Bied die Goeie Nuus Aan—Op ’n manier wat persoonlike vreugde verskaf
1 Jehovah se volk het goeie rede om vreugdevol te wees. Ons het ’n werklike hoop vir die toekoms. Soos Jesaja 65:17,18 ons verseker, skep Jehovah “nuwe hemele en ’n nuwe aarde”. Dan voeg dit by: “Wees julle bly en juig vir ewig oor wat Ek skep; want kyk, Ek skep Jerusalem om te juig, en sy mense om bly te wees.”
2 Ons moet bowenal vreugde daaruit put om ons wonderlike hoop met ander te deel. Vind jy dat jou vreugde in die bediening beperk is? Onthou dan dat blydskap ’n vrug van die gees is. Dit kan deur inspanning aangekweek en vermeerder word. Harde werk kan vreugde verskaf, en groot vreugde kan ons selfs harder laat werk (Pred. 2:10). Kragtige inspanning kan beloon word met groter blyke van die vrugte van die gees.—2 Pet. 1:5-8; 1 Kor. 14:12.
3 Die geesdrif wat ons broers in hulle diens uitstraal, bevestig dat wat hulle doen vir hulle groot vreugde verskaf. Hoe kan ons ons aandeel in daardie vreugde vergroot? Een manier is deur te leer hoe om bevrediging uit ons toegewese werk te put ten spyte van die negatiewe reaksie van baie persone vir wie ons preek. Jeremia het baie teenkanting ervaar, en so ook Jesus; hulle het nie opgehou nie. Satan wil ons graag ontmoedig deur die onverskilligheid of teenkanting van ander. Maar soos Jesus verduidelik het, sal ons vreugde en geluk vind as ons ondanks teenkanting getrou volhard.—Matt. 5:11,12; Hebr. 12:2.
4 As ons verstaan dat die einde van hierdie stelsel naby is en dat daar min tyd oor is om ons werk in te verrig, sal dit ons beweeg om alles in ons vermoë te doen om die waarheid met ander te deel (Openb. 12:12, 17). As ons God en ons naaste waarlik liefhet, sal ons bediening ons vreugde verskaf omdat ons weet dat dit Jehovah behaag en ander help om die weg na die lewe te vind.
’N GAWE VAN GOD
5 Jy kan jou diens beskou as ’n gawe wat jy vir ander bring. Hierdie gawe is die vooruitsig op ewige lewe. Maar jy kan miskien die gawe aanlokliker maak vir mense wat nog nie die waarde daarvan besef nie deur die manier waarop jy dit aanbied. Berei jy jou aanbieding goed voor sodat dit belangstelling sal wek? As jy op ’n aangename en hoflike manier praat, en goed gekose woorde gebruik wat belangstelling wek, lok dit dalk ’n gunstige reaksie uit wat vir jou groter vreugde sal verskaf.
6 Die velddiens is ’n skat wat Jehovah vir ons gegee het. Dit stel ons in staat om ons geloof te toon. Ons moet ’n poging aanwend om met groter oortuiging met ander oor ons hoop te praat. As ons huisbewoners altyd in ’n goeie gemoedstemming probeer laat, maak dit hulle dalk ontvankliker wanneer die volgende Getuie besoek aflê, en dra ons sodoende tot sy vreugde by.
7 Onthou ook dat elke huisbewoner sy eie belangstellings in die lewe het. As ons persoonlike belangstelling in hom en sy gesin toon en wys hoe die Bybel hom kan help, sal ons dikwels hartlik ontvang word en ook die weg vir ’n herbesoek baan. Ons kan die vreugde wat ons uit sulke ondervindinge put met ander deel en hulle daardeur bemoedig (Hand. 15:3). En dink bowenal aan die vreugde wat ons vir die Een verskaf wat ons gestuur het!—Luk. 15:7, 10.