Bied die Goeie Nuus Aan—Met die Redenering-boek
1 Elkeen van ons wil “die woord van die waarheid reg sny” (2 Tim. 2: 15). Die Woord is “die swaard van die Gees” wat in die hande van Jehovah se volk kragtige, hooghartige redenasies kan vernietig (Ef. 6:17; 2 Kor. 10:4, 5, NAV). Wat ’n waardevolle instrument is die Redenering-boek tog nie in ons pogings om mense te help nie!
2 Ons het talle geleenthede om die praktiese wenke in die Redenering-boek te gebruik. Daar is nie net goeie inleidings op bladsye 9-15 nie, maar op die daaropvolgende bladsye is daar uitstekende wenke wat ons help om opregte vrae te beantwoord en moontlike gesprekdempers te oorkom. Watter een het jy nuttig gevind om ’n gesprek oor die toekoms voort te sit?
3 Tydskrifartikels kan vrae by die huisbewoner uitlok. Indien gepas, kan jy die gesprek voortsit en gedagtes uit die Redenering-boek gebruik onder opskrifte soos “Armageddon”, “Bybel”, “Koninkryk”, “Laaste dae” of “Regering”. Of as iemand sê: “Hierdie dinge sal nie in my lewe gebeur nie”, kan jy blaai na bladsy 254 waar dit sê: “Maar dit gaan in iemand se lewe kom, nie waar nie? . . . Sou enigiemand in staat wees om te weet dat sy geslag die een is wat dit gaan sien? Jesus se eie dissipels wou dit graag weet, en die antwoord wat hy hulle gegee het, is vir ons vandag baie betekenisvol” (Luk. 21:29-32). Of jy wil dalk die informasie op bladsy 259 of bladsy 267 gebruik. Jou kort, bevredigende kommentare kan die weg baan vir ’n herbesoek. Wat ’n skatkamer van informasie is daar tog vir ons beskikbaar!
4 Party persone spreek dalk twyfel uit oor die feit dat God iets gaan doen om sake te verander. Ons kan met hulle redeneer deur die punte onder “Goddeloosheid” op bladsye 170 en 171 te gebruik. Vestig dan hulle aandag op hoofstuk 9 in die Ware vrede-boek.
5 Diegene wat die Redenering-boek gebruik, geniet goeie ondervindinge. Een broer wat straatwerk gedoen het, het ’n gesprek met ’n verbyganger aangeknoop. Die man het vrae gevra, soms op ’n stryerige manier. Nadat hy ’n aantal van die man se vrae beantwoord het, het die broer besluit om van die Redenering-boek gebruik te maak. Hy het eenvoudig uit die gepaste gedeelte gelees en af en toe gesê: “Dit is interessant, nie waar nie?” Die man se gesindheid het dadelik verander. Hy het nou die feite in druk gesien, en dit het die verskil gemaak. Voordat hy geloop het, het hy selfs gevra waar ons vergaderinge gehou word. Dit het alles in ’n besige straat plaasgevind.
6 Ons gebruik van die Redenering-boek kan soortgelyke goeie resultate oplewer. Raak vertroud met die inhoud. Gebruik dit in die veld. Probeer om ‘altyd bereid te wees om verantwoording te doen aan elkeen wat van julle rekenskap eis omtrent die hoop wat in julle is’.—1 Pet. 3:15.