Hulppionierdiens—Het jy dit al probeer?
1 Die huidige hulppionierreëling is nou in sy 11de jaar. Sedert dit in September 1976 ingestel is, het honderdduisende van ons broers en susters daaraan deelgeneem. Duisende van hulle tref reëlings om gedurende sekere maande van elke jaar hulppionierdiens te doen. Ander kon lang tydperke aaneen as hulppioniers dien. Almal het die geleentheid gehad om geestelik daarby te baat, nader aan Jehovah te kom en bekwamer bedienaars van die goeie nuus te word.
2 In September 1976, die eerste maand van hierdie reëling, het 351 gerapporteer; dit was 90 meer as die tydelike pioniers wat die vorige maand gerapporteer het. Geesdrif vir die hulppionierdiens het so toegeneem dat ’n hoogtepunt van meer as 5 700 in April 1985 bereik is. Daar was nie heeltemal soveel in April 1986 nie, omdat baie voormalige hulppioniers die gewone pionierdiens betree het. Meer as 4 500 het nietemin gerapporteer, die tweede hoogste getal hulppioniers wat nog gedurende een maand ingeskryf het.
3 Hulppionierdiens was al vir baie ’n stapsteen tot voorregte soos die gewone pionierdiens en Betheldiens. Maar sal jy nie, selfs al laat jou huidige omstandighede jou nie toe om ’n ander vorm van die spesiale diens te betree nie, graag in die vreugde wil deel wat talle as hulppioniers smaak nie?
BAIE HET DIT AL GEDOEN
4 Is jy ’n ouer wat nog kinders in die huis het? Moet jy voltyds werk om vir jou en jou gesin te sorg? Is jy dalk bejaard, of het jy fisiese beperkinge? Moenie gou tot die slotsom kom dat, hoewel jy graag hulppionierdiens sal wil doen, dit nou vir jou onmoontlik is nie. As jy baie graag een of twee maande gedurende die jaar ’n pionier wil wees, kan daar ’n manier wees om jou begeerte te verwesenlik.
5 Die vereiste van 60 uur lyk miskien na ’n moeilike uitdaging. Maar as jy in ag neem dat dit ’n gemiddelde van net 2 uur per dag vereis en dat jy dan die res van die dag het om na ander belangrike verpligtinge om te sien, sal die uurvereiste moontlik nie so veeleisend lyk nie. Kan jy gedurende ’n bepaalde tydperk elke dag ’n bietjie tyd in die velddiens deurbring?
6 Beskou asseblief wat party gemeentes gedoen het om hulppionierdiens aan te moedig, en die positiewe resultate wat hulle pogings opgelewer het. In een gemeente het byna die helfte van die verkondigers as hulppioniers ingeskryf. Onder hulle was drie ouere manne en drie bedieningsknegte. Een faktor wat tot hierdie goeie reaksie bygedra het, was die beklemtoning van die pionierdiens by die gemeentelike vergaderinge oor ’n tydperk van etlike maande voor April. Al die gemeentelede is daarvan bewus gemaak dat April ’n pioniermaand moet wees. Altesaam 28 het ingeskryf. Meer as die helfte was egpare. Een egpaar het vyf en ’n ander ses kinders gehad, maar met sorgvuldige beplanning kon hulle behoorlik na hulle gesinsverantwoordelikhede omsien en die pioniervereistes nakom. Sewe uit die groep het ’n voltydse sekulêre werk gehad, waar hulle 40 tot 50 uur per week gewerk het. Een broer, wat aanvanklik bang was om aansoek te doen, het gesê: “Dit is werklik baie makliker as wat ek gedink het dit gaan wees. Dit verg net ’n goeie rooster.”
7 ’n Ouere man het geskryf dat 29 in sy gemeente hulppionierdiens gedoen het. Toe hulle name aangekondig is, het dit ander aangespoor om ook aansoek te doen. Onder die 29, tesame met een gewone pionier, was daar 10 broers en 20 susters. Hulle ouderdomme het gewissel van 18 tot 71.
