ANTWOORDE OP BYBELVRAE
Sal die dooies weer lewe?
Die skepper van lewe kan die dooies beslis weer lewend maak
Jehovah God is die Bron van lewe (Psalm 36:9). Maak dit dan nie sin dat dieselfde God diegene wat gesterf het, weer kan laat lewe nie? Die Bybel verseker ons dat hy in die toekoms juis dit sal doen. (Lees Handelinge 24:15.) Maar waarom sal hy dit doen?
Ons Skepper wou oorspronklik gehad het dat die mens vir ewig op die aarde moet lewe (Genesis 1:31; 2:15-17). Dit is nog steeds wat hy vir die mensdom wil hê. Dit maak hom baie hartseer om te sien waarmee ons nou te kampe het—’n lewe vol probleme wat hopeloos te gou tot ’n einde kom.—Lees Job 14:1, 14, 15.
Waar sal die mense woon wat opgewek word?
Het God die mens geskep om in die hemel te woon? Nee. God het engele geskep om in die hemel te woon. Hy het mense geskep om op die aarde te woon (Genesis 1:28; Job 38:4, 7). Dink aan die mense wat Jesus opgewek het. Hy het hulle weer hier op die aarde laat lewe. Net so sal die meeste mense wat in die toekoms opgewek word, weer op die aarde woon.—Lees Johannes 5:28, 29; 11:44.
Maar God het ’n klein aantal mense gekies wat opgewek sal word om in die hemel te lewe, waar hulle geesliggame sal hê (Lukas 12:32; 1 Korintiërs 15:49, 50). Diegene wat ’n hemelse opstanding sal ontvang, sal saam met Christus as konings oor die aarde heers.—Lees Openbaring 5:9, 10.