Dawid en Goliat​—Het dit werklik gebeur?

1 | Is dit werklik moontlik dat ’n man sowat 2,9 meter lank kan wees?

Die Bybel sê dat Goliat “ses el en ’n span” lank was (1 Samuel 17:4). Die el waarvan hier gepraat word, is 44,5 sentimeter; die span is 22,2 sentimeter. Dit beteken dat Goliat ongeveer 2,9 meter lank was. Party sê dat Goliat nie so lank kon gewees het nie, maar dink hieraan: In hedendaagse tye was die langste man waarvan ons weet, meer as 2,7 meter lank. Is dit werklik onmoontlik dat Goliat ongeveer 15 sentimeter langer was? Hy was uit die stam van die Refaïete, wat daarvoor bekend was dat hulle buitengewoon lank was. ’n Egiptiese dokument uit die 13de eeu VHJ sê dat party gevreesde soldate in Kanaän meer as 2,4 meter lank was. Al was dit ongewoon vir ’n man om so lank soos Goliat te wees, was dit nie onmoontlik nie.

2 | Was Dawid ’n werklike persoon?

Daar was ’n tyd toe geleerdes gesê het dat koning Dawid nie werklik bestaan het nie, maar dit word al hoe moeiliker om daardie stelling te bewys. Argeoloë het ’n eertydse inskripsie gevind wat melding maak van “die huis van Dawid”. Boonop het Jesus Christus van Dawid as ’n werklike persoon gepraat (Matteus 12:3; 22:43-45). Jesus se identiteit as die Messias word ondersteun deur twee uitvoerige geslagslyste wat toon dat hy van koning Dawid afgestam het (Matteus 1:6-16; Lukas 3:23-31). Dawid was beslis ’n werklike persoon.

3 | Het die gebeurtenisse in die verslag plaasgevind op ’n plek wat werklik bestaan het?

Die Bybel sê dat die geveg in die Elalaagvlakte, oftewel Elavallei, plaasgevind het. Maar dit gee selfs meer spesifieke besonderhede en sê dat die kamp van die Filistyne op ’n heuwel tussen twee dorpe, Sogo en Aseka, was. Die kamp van die Israeliete was op ’n heuwel aan die oorkant van die vallei. Het hierdie plekke werklik bestaan?

Kyk wat ’n onlangse besoeker aan die gebied sê: “Ons gids—wat nie ’n godsdienstige man was nie—het ons na die Elavallei geneem. Ons het met ’n paadjie opgeloop wat ons na die kruin van ’n heuwel geneem het. Terwyl ons oor die vallei uitgekyk het, het hy ons 1 Samuel 17:1-3 laat lees. Toe het hy na die vallei toe gewys en gesê: ‘Daar, aan julle linkerkant, lê die ruïnes van Sogo.’ Hy het gedraai en gesê: ‘Daar, aan julle regterkant, is die ruïnes van Aseka. Die Filistyne se kamp was tussen daardie dorpe, êrens op die heuwels hier voor julle. Ons staan dus moontlik op die plek waar die Israeliete se kamp was.’ Ek het daaraan gedink dat ek dalk op dieselfde plek staan waar Saul en Dawid gestaan het. Ons het teen die heuwel af geloop tot in die vallei, waar ons ’n rivierbedding oorgesteek het wat redelik droog en vol klippe was. Ek kon nie anders as om te dink aan hoe Dawid daar gebuk het om vyf gladde klippe op te tel, waarvan een Goliat doodgemaak het nie.” Hierdie besoeker was, soos baie ander, diep beïndruk deur die akkurate besonderhede in die Bybelverslag.

Daar is geen rede om te twyfel aan die egtheid van hierdie geskiedkundige verslag nie. Dit handel oor mense en plekke wat werklik bestaan het. Nog belangriker, dit is deel van God se geïnspireerde Woord. Dit kom dus van die God van waarheid, die Een wat “nie kan lieg nie”.—Titus 1:2; 2 Timoteus 3:16.