Kan jy help waar hulp nodig is?
1 Jesus het die behoefte aan meer Christenbedienaars beklemtoon toe hy gesê het: “Die oes is wel groot, maar die arbeiders min.” Hoewel dit vir Jesus se dag gegeld het, is die behoefte nou in hierdie tyd van die einde selfs groter. Uit gehoorsaamheid aan Jesus se bevel ‘bid ons dan die Here van die oes, dat Hy arbeiders in sy oes mag uitstuur’.—Matt. 9:37, 38.
HULP NODIG
2 Jehovah God seën voortdurend ons bediening met goeie vermeerdering in die veld, en dit is ’n uitdaging om nuwelinge op te lei (Matt. 28:19). Talle gemeentes in hierdie land dek hulle toegekende gebied gereeld, maar party het nog hulp nodig. Daar is groot gebiede wat nog nie aan enige gemeente toegewys is nie. Daar is steeds ’n dringende behoefte aan meer werkers.
3 Party gemeentes het ook ’n groot behoefte om geestelik versterk te word. Ouere manne, bedieningsknegte, sterk Christengesinne en pioniers kan in baie gemeentes gebruik word. Wanneer ’n gemeente sulke gewillige werkers kry, word die broers versterk en loop dit dikwels op uitbreiding uit.
HOE KAN ONS IN HIERDIE BEHOEFTES VOORSIEN?
4 Dit sal goed wees as die ouere manne in die gemeentes wat hulp nodig het eers die omstandighede ontleed. Wat is die plaaslike behoeftes? Wat kan die gemeentelede doen om in hierdie behoeftes te voorsien? Kan party hulle deelname aan die velddiens vergroot? Kan meer as hulp- of gewone pioniers dien? Strewe die gedoopte broers na diensvoorregte en word hulle vermoëns ten volle benut? Kan die ouere manne en bedieningsknegte moontlik ’n selfs beter voorbeeld van ywer vir die bediening stel? Sal party in die gemeente tot groter bedrywigheid beweeg word as hulle hartliker en liefdevoller aangespoor en geprys word?
5 Bespreek die situasie daarna met die kringopsiener. Hy sal moontlik sinvolle voorstelle hê oor wat in die gemeente gedoen kan word om in plaaslike behoeftes te voorsien. Of hy weet dalk van ander gemeentes of pioniers in die kring wat kan help. Indien wel, sal hy julle help om met hulle in aanraking te kom. As daar geen hulp in die kring beskikbaar is nie, kan die kringopsiener of die plaaslike ouere manne aan die Genootskap skryf en die omstandighede en behoeftes verduidelik.
6 Gestel julle gemeente dek sy gebied dikwels of daar is genoeg ouere manne, bedieningsknegte of pioniers om na die plaaslike behoeftes om te sien. Kan party elders gaan help waar hulp nodig is? Dit sal goed wees as individue en gesinne hulle eie geestelike vermoëns, bates en potensiaal ondersoek. Sal dit moontlik wees om ’n tydelike toewysing in ontoegekende gebied te aanvaar of dalk te verhuis om ’n gemeente waar daar min werkers is permanent te gaan help? Gaan Ons Koninkryksbediening onder “Plekke waar hulp nodig is” gereeld na om te sien waar hulp nodig is en oorweeg die saak biddend.
7 Diegene wat ’n tydelike toewysing kan aanvaar of permanent kan verhuis, moet die Genootskap per brief in kennis stel dat hulle beskikbaar is. So ’n brief moet aan die Gemeentelike Dienskomitee gegee word sodat hulle hul aanbevelings kan doen en dit aan die Genootskap kan stuur.—Kyk Ons bediening, bladsye 112,113.
8 Dit is baie verstandig om eers die koste te bereken voordat ’n mens verhuis (Luk. 14:28). Onthou dat die dorpe klein is in die meeste gebiede waar hulp nodig is, dat sekulêre werk dikwels skaars is en dat daar nie altyd iemand sal wees om saam met jou velddiens te doen nie. By vergaderinge sal jy dikwels ’n deel op die program hê, en die gehalte van die vergaderinge sal dalk nie wees waaraan jy gewoond is nie. ’n Opregte begeerte om te help en innige liefde vir jou broers is noodsaaklik. Dit is noodsaaklik dat ons die betekenis van selfopoffering besef. Voldoen jy aan die vereistes? Die behoefte is daar! Kan jy help?—Jes. 6:8.