Hoe om ’n ware vriend te wees wanneer vriendskap in gevaar is
Gianni en Maurizio is al omtrent 50 jaar lank vriende. Hulle vriendskap was egter eens op ’n tyd in gevaar. “Gedurende ’n moeilike tyd in my lewe het ek ernstige foute gemaak wat ons vriendskap benadeel het”, verduidelik Maurizio. Gianni voeg by: “Maurizio het die Bybel met my gestudeer. Hy het ’n geestelike mentor vir my geword. Ek kon dus nie glo wat hy gedoen het nie. Dit was asof my hele wêreld in duie gestort het, want ek het geweet dat ons paaie sou skei. Ek het gevoel dat ek in die steek gelaat is.”
GOEIE vriende is kosbaar, en ’n blywende vriendskap ontstaan nie sommer vanself nie. Hoe kan ons ’n vriendskap wat in gevaar is, red? Ons kan baie leer by persone wat in die Bybel genoem word en wat ware vriende was, maar wie se vriendskap later in gevaar was.
WANNEER ’N VRIEND ’N FOUT MAAK
Dawid, die herder en koning, het beslis goeie vriende gehad. Jonatan was een van hierdie vriende (1 Sam. 18:1). Maar Dawid het ander vriende gehad, soos die profeet Natan. Die Bybel sê nie wanneer hulle vriendskap begin het nie. Maar Dawid het Natan in sy vertroue geneem, soos wat ’n mens net met ’n vriend sou doen. Dawid wou graag ’n huis vir Jehovah bou. Die koning het moontlik Natan se mening hoog op prys gestel as ’n vriend en as ’n man wat Jehovah se gees gehad het.—2 Sam. 7:2, 3.
Maar iets het gebeur wat hulle vriendskap in gevaar gestel het. Koning Dawid het egbreuk gepleeg met Batseba, en daarna het hy haar man, Uria, laat doodmaak (2 Sam. 11:2-21). Dawid was jare lank lojaal aan Jehovah en het regverdig opgetree. Maar toe pleeg hy hierdie ernstige sonde! Wat het fout gegaan met hierdie goeie koning? Kon hy nie sien hoe ernstig sy sonde is nie? Het hy gedink dat hy dit vir God kan wegsteek?
Wat sou Natan doen? Sou hy dit aan iemand anders oorlaat om met die koning te praat? Ander het ook geweet dat Dawid gereël het dat Uria doodgemaak word. Waarom sou Natan hierby betrokke raak en moontlik hulle jarelange vriendskap bederf? Dit kon selfs Natan se lewe in gevaar gestel het as hy iets sou sê. Dawid het immers reeds die onskuldige Uria laat doodmaak.
Maar Natan was God se woordvoerder. Die profeet het geweet dat sy vriendskap met Dawid nie meer dieselfde sou wees as hy sou stilbly nie, en sy gewete sou ook daaronder ly. Sy vriend Dawid het iets gedoen wat Jehovah nie goedgekeur het nie. Die koning het dringend hulp nodig gehad om sy verhouding met Jehovah te herstel. Ja, Dawid het ’n ware vriend nodig gehad. Natan was so ’n vriend. Hy het besluit om met Dawid te praat en ’n illustrasie te gebruik wat ’n herder se hart sou raak. Natan het God se boodskap op ’n manier oorgedra wat Dawid gehelp het om te besef hoe ernstig sy sonde was en wat hom beweeg het om op te tree.—2 Sam. 12:1-14.
Wat sal jy doen as jy ’n vriend het wat ’n groot fout begaan het of ’n ernstige sonde gepleeg het? Jy sal dalk geneig wees om te dink dat dit julle vriendskap sal benadeel as jy sy fout uitwys. Of jy dink dalk dat jy julle vriendskap sou verraai as jy sy sondige gedrag rapporteer aan die ouer manne, wat hom geestelik kan help. Wat sal jy doen?
Gianni, wat vroeër genoem is, vertel: “Ek het agtergekom dat iets verander het. Maurizio was nie so openhartig teenoor my soos voorheen nie. Ek het besluit om met hom daaroor te praat, al was dit vir my baie moeilik. Ek het gewonder: ‘Wat kan ek vir hom sê wat hy nie alreeds weet nie? Hy kan dalk sleg reageer!’ Maar toe ek gedink het aan alles wat ons saam gestudeer het, het dit my die moed gegee om met hom te praat. Maurizio het met my gepraat toe ek hulp nodig gehad het. Ek wou nie sy vriendskap verloor nie, maar ek wou hom help omdat ek vir hom omgegee het.”
Maurizio voeg by: “Gianni was opreg—en hy was reg. Ek het geweet dat die gevolge van my slegte keuses nie sy skuld was nie en ook nie Jehovah s’n nie. Ek het dus die dissipline aanvaar en mettertyd geestelik herstel.”
WANNEER ’N VRIEND DEUR ’N MOEILIKE TYD GAAN
Dawid het ander metgeselle gehad wat hom in moeilike tye lojaal ondersteun het. Husai was een van hierdie metgeselle (2 Sam. 16:16; 1 Kron. 27:33). Hy was moontlik ’n hofbeampte wat ’n persoonlike vriend en metgesel van die koning was, een wat soms vertroulike opdragte uitgevoer het.
