‘Vind verkwikking vir julle siele’
1 ’n Man wat vermoeid en belas is, is geneig om verkwikking te soek deur ’n verandering aan te bring. Dit is wat Jesus Christus mense nooi om te doen. Almal wat Jesus se “juk” op hulle neem en sy dissipels word, ‘vind werklik verkwikking vir hulle siele’.—Matt. 11:28-30, NW.
2 Talle van ons is ongetwyfeld baie besig om daagliks na noodsaaklike dinge om te sien. Gesinshoofde moet op eerlike wyse vir hulle gesin sorg. Huisvrouens is met talle daaglikse take doenig. Selfs die kinders is besig met skool, huiswerk en takies. Ons is inderdaad baie besige mense. Wat is dit wat ons egter verkwik en gelukkig maak? Is dit nie om ’n gereelde en sinvolle deel aan gemeentelike vergaderinge en velddiens te hê nie?
CHRISTUS SE JUK VERKWIK
3 Jesus se uitnodiging in Mattheüs 11:29 kan soos volg vertaal word: “Kom saam met my onder my juk en word my dissipels” (Voetnoot in Rbi8). Christus se juk wat ons genooi word om op te neem, beteken dus ’n lewe van algehele toewyding aan God as dissipels van Jesus Christus (Matt. 16:24-26). Maar hoe verkwik dit die siel?
4 Die verkwikking wat ons ontvang, is hoofsaaklik innerlike geluk met die versekering dat ons, as dissipels van Christus, ’n intieme verhouding met Jehovah God het. Dit is die gemoedsrus wat ons geniet omdat ons die waarheid ken en daders van die werk is (Jak. 1:25). Dit is ’n kalm hart en vergenoegdheid in die lewe wat alle verstand te bowe gaan.—Joh. 14:27; Filip. 4:6, 7.
5 In die Christengemeente word die teokratiese beginsel van hoofskap gehandhaaf. Dit weerspieël die feit dat ‘God nie ’n God van wanorde is nie, maar van vrede’ (1 Kor. 14:33). Verkwikkende vrede en orde word duidelik in ons gemeentelike vergaderinge gesien. Hoewel broers en susters na ’n hele dag se werk dalk uitgeput is, weet hulle uit ondervinding dat hulle by die gemeentelike vergaderinge verkwik sal word. Hulle besef ook dat as hulle betyds is en aan die vergaderinge deelneem hulle tot die vrede en verkwikking van ander bydra.—Spr. 10:22; Jes. 48:17.
6 Teokratiese huishoudings verskaf ook verkwikking en word deur Jehovah geseën. Ouers wat let op die bedrywighede, gedrag en behoeftes van hulle kinders kan hulle geestelik versterk deur ’n gereelde gesinsbybelstudie en gereelde bywoning van vergaderinge (Ef. 6:4). Ouers en ander kan die kinders in velddiens oplei en hulle help om die vreugde te smaak om die waarheid met ander te deel. Die eerste Sondag van die maand is ’n uitstekende geleentheid vir die hele gesin om saam in velddiens uit te gaan. Mans en vaders is ’n bron van verkwikking wanneer hulle die leiding in geestelike sake gee (1 Kor. 11:3). Dit sluit toesig oor reëlings vir studie en diens sowel as ontspanning in. Vrouens en moeders kan baie uitrig deur ten nouste saam te werk met hierdie reëlings en dit te ondersteun. Die gevolg sal teokratiese orde en verkwikking vir almal wees.—Ef. 5: 22; 6:2, 3.
7 Deur Jehovah God en Jesus Christus na te volg, verkwik alle ware dissipels ander met die waarheid en toon hulle persoonlike besorgdheid teenoor almal “wat vermoeid en belas is”. Jy moet nie net bedagsaamheid teenoor mede-Christene toon nie, maar ook teenoor die mense in jou gebied en waar jy ook al gaan (Matt. 5:43-45; Openb. 22:17). Wees ywerig in die Christenbediening. Aanvaar Christus se uitnodiging en ‘vind verkwikking vir julle siele’.