Vereenvoudiging—help ons om ons ‘van die belangriker dinge te vergewis’
1 Stem julle saam dat ons as Christene ‘baie te doen het in die werk van die Here’? (1 Kor. 15:58, NW). Julle het ongetwyfeld ’n vol teokratiese rooster wat persoonlike en gesinstudie, die bywoning van Christenvergaderinge en die verkondiging van die goeie nuus insluit. Daarbenewens sien julle moontlik na verskeie sekulêre aangeleenthede om. Onnodige bedrywighede kan soms baie van ’n mens se tyd of geld in beslag begin neem. Groter verantwoordelikhede kan ontstaan, wat vereis dat ons ons tyd en bates beter benut. As dit gebeur, is dit verstandig van ’n gesin om te kyk wat hulle kan doen om hulle ‘van die belangriker dinge te vergewis’.—Filip. 1:10, NW.
2 Dieselfde situasie heers in die huis van God omdat ons wêreldwye gesin so vinnig groei (1 Tim. 3: 15). Die Bestuursliggaam het dit nodig en verstandig geag om ’n vereenvoudigingsprogram in te voer. Stappe word gedoen om die organisasie as’t ware ‘oop te span’ sodat daar plek is vir die talle nuwelinge, terwyl ons almal steeds van die noodsaaklike geestelike dinge voorsien word.—Jes. 54:1-3; Matt. 24:45-47.
3 Die byvoegsel tot Ons Koninkryksbediening vir Augustus 1986 het verduidelik hoe ’n vereenvoudigde rapporteerreëling vir gewone pioniers in September 1986 in werking sou tree. Ons is bly om julle mee te deel dat dit ’n goeie uitwerking hier by die takkantoor gehad het. Die nuwe reëling het reeds baie van die werk van party van ons kantoorwerkers uitgeskakel sodat hulle na ander belangrike sake kan omsien.
JAARLIKSE KRINGBYEENKOMS
4 Die Genootskap het alle gemeentes per brief meegedeel dat elke kring met ingang van September 1987 een kringbyeenkoms per jaar sal hê. Hierdie wysiging hou talle voordele in. Geen kring, ook nie die wat Byeenkomssale gebruik nie, sal ’n kringbyeenkoms net ’n paar weke voor of na hulle aangewese streekbyeenkoms hê nie. Die Byeenkomssale sal sommige maande glad nie gebruik word nie, waartydens die nodige instandhoudingswerk gedoen kan word. Daar sal tyd tussen kringbyeenkomste wees om van tyd tot tyd die Pionierdiensskool asook die Koninkryksbedieningskool te hou. Kringopsieners en gemeentelike ouere manne sal ekstra tyd hê om na ander teokratiese verantwoordelikhede om te sien. Die streekopsiener sal, nadat hy die kring tydens die byeenkomsweek of -weke gedien het, ’n week saam die kringopsiener kan deurbring terwyl hy ’n gemeente besoek. Hierdie reëling hou ook in ander opsigte voordele in.
SPESIALE BYEENKOMSDAG
5 Die afgelope paar jaar het ’n aantal kringe in hierdie land elke jaar ’n spesiale vergadering gehad waartydens ’n lid van die Takkomitee as spreker opgetree het. By sulke geleenthede is ’n program van een en ’n half uur aangebied. Die Genootskap wysig nou hierdie reëling sodat elke kring of gedeelte van ’n kring met ingang van September 1987 ’n spesiale byeenkomsdag kan hê.
6 Die kringopsiener sal gemeentes in sy kring in kennis stel van die datum wat die Genootskap vir hierdie geleentheid bepaal het. Dit sal op ’n tyd gedurende die jaar wees wat nie te na aan die datum van julle gewone kringbyeenkoms of die streekbyeenkoms is nie. Kringe wat by ’n Byeenkomssaal bymekaar kom, sal die saal of op ’n Saterdag of op ’n Sondag kan gebruik. Dit beteken dat twee verskillende kringe of twee gedeeltes van dieselfde kring, waar moontlik, die Byeenkomssaal gedurende een naweek kan gebruik.
7 As kringe nie ’n Byeenkomssaal tot hulle beskikking het nie, kan ’n hele kring vir ’n spesiale byeenkomsdag bymekaarkom, mits dit vir al die gemeentes gerieflik is en daar fasiliteite gevind kan word wat groot genoeg is. In party van die groter stedelike gebiede waar geen Byeenkomssaal beskikbaar is nie, kan twee of, hoogstens, drie kringe vir hierdie doel bymekaarkom.
