die Duiwel moes geskep het (Efesiërs 3:9; Openbaring 4:11). Die Bybel toon duidelik dat dit nie die geval is nie.

Jehovah het die persoon geskep wat die Duiwel geword het. Die bestaan van die een wat die hoofteenstander van God is, moet dus versoen word met wat die Skrif oor Jehovah as die Skepper openbaar. Daar word van hom gesê: “Volmaak is sy werk, want al sy weë is geregtigheid. ’n God van getrouheid, by wie daar geen onreg is nie; regverdig en reg is hy” (Deuteronomium 32:3-5). Uit hierdie stelling kan ons aflei dat Satan wel eens volmaak en regskape was, dit wil sê een van God se engeleseuns. In Johannes 8:44 het Jesus gesê dat die Duiwel “nie in die waarheid vasgestaan [het] nie”, wat impliseer dat Satan wel op ’n tyd eerlik en onskuldig was.

Maar soos die res van Jehovah se intelligente skepsele het die engel wat Satan geword het, die vryheid gehad om tussen reg en verkeerd te kies. Deur te kies om ’n weg van verset teen God in te slaan en die eerste mensepaar oor te haal om by hom aan te sluit, het hy homself Satan gemaak, wat “Teenstander” beteken.—Genesis 3:1-5.

Daardie bose geesskepsel het hom ook die Duiwel gemaak, wat “Lasteraar” beteken. Satan was die onsigbare bedrieër agter die slang en het leuens op listige wyse gebruik om Eva te mislei om die Skepper se uitdruklike gebod te verbreek. Dit is waarom Jesus Satan “die vader van die leuen” genoem het.—Johannes 8:44.

Maar hoe kon ’n volmaakte geesskepsel—wat geen inherente swakhede of eksterne goddelose invloede gehad het nie—verkeerde neigings ontwikkel? Hy het klaarblyklik die aanbidding begeer wat uitsluitlik aan God behoort en ’n moontlikheid gesien om mense onder sy heerskappy te bring eerder as Jehovah s’n. Deur voortdurend aan hierdie moontlikheid van heerskappy te dink in plaas daarvan om die gedagte te verwerp, het hy toegelaat dat die idee wortelskiet en het hy uiteindelik in ooreenstemming daarmee opgetree. Die proses word in die boek Jakobus beskryf: “Elkeen word beproef deurdat hy deur sy eie begeerte meegesleep en verlok word. Daarna, wanneer die begeerte vrugbaar geword het, baar dit sonde.”—Jakobus 1:14, 15; 1 Timoteus 3:6.

Ter toeligting: Stel jou voor dat ’n rekenmeester ’n geleentheid sien om die boeke van sy maatskappy te manipuleer sodat hy by die maatskappy kan steel. Dalk verwerp hy onmiddellik daardie verkeerde gedagte. Maar as hy oor hierdie moontlikheid bly nadink, sal die idee al hoe aantrekliker word en sal hy dit moontlik uitvoer. As hy dit doen, het hy homself as ’t ware ’n dief gemaak. As hy oor sy misdaad lieg, word hy ook ’n leuenaar. Net so het die engel wat deur God geskep is, deur verkeerde begeertes te voed en uit te voer, sy wilsvryheid gebruik om ander te mislei en teen sy Vader in opstand te kom en homself sodoende Satan die Duiwel gemaak.

Gelukkig sal Satan die Duiwel op God se bestemde tyd vernietig word (Romeine 16:20). Intussen word Jehovah God se aanbidders oor Satan se planne ingelig en teen sy sette beskerm (2 Korintiërs 2:11; Efesiërs 6:11). Doen dus jou bes om ‘die Duiwel teë te staan, en hy sal van jou af wegvlug’.—Jakobus 4:7.

[Lokteks op bladsy 21]

Deur te besluit om ’n weg van verset teen God in te slaan, het ’n volmaakte engel homself Satan gemaak