Gaan jy binnekort die pionierdiens betree?
1 Ongeveer hierdie tyd verlede jaar het baie van ons broers en susters dit biddend oorweeg om die gewone pionierdiens te betree. Sorgvuldige beplanning het party gehelp om Jehovah op hierdie spesiale manier te begin dien, en dit het die pioniergeledere van 2,027 in Augustus 1985 tot 2,172 in September laat toeneem, ’n vermeerdering van 145. Tel jy onder diegene wat daaraan dink om die gewone pionierdiens gedurende die 1987-diensjaar te betree?
BEPAAL JOU OMSTANDIGHEDE
2 Die opwindende rapporte van onlangse teokratiese uitbreiding het moontlik ’n begeerte by jou aangewakker om ’n groter aandeel te hê in die oeswerk wat nou aan die gang is (Matt. 9:37, 38; Jes. 60:22). Goed so! Om dit te verwesenlik, moet jou begeerte egter gepaard gaan met sorgvuldige beplanning en volkome vertroue op Jehovah (Rom. 12:1; Luk. 14:28). As jy jou omstandighede opnuut in oenskou neem, sal dit jou dalk help om te sien watter aanpassings nodig is om ’n voltydse bedienaar te word. Kan jy jou sekulêre werk aanpas sodat jy ’n pionier kan word? Kan jy jou lewenswyse vereenvoudig sodat jy meer tyd en energie vir Jehovah se werk sal hê? (Luk. 11:34). Deur as ’n span saam te werk, kon party gesinne al een of meer van hul lede ondersteun in die pionierdiens.
VERGROOT JOU GELOOF EN YWER
3 Dit verg sterk geloof om die gewone pionierdiens te betree en daarin te volhard. Indien jy wil hê dat jou geloof moet toeneem, moet jy beplan om ekstra tyd in die predikingswerk deur te bring, en dan sal jy Jehovah se hulp ondervind (2 Thess. 1:3). Hulppionierdiens was al vir talle ’n stapsteen tot gewone pionierdiens. Dit kan moontlik ook vir jou geld.
4 Jou ywer sal toeneem namate jou geloof groei. As jy reël om so gereeld moontlik saam met gewone pioniers te werk, sal hulle voorbeeld van ywer en die vreugde wat hulle uitstraal jou aan spoor om voort te gaan met jou planne om ’n gewone pionier te word. Ervare pioniers kan jou help om ’n praktiese rooster vir pionierdiens op te stel.
5 Dit sal goed wees as diegene wat die pionierdiens oorweeg hulle planne met die ouere manne bespreek (Spr. 15:22). Hulle kan praktiese en nuttige wenke aan die hand doen.
JONGMENSE —BEPLAN VERSTANDIG VIR DIE TOEKOMSI
6 Talle jonger broers en susters gaan binne ’n paar maande hulle hoërskoolloopbaan voltooi. Julle dink ongetwyfeld baie ernstig aan julle toekoms. Terwyl julle sulke planne maak, moet julle beslis ‘aan julle Skepper dink’ en aan sy tydige raad oorweging skenk. Dink ernstig na oor wat hy vir die aarde en die gehoorsame mense voorhet (Pred. 12:1). As jy die pionierdiens betree, sal dit jou help om die najaging van minder belangrike strewes te vermy wat jou aandag van jou ware doel in die lewe kan aftrek (Spr. 10:22). Mag die vreugde en tevredenheid wat jy in die voltydse diens ervaar terwyl jy “smaak en sien dat die Here goed is” jou beweeg om dit ’n lewensloopbaan te maak.—Ps. 34:9.
7 Ons waardering vir Jehovah behoort ons te beweeg om ons uiterste bes in sy diens te doen. Dit kan beteken dat diegene wie se omstandighede dit toelaat die pionierdiens moet betree. Maar ander se omstandighede laat dit dalk op hierdie tydstip nie toe nie. Ons almal kan egter tot Jehovah bid oor die saak en derhalwe toon dat ons die pioniergees het. Party wat tans as gewone pioniers dien, het eens op ’n tyd gedink dat hulle nie pioniers kan wees nie. Omstandighede kan egter verander of verander word as ons ons begeerte kombineer met sorgvuldige beplanning en opregte gebed tot Jehovah om sy seën op ons pogings om hom op die beste manier moontlik te dien (Spr. 16:3; Mal. 3:10). Mag ons almal daardie doel nastreef en verstandig vir die toekoms beplan.