Die nuttigste vergelyking wat jy kan maak

BESKOU jy jouself as ’n Christen? Indien wel, is jy een van meer as tweemiljard mense op aarde—amper 1 uit elke 3—wat bely dat hulle Christus volg. Daar is vandag duisende gelowe wat sê dat hulle Christelik is, maar hulle teenstrydige leerstellings en verskillende beskouings verdeel hulle. Daarom is daar dalk ’n groot verskil tussen jou oortuigings en dié van ander verklaarde Christene. Maak dit werklik saak wat jy glo? Ja, dit maak saak—as jy die Christelike godsdiens wil beoefen wat in die Bybel geleer word.

Die vroeë volgelinge van Jesus Christus het as “Christene” bekend gestaan (Handelinge 11:26). Daar was geen behoefte aan ander name om hulle te identifiseer nie, aangesien daar slegs een Christelike geloof was. Christene het die leringe en onderrigting van die Stigter van die Christelike godsdiens, Jesus Christus, eendragtig gevolg. Wat van jou kerk? Glo jy dat jou kerk leer wat Christus geleer het en wat die vroeë volgelinge van Christus geglo het? Hoe kan jy daarvan seker wees? Daar is slegs een manier—om die Bybel as ’n maatstaf te gebruik.

Dink hieraan: Jesus Christus het ’n diepe respek gehad vir die Skrif as die Woord van God. Mense wat die Bybel se leringe afgewater het deurdat hulle voorkeur gegee het aan mensgemaakte tradisies, het nie Jesus se goedkeuring gehad nie (Markus 7:9-13). Ons kan dus met sekerheid sê dat ware volgelinge van Jesus hulle oortuigings op die Bybel sal baseer. Dit sal dus goed wees as elke Christen hom afvra: ‘Stem die leringe van my kerk ooreen met wat die Bybel leer?’ Om hierdie vraag te beantwoord, kan jy gerus jou kerk se leringe vergelyk met wat die Bybel werklik sê.

Jesus het gesê dat ons aanbidding van God gegrond moet wees op waarheid— die waarheid wat in die Bybel gevind word (Johannes 4:24; 17:17). En die apostel Paulus het gesê dat ons slegs gered kan word as ons tot ’n “juiste kennis van die waarheid” kom (1 Timoteus 2:4). Dit is dus baie belangrik dat ons oortuigings op juiste Bybelwaarhede gegrond is. Ons lewe is op die spel!

HOE OM ONS OORTUIGINGS MET DIE BYBEL TE VERGELYK

Ons nooi jou om die ses vrae wat voorsien word te lees en te kyk wat die Bybel se antwoord op hierdie vrae is. Slaan die teksverwysings na en peins oor die antwoorde. Vra jou dan af: ‘Hoe vergelyk my kerk se leringe met wat die Bybel sê?’

Hierdie paar vrae kan jou help om ’n baie nuttige vergelyking te maak—die nuttigste vergelyking wat jy kan maak. Is jy bereid om ook van die ander leringe van jou kerk te vergelyk met wat die Bybel sê? Jehovah se Getuies sal jou met graagte help om die duidelike waarhede in die Bybel te ondersoek. Jy kan een van Jehovah se Getuies gerus vra vir ’n gratis Bybelstudie. Of jy kan ons webwerf, jw.org/af, besoek.

1 VRAAG: Wie is God?

ANTWOORD: Jehovah, die Vader van Jesus, is die ewige God en die almagtige Skepper van alles.

WAT DIE BYBEL SÊ:

“Ons dank God, die Vader van ons Here Jesus Christus, altyd wanneer ons vir julle bid.”—Kolossense 1:3.

“U is waardig, Jehovah, ja, ons God, om die heerlikheid en die eer en die krag te ontvang, want u het alles geskep.”—Openbaring 4:11.

Sien ook Romeine 10:13; 1 Timoteus 1:17.

2 VRAAG: Wie is Jesus Christus?

ANTWOORD: Jesus is die eersgebore Seun van God. Jesus is geskep en het dus ’n begin gehad. Jesus is onderdanig aan God en gehoorsaam Sy wil.

WAT DIE BYBEL SÊ:

“Die Vader is groter as ek.”—Johannes 14:28.

“[Jesus] is die beeld van die onsigbare God, die eersgeborene van die hele skepping.”—Kolossense 1:15.

Sien ook Matteus 26:39; 1 Korintiërs 15:28.

3 VRAAG: Wat is die heilige gees?

ANTWOORD: Die heilige gees is ’n krag wat God gebruik om sy wil te volbring. Dit is nie ’n persoon nie. Mense kan vervul word met heilige gees, en dit kan hulle krag gee om dinge te doen.

WAT DIE BYBEL SÊ:

“Toe Elisabet die groet van Maria hoor, het die kindjie in haar moederskoot gespring; en Elisabet is met heilige gees vervul.”—Lukas 1:41.

“Julle sal krag ontvang wanneer die heilige gees op julle kom.”—Handelinge 1:8.

Sien ook Genesis 1:2; Handelinge 2:1-4; 10:38.

4 VRAAG: Wat is die Koninkryk van God?

ANTWOORD: God se Koninkryk is ’n hemelse regering. Jesus is die Koning van God se Koninkryk. Binnekort sal hierdie Koninkryk God se wil op die hele aarde laat geskied.

WAT DIE BYBEL SÊ:

“Die sewende engel het op sy trompet geblaas. En daar het harde stemme in die hemel gekom wat sê: ‘Die koninkryk van die wêreld het die koninkryk van ons Here en van sy Christus geword, en hy sal vir ewig en altyd as koning heers.’”—Openbaring 11:15.

Sien ook Daniël 2:44; Matteus 6:9, 10.

5 VRAAG: Gaan alle goeie mense hemel toe?

ANTWOORD: Nee. ’n Beperkte groep getroue mense, wat ’n “klein kuddetjie” genoem word, is deur God gekies om hemel toe te gaan. Hulle sal saam met Jesus as konings oor die mensdom regeer.

WAT DIE BYBEL SÊ:

“Moenie vrees nie, klein kuddetjie, want julle Vader het dit goedgevind om aan julle die koninkryk te gee.”—Lukas 12:32.

“Hulle sal priesters van God en van die Christus wees en sal ... saam met hom as konings heers.”—Openbaring 20:6.

Sien ook Openbaring 14:1, 3.

6 VRAAG: Wat is God se voorneme met die aarde en vir die mens?

ANTWOORD: Onder God se Koninkryk sal die aarde ’n paradys word, en getroue mense sal volmaakte gesondheid, blywende vrede en eindelose lewe geniet.

WAT DIE BYBEL SÊ:

“Die sagmoediges sal die aarde besit, en hulle sal hulle inderdaad verlustig in die oorvloed van vrede.” —Psalm 37:10, 11.

“Hy sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie. Die vorige dinge het verbygegaan.”—Openbaring 21:3, 4.

Sien ook Psalm 37:29; 2 Petrus 3:13.