PERSOONL1KE VOORDELE
8 Diegene wat die eerste maal hulppionierdiens doen, praat feitlik sonder uitsondering met geesdrif oor hoeveel hulle persoonlik by die vermeerderde velddiens baat gevind het. Party sê dat hulle nader aan Jehovah voel, groter vreugde in die diens smaak, meer vertroue by die deure het en opbouende ondervindinge het wat hulle moontlik andersins nooit sou geniet het nie.
9 Een suster kon hulppionierdiens doen ondanks die feit dat sy vyf kinders, ’n sekulêre werk en ’n ongedoopte man het. Hoe is sy beloon? Haar man het haar ondersteun, en as gevolg van haar goeie voorbeeld het hy die volgende maand velddiens begin doen. ’n Ander suster, wat reeds aansoek om hulppionierdiens gedoen het, het geskryf om te sê dat haar werkgewer nie meer vir haar tyd wou vrygee soos hy belowe het nie. Sy het toe vir hom gesê dat sy uit haar werk sou moes bedank as sy nie die nodige tyd vry kon kry nie. Sy het haar werkgewer daaraan herinner dat sy kon voorgee dat sy siek is, soos ander moontlik sou doen, maar dat sy dit nooit sal doen nie omdat dit oneerlik is. Hy het ingestem om haar die nodige tyd vry te gee. Hoe het sy daarby baat gevind? Net ’n paar dae van hulppionierdiens het haar vertroue in Jehovah versterk. Sy het gesê: “Ek bekommer my nie meer so baie oor geld nie. Jehovah moes my inderdaad leer om op hom te vertrou.”
10 ’n Gebreklike broer het aan die Genootskap geskryf oor die sukses wat hy en sy vrou as hulppioniers behaal. Hy het gesê: “Ek is gebreklik en kan net ’n klein rukkie elke dag uitgaan; 60 uur per maand pas my dus goed. Ons het op 1 September begin en beplan om pioniers te bly. Ons word baie geseën, en vir die eerste keer vandat ons saam met die gemeente begin werk het, voel ons dat ons iets in die gebied bereik.” Dit is maar net enkele van die kommentare van die wat hulle sake so gereël het dat hulle hulppionierdiens kan doen.
SAL JY DIT PROBEER?
11 Is jy een van die talle verkondigers wat nog altyd ’n pionier wou word maar gemeen het dat jou omstandighede jou nie toelaat om dit voltyds te doen nie? Die Genootskap het jou in gedagte gehad toe hulle die hulppionierreëling ingestel het. Jehovah se seën en jou sorgvuldige beplanning is nodig, maar jy kan daarvan seker wees dat die geestelike groei en die vreugde wat jy sal ondervind dit dubbel en dwars die moeite werd sal maak (Neh. 8:11). Tref gerus nou positiewe reëlings om in Maart en April aan die hulppionierdiens deel te neem. Party sal Mei ’n ideale maand vir pionierdiens vind aangesien dit vanjaar vyf volledige naweke het. Miskien pas April en Mei jou dus beter.
12 Onthou dat sorgvuldige beplanning nodig is om sukses te behaal. Die ondervindinge van die wat ondanks gesinsverantwoordelikhede, voltydse sekulêre werk en ander Skriftuurlike verpligtinge hulppionierdiens kon doen, getuig hiervan. Elkeen kan hom afvra: ‘Waarom wil ek aan die pionierdiens deelneem? Hoe kan ek my doelwit bereik?’ Die oes is nie verby nie, en in talle gebiede is dit waarlik “groot”.—Matt. 9:37, 38; Joh. 4:35.
13 Dit is nou die tyd vir al God se knegte om hulle bedrywigheid kragtig te vermeerder. Kan jy nie elke jaar ’n maand of meer opsy sit vir vermeerderde velddiens as ’n hulppionier nie? (Ef. 5:16). Honderdduisende