Het jy geweet?
Wat is die “karmosynrooi stof” waarna daar dikwels in die boek Eksodus verwys word?
▪ Volgens die Bybelverslag het die kante en die poort van die tabernakel, Israel se eertydse sentrum van aanbidding, uit tentdoeke bestaan wat van “blou weefgaring en purperrooigekleurde wol en karmosynrooi stof en fyn gedraaide linnedraad” gemaak is (Eksodus 26:1; 38:18). “Die heilige klere” van die priesters moes ook van “karmosynrooi stof” gemaak word.—Eksodus 28:1-6.
Karmosyn, ook bekend as kermes, was ’n kleurstof waarmee materiaal helderrooi, of skarlakenrooi, gekleur kon word. Die kleurstof is uit die liggame van die wyfie-insekte van die familie Coccidae verkry. Hierdie vlerklose insekte word aangetref op die kermes-eik (Quercus coccifera), inheems in die Midde-Ooste en die Mediterreense kus. Die skarlakenrooi kleur is afkomstig van die eiers binne-in die liggaam van die wyfie. Op hierdie stadium lyk die insek, wat aan die blare en takkies van die kermes-eik vasgeheg is, soos ’n bessie, ongeveer die grootte en vorm van ’n ertjie. Nadat die insekte met die hand gepluk en fyngemaak is, lewer dit ’n skarlakenrooi, wateroplosbare kleurstof waarmee materiaal gekleur kan word. Die Romeinse geskiedkundige Plinius die Ouere het melding gemaak van karmosynrooi en gesê dat dit een van die gesogte kleure van sy dag was.
Watter van die skrywers van die Christelike Griekse Geskrifte was teenwoordig op Pinkster 33 HJ?
▪ Moontlik was ses van die agt manne wat hierdie deel van die Skrif geskryf het, teenwoordig.
Volgens die verslag in Handelinge het Jesus sy volgelinge beveel: “Moenie van Jerusalem af weggaan nie, maar hou aan om te wag op wat die Vader beloof het” (Handelinge 1:4). Dieselfde verslag dui aan dat die toekomstige Bybelskrywers Matteus, Johannes en Petrus aan hierdie opdrag gehoorsaam was en saam met ander dissipels “op dieselfde plek” vergader het. Jesus se halfbroers was ook daar (Handelinge 1:12-14; 2:1-4). Twee van hulle, Jakobus en Judas, het later die twee Bybelboeke geskryf wat hulle name dra.—Matteus 13:55; Jakobus 1:1; Judas 1.
In sy Evangelie praat Markus van ’n jong man wat op die aand van Jesus se inhegtenisname gevlug het. Hy het klaarblyklik na homself verwys, aangesien al die ander dissipels Jesus reeds verlaat het (Markus 14:50-52). Markus was dus blykbaar ’n vroeë dissipel, en dit is moontlik dat hy op Pinkster teenwoordig was.
Die ander twee skrywers van die geïnspireerde Christelike Griekse Geskrifte is Paulus en Lukas. Op Pinkster 33 HJ was Paulus nog nie ’n volgeling van Christus nie (Galasiërs 1:17, 18). Lukas was blykbaar ook nie teenwoordig nie, aangesien hy hom nie by die “ooggetuies” van Jesus se bediening ingesluit het nie.—Lukas 1:1-3.
[Prent op bladsy 22]
Die insekte waarvan die kleurstof gemaak word
[Erkenning]
Courtesy of SDC Colour Experience (www.sdc.org.uk)
[Prent op bladsy 22]
Petrus lewer ’n toespraak op Pinkster 33 HJ