Die leuen dat God naamloos is

WAT BAIE MENSE GLO

“Ons het nog geen eenstemmigheid bereik oor die kwessie of daar selfs iets ís soos ‘die’ naam van God nie, en as daar is, watter naam dit kan wees nie.”—Professor David Cunningham, Theological Studies.

DIE WAARHEID VOLGENS DIE BYBEL

God het gesê: “Ek is Jehovah. Dit is my naam” (Jesaja 42:8). Jehovah is ’n Hebreeuse naam wat “Hy laat word” beteken.—Genesis 2:4, voetnoot in NW.

Jehovah wil hê dat ons sy naam moet gebruik. “Roep sy naam aan”, sê die Bybel. “Maak onder die volke sy handelinge bekend. Meld dat sy naam hoog verhewe is.”—Jesaja 12:4.

Jesus het God se naam gebruik. Hy het in gebed vir Jehovah gesê: “Ek het u naam aan hulle [Jesus se dissipels] bekend gemaak en sal dit bekend maak.” Waarom het Jesus God se naam aan sy dissipels bekend gemaak? Hy het verder gesê: “Sodat die liefde waarmee u [God] my liefgehad het, in hulle kan wees en ek in eenheid met hulle.”—Johannes 17:26.

WAAROM DIT SAAK MAAK

“Iemand wat God nie by die naam ken nie, ken hom nie werklik as ’n persoon nie”, het die teoloog Walter Lowrie geskryf, “en hy kan hom nie liefhê as hy hom net as ’n onpersoonlike krag ken nie.”

’n Man met die naam Victor het elke week kerk toe gegaan, maar hy het gevoel dat hy God nie werklik ken nie. “Toe het ek geleer dat God se naam Jehovah is, en dit was soos om amptelik aan hom voorgestel te word”, sê hy. “Dit het gevoel asof ek uiteindelik die Een ontmoet het van wie ek al so baie gehoor het. Ek het hom as ’n werklike Persoon begin beskou en ’n vriendskap met hom opgebou.”

Jehovah kom op sy beurt nader aan mense wat sy naam gebruik. Met betrekking tot “dié wat aan sy naam dink”, belowe God: “Ek sal medelye met hulle betoon, soos ’n man medelye met sy seun betoon wat hom dien” (Maleagi 3:16, 17). Ook beloon God diegene wat sy naam aanroep. Die Bybel sê: “Elkeen wat die naam van Jehovah aanroep, sal gered word.”—Romeine 10:13.