8 Die jaarlikse spesiale byeenkomsdag sal broers nog ’n uitstekende geleentheid bied om opbouende onderrigting te ontvang en mekaar aan te spoor (Hebr. 10:24, 25). Skriftuurlike informasie wat vir ons tyd nodig is, sal onder leiding van die Genootskap deur toegewese sprekers aangebied word. In baie gevalle sal dit vir sekere bekwame broers van Bethel moontlik wees om saam met plaaslike reisende opsieners en ander bekwame ouere manne in die kring aan die program deel te neem. Julle sal ook bly wees om te verneem dat daar op hierdie byeenkomsdae reëlings vir doop getref sal word. Daar sal dus steeds elke jaar drie geleenthede wees waartydens persone wat hulle aan Jehovah God toegewy het en die vrae in die Ons Bediening-boek met die ouere manne hersien het, gedoop kan word.
VEREENVOUDIGDE VOEDSELREËLINGS
9 Ons waardeer die uitstekende liefdewerk wat duisende van ons broers en susters deur die jare heen verrig het om kafeteriamaaltye by kringbyeenkomste te voorsien. In ooreenstemming met die beginsels om ons ‘van die belangriker dinge te vergewis’ en ons ‘oog reg te hou’, meen ons egter dat dit gepas sal wees om ’n vereenvoudigde voedselreëling met ingang van September 1987 by kringbyeenkomste en spesiale byeenkomste in te voer.—Filip. 1:10, NW; Matt. 6:22.
10 Die vereenvoudigde voedselreëling sal dieselfde wees as die by streekbyeenkomste. Danksy ’n vereenvoudigde spyskaart en opdienprosedure sal dit nie meer nodig wees dat duisende broers baie ure daaraan bestee om ’n verskeidenheid voedselitems aan te koop, die voedsel voor die sessies voor te berei en dan daarna op te was nie. Die meeste van hierdie broers het gedurende die week reeds sekulêre werk gedoen. Sal dit nie vir hulle beter wees om hierdie tyd oor die naweek te gebruik om geestelike dinge in te neem deur na die program te luister nie? Ja! Ons almal het die geestelike verkwikking nodig sodat ons nie moeg word om Jehovah se wil te doen nie.—Hebr. 12:3; Jes. 40:29-31.
11 Tydens die heilige samekomste gedurende eertydse Israel se jaarlikse feeste mag die mense geen swaar werk gedoen het nie behalwe om vir die fees voor te berei, wat die voorbereiding van voedsel vir die feesgangers ingesluit het. Maar Jehovah het uitdruklik die volgende oor voedsel gesê: “Net wat deur elkeen geëet moet word, dit alleen mag deur julle berei word” (Ex. 12:16; Lev. 23:6-8; ad bl. 375, 574). Die hoofdoel van daardie eertydse byeenkomste was dieselfde as die van ons byeenkomste vandag, naamlik om ons aandag op Jehovah God te vestig en geestelik opgebou te word met so min steurnis moontlik. Dit is inderdaad “die belangriker dinge”. Jesus se woorde aan Martha by ’n
bepaalde geleentheid bevat dieselfde gedagte. Hy het van voedsel gepraat en gesê: “Een ding is nodig” (Luk. 10:38-42). Ons vertrou dat die vereenvoudigde voedselreëling ons almal sal help om seker te maak dat ons die grootste voordeel uit ons byeenkomste trek.
KAN JY JOU LEWE VEREENVOUDIG?
12 Die voorgaande informasie toon dat Jehovah se organisasie so vereenvoudig word dat dit gedurende hierdie baie besige tyd van die einde doeltreffender kan vooruitgaan. “Die tyd is kort”, en honderdduisende voeg hulle nou by ons in die wedloop om die ewige lewe in ’n regverdige nuwe stelsel (1 Kor. 7: 29). Net soos ’n hardloper in ’n wedloop van alle onnodige laste ontslae raak, betaam dit ons almal om te kyk wat ons as individue kan doen om ons lewe te vereenvoudig. Paulus vermaan: “Laat ons ook elke las aflê en die sonde wat ons so maklik omring, en met volharding die wedloop loop wat voor ons lê” (Hebr. 12:1). Wat materiële dinge of wêreldlike strewes betref, kan ons ons afvra: ‘Is dit iets wat ek nodig het om aan die lewe te bly en Jehovah te dien? Sal dit my help om ’n beter kneg van Jehovah te word, of sal dit my terughou?’
13 As ons die goeie voorbeeld van Jehovah se organisasie volg deur ons tyd en geld so goed moontlik te benut om Koninkryksbelange te bevorder en Jehovah se naam te verheerlik, kan ons met vertroue verwag om die wedloop om die lewe te wen en die wonderlike seëninge te ontvang wat Jehovah in die naaste toekoms en tot in alle ewigheid vir sy knegte voorhet!—Vergelyk 1 Korinthiërs 9:24-26.