Toe Dawid se seun Absalom die troon onwettig oorgeneem het, het baie Israeliete Absalom se kant gekies, maar nie Husai nie. Toe Dawid gevlug het, het Husai saam met hom gegaan. Dawid was diep seergemaak omdat sy eie seun en mense wat hy vertrou het, hom verraai het. Husai het egter lojaal gebly en was bereid om sy lewe in gevaar te stel en ’n opdrag uit te voer wat die sameswering sou dwarsboom. Husai het dit nie net gedoen omdat dit sy plig as hofbeampte was nie. Hy het getoon dat hy ’n lojale vriend was.—2 Sam. 15:13-17, 32-37; 16:15–17:16.
Dit is hartverblydend om te sien dat die band wat broers en susters vandag verenig, nie afhanklik is van ’n rol of ’n toewysing in die gemeente nie. Deur hulle optrede sê hulle eintlik: “Ek is jou vriend, nie omdat ek dit moet wees nie, maar omdat jy vir my belangrik is.”
Dit is wat ’n broer met die naam Federico ondervind het. Sy dierbare vriend Antonio het hom gehelp om deur ’n moeilike tyd te kom. Federico vertel: “Toe Antonio by ons gemeente aangesluit het, het ons gou vriende geword. Ons was albei bedieningsknegte en ons het dit geniet om saam te werk. Kort daarna is hy as ’n ouer man aangestel. Hy was nie net my vriend nie, hy was ook vir my ’n geestelike rolmodel.” Toe het Federico ’n misstap begaan. Hy het onmiddellik geestelike hulp gevra, maar hy kon nie meer as ’n pionier of bedieningskneg dien nie. Hoe het Antonio gereageer?
Toe Federico deur ’n moeilike tyd gegaan het, het sy vriend Antonio na hom geluister en hom aangemoedig
Federico vertel: “Ek kon sien dat Antonio verstaan hoe hartseer ek was. Hy het sy bes gedoen om my emosioneel by te staan. Hy wou graag hê dat ek geestelik moet herstel en het my nooit verlaat nie. Hy het my aangemoedig om weer geestelik sterk te word en nie moed op te gee nie.” Antonio verduidelik: “Ek het meer tyd saam met Federico deurgebring. Ek wou hê dat hy gemaklik moet voel om met my oor enigiets te praat, selfs oor sy hartseer.” Gelukkig het Federico mettertyd weer geestelik sterk geword en is hy later weer as ’n pionier en ’n bedieningskneg aangestel. Antonio sê ten slotte: “Al dien ons in verskillende gemeentes, is ons nou nader aan mekaar as ooit tevore.”
SAL JY VERRAAI VOEL?
Hoe sal jy voel as ’n hegte vriend sy rug op jou draai wanneer jy hom die nodigste het? Min dinge kan so seermaak. Sal jy hom kan vergewe? Sal julle vriendskap ooit weer so sterk wees soos voorheen?
Dink aan wat met Jesus gebeur het gedurende sy laaste dae op aarde. Hy het baie tyd saam met sy getroue apostels deurgebring, en daar was ’n spesiale band tussen hulle. Jesus het hulle sy vriende genoem (Joh. 15:15). Maar wat het gebeur toe hy in hegtenis geneem is? Die apostels het gevlug. Petrus het openlik gesê dat hy sy Heer nooit sal verlaat nie, maar op daardie einste nag het Petrus ontken dat hy Jesus ken!—Matt. 26:31-33, 56, 69-75.
Jesus het geweet dat hy alleen voor sy laaste toets te staan sou kom. Tog het hy rede gehad om teleurgesteld te wees en selfs seergemaak te voel. Maar in sy gesprek met sy dissipels ’n paar dae ná sy opstanding is daar geen spoor van teleurstelling, bitterheid of verwyt nie. Jesus het nie gedink dat dit nodig is om hulle tekortkominge te noem nie, selfs nie wat hulle gedoen het die nag toe hy in hegtenis geneem is nie.
Jesus het Petrus en die ander apostels eerder gerusgestel. Hy het getoon dat hy hulle vertrou deur hulle instruksies te gee vir die belangrikste onderrigtingswerk in die mensegeskiedenis. Jesus het die apostels nog steeds as sy vriende beskou. Sy liefde het ’n blywende indruk op hulle gemaak. Hulle sou hulle bes doen om hulle Heer nooit weer in die steek te laat nie. En hulle het die taak wat hy sy volgelinge gegee het, suksesvol uitgevoer.—Hand. 1:8; Kol. 1:23.
’n Suster met die naam Elvira kan nog goed onthou toe daar onenigheid tussen haar en haar dierbare vriendin Giuliana was. Elvira vertel: “Toe sy vir my sê dat sy seergemaak is oor wat ek gedoen het, het ek aaklig gevoel. Sy het die volle reg gehad om kwaad te wees. Maar wat my beïndruk het, was dat sy veral bekommerd was oor my en die gevolge van my gedrag. Ek sal altyd dankbaar wees dat sy nie gefokus het op wat ek aan haar gedoen het nie, maar eerder op hoe ek besig was om myself te benadeel. Ek het Jehovah gedank vir ’n vriendin wat meer besorg was oor my welsyn as oor haar eie gevoelens.”
Hoe sal ’n goeie vriend dus reageer wanneer ’n vriendskap in gevaar is? Hy of sy sal gewillig wees om liefdevol maar openhartig te praat wanneer dit nodig is. So ’n vriend sal wees soos Natan en Husai, wat selfs in moeilike tye lojaal gebly het, en soos Jesus, wat bereid was om te vergewe. Is jy so ’n vriend?