’n Sinvolle lewe—Nou en vir ewig
JY KAN nou reeds ware sin in die lewe vind. Hoe? Deur die betroubare beginsels in God se Woord, die Bybel, te volg. Kom ons kyk na net ’n paar daarvan.
BYBELBEGINSEL: “Daar [is] niks beters nie”, het koning Salomo geskryf, as dat ’n mens “eet en inderdaad drink en sy siel die goeie laat sien weens sy harde werk”.—PREDIKER 2:24.
Ons is gemaak om bevrediging te put uit heilsame werk. Selfs in die slegste omstandighede kan jy nou al ’n mate van bevrediging uit die lewe put deur hard en eerlik te werk.
BYBELBEGINSEL: “Dit verskaf groter geluk om te gee as om te ontvang.”—HANDELINGE 20:35.
Baie het al gevind dat om dinge vir ander te doen—deur byvoorbeeld van hulle tyd en energie te gee om ander in moeilike tye by te staan—baie lonend is en hulle lewe werklik sinvoller maak. Salomo het geskryf: “Moenie die goeie terughou van dié aan wie dit toekom wanneer dit in die mag van jou hand is om dit te doen nie.”—Spreuke 3:27.
Beskou die voorbeeld van Ralph. Nadat hy afgetree het, het hy by sy vrou in die voltydse Christelike bediening aangesluit. Elkeen van hulle spandeer ’n goeie aantal ure elke maand in die bediening en gee van hulleself deur ander van die Bybel te leer. “Wanneer ons saans by die huis kom, is ons moeg, nie net omdat ons ouer word nie, maar omdat ons ons bes doen in ons diens aan ons hemelse Vader”, sê Ralph. “Dis ’n lekker moegheid!” Hy en sy vrou is gelukkig omdat hulle hulle daarop toespits om te gee.
BYBELBEGINSEL: “’n Ware metgesel het te alle tye lief en is ’n broer wat gebore word vir die tyd wanneer daar benoudheid is.”—SPREUKE 17:17.
Gedeelde leed is halwe leed. Die Engelse essayis Francis Bacon het geskryf dat ‘die wêreld bloot ’n wildernis is’ vir diegene sonder ware vriende. Om ware vriende te hê—en ’n goeie vriend te wees—kan die lewe vir jou draagliker maak; dit kan pragtig en bevredigend wees.
BYBELBEGINSEL: “Gelukkig is dié wat bewus is van hulle geestelike behoefte.”—MATTEUS 5:3.
Met hierdie woorde het Jesus ’n noodsaaklike vereiste geïdentifiseer as jy die vervulling van God se beloftes wil geniet—erken en voorsien in jou “geestelike behoefte”. In teenstelling met diere het ons ’n aangebore behoefte om die sin en doel van die lewe te verstaan. Slegs Jehovah God kan daardie behoefte bevredig, en hy doen dit deur middel van sy Woord, die Bybel. Soos ons in die vorige artikel gesien het, maak die Bybel God se voorneme met die aarde bekend. Dit sê vir ons waarom ons hier is, waarom daar soveel lyding is en wat God van ons verwag. ’n Begrip van hierdie skriftuurlike waarhede is noodsaaklik om ’n sinvolle, bevredigende lewe te lei. Diegene wat tyd maak om die Bybel te bestudeer en toepas wat hulle leer, is gelukkig. Waarom? Omdat hulle sodoende ’n vertrouensverhouding met ons Skepper, “die gelukkige God”, Jehovah, opbou.—1 Timoteus 1:11.
BYBELBEGINSEL: “Dink aan jou Skepper . . . voordat die moeilike tye kom en die jare aanbreek wanneer jy sal sê: ‘Ek sien geen doel daarin nie.’”—PREDIKER 12:1, THE NEW ENGLISH BIBLE.
Koning Salomo se raad aan jongmense, wat dalk nie besef watter tragedies die lewe kan bring nie, is op ons almal van toepassing. Maak jou Skepper die middelpunt van jou lewe. Dit is wat jou werklik ’n doel in die lewe sal gee. Verwerp die gesindheid: “Laat ons eet en drink, want môre gaan ons sterf” (1 Korintiërs 15:32). As jy God eerste stel, sal dit ‘goed afloop’ met jou, sê Prediker 8:12.
’n Meisie met die naam Wendi het gevind dat dit waar is. Toe sy nog jonk was, het sy en haar suster Spaans geleer sodat hulle na die Dominikaanse Republiek kon trek, waar meer verkondigers van die goeie nuus van die Bybel nodig was. “Ons het baie opofferings gemaak om te dien waar hulp nodig is, maar ons het dit verskriklik geniet. Ek sou daardie ses maande vir niks verruil nie! Die seëninge wat ons ontvang het, het die opofferings wat ons gemaak het, ver oortref.”
Lojaliteit aan God maak die lewe sinvol
As jy ’n goeie verhouding met Jehovah opbou, kan dit jou lewe op ’n baie spesiale manier sinvoller maak. Hoe? Satan het nie net vir Adam en Eva so ver gekry om teen God se heerskappy in opstand te kom nie, maar hy het ook te kenne gegee dat niemand onder beproewing aan God lojaal sal bly nie (Job 1:9-11; 2:4). Jy kan help om Satan ’n leuenaar te bewys! Hoe? Deur aan God lojaal te bly, deur sy beginsels te volg en deur te toon dat jy Jehovah se opperreg erken om te bepaal wat goed en wat sleg is vir ons.—Openbaring 4:11.
Ons sal dalk uitdagings moet verduur as ons ’n regskape weg wil nastreef. Sal daardie uitdagings ons van ’n sinvolle lewe beroof? Wel, stel jou voor dat ’n boosaardige vyand ons geliefde vriend of familielid belaster. Sou dit ons van ’n sinvolle lewe beroof as ons deur die toedoen van ons vyand ontberinge verduur omdat ons daardie dierbare persoon se naam verdedig? Natuurlik nie! In so ’n geval sal ons ontberinge met blydskap verduur. Dit geld ook wanneer dit by lojaliteit aan God kom. Ons lojaliteit onder die huidige bose toestande maak God se hart bly.—Spreuke 27:11.
’n Sinvolle lewe tot in alle ewigheid
Stel jou dit dus ten doel om soveel moontlik oor God en sy voorneme te leer. Jesus Christus self het gesê: “Dít beteken die ewige lewe, dat hulle kennis inneem van u, die enigste ware God, en van die een wat u uitgestuur het, Jesus Christus” (Johannes 17:3). Wanneer God sy oorspronklike voorneme met die aarde vervul, sal getroue mense geniet wat Jehovah oorspronklik vir hulle in gedagte gehad het—“die ewige lewe” op ’n paradysaarde. Dan sal die lewe werklik sinvol en bevredigend wees.—Psalm 145:16.
Waar kan jy die kennis vind waarvan Jesus gepraat het? In God se geïnspireerde Woord, die Bybel. As jy hulp wil hê om dit te doen, kan jy gerus aan die uitgewers van hierdie tydskrif skryf. Hulle sal met graagte reël dat iemand jou help om uit te vind wat die Bybel werklik leer.