Bied die Goeie Nuus Aan—Deur by tuisbybelstudies te onderrig
1 Een van die vreugdevolste ondervindinge wat ons in ons bediening kan hê, is om ander te leer om ware Christene te wees net soos Jesus ons beveel het (Matt. 28:19, 20). Smaak jy hierdie vreugde?
2Hoewel ons daarna streef om in elke aspek van ons bediening onderrigters te wees, bied tuisbybelstudies die grootste geleentheid om te onderrig. Maak dit dus ’n saak van gebed en ’n doelwit as jy nie gereeld ’n tuisbybelstudie hou nie.
KAN JY DIT DOEN?
3 Tyd en sorgvuldige studie is nodig vir ’n persoon om oortuig te word van die Bybel se boodskap oor God se Koninkryk (Matt. 10:11). Daarom het ons die tuisbybelstudiereëling. Dit is ’n omvattende studiekursus van talle onderwerpe wat logies in die Genootskap se publikasies uiteengesit word. Deur gereeld ’n tuisbybelstudie met behulp van een van ons studiehulpe te hou, kan die oorgrote meerderheid van ons opregte studente help om tot kennis van God en Christus te kom.—Joh. 17:3; 1 Joh. 5:20.
4 Jesus Christus was ’n meesteronderrigter; ons moet derhalwe sy metodes leer en gebruik. Hoe het hy onderrig? Hy het oordeelkundige vrae gestel (Matt. 17:24-26; Luk. 10:25-36). Waarom het hy dit gedoen? Om mense te help redeneer en hulleself in die lig van sy leer te ondersoek. Met sy vrae het hy taktvol hulle harte bereik. Diegene wat hy onderrig het, moes toon of hulle werklik sy volgelinge wou wees en of hulle beweegredes opreg was.—Matt. 13:10-17; Mark. 8:34-38.
5 Daarbenewens het Jesus met behulp van illustrasies en aanskouingslesse onderrig; hy het ook ander doeltreffende metodes gebruik (Matt. 4: 18, 19; Luk. 15:3-10; Joh. 13:2-16). Hy het dinge ook eenvoudig, bondig en duidelik gestel (Mattheüs, hoofstukke 5-7). Ons kan dankbaar wees dat die Genootskap se publikasies dieselfde onderrigmetodes gebruik.
6 Berei goed voor vir die studie. Dink na oor dele wat die studente dalk moeilik sal verstaan, punte waaroor hulle waarskynlik vrae sal stel en sake van spesiale belang sowel as oor punte wat in ons daaglikse lewe van toepassing is.
HOE OM BY ’N STUDIE TE ONDERRIG
7 ’n Gevestigde studie moet met gebed geopen word. Jou gebed om Jehovah se leiding en seën sal die erns en waardigheid van die studie beklemtoon en toon dat jy ’n opregte dienaar van God is. ’n Kort hersiening van die vorige les kan gepas wees en die huidige studie inlei.
8 Talle van die Bybelstudiehulpe wat ons in die bediening gebruik, het vrae vir elke paragraaf. Dit is ’n leermiddel wat studente kan help om hulleself in hulle eie woorde uit te druk. As die korrekte antwoord op die vraag nie verstrek word nie, kan jy die vraag parafraseer. Maar moenie die studie in ’n raaispeletjie verander nie. Dit verg redeneervermoë en logika om die waarheid te leer.
9 Die studie duur gewoonlik een uur. ’n Hoofstuk kan dikwels gedek word, maar dit hang af van die vermoë van die student. Moedig studente aan om voor te berei en in hulle eie woorde te antwoord. Hou by God se Woord wanneer jy onderrig (Tit. 1:9). Dit is God se Woord wat krag het en mense tot optrede sal aanspoor (Hebr. 4:12). Soos tyd toelaat, kan sleuteltekste ook nageslaan en gelees word.
’N WONDERLIKE VOORREG
10 Dit is ’n wonderlike voorreg om die waarheid omtrent Jehovah God, Jesus Christus en die Koninkryk aan ander te leer (1 Kor. 3:6-9). Daar is verlede jaar elke maand gemiddeld 29,060 tuisbybelstudies in hierdie land gehou! Mag Jehovah God ons gebede verhoor en ons pogings seën om onderrigters by tuisbybelstudies te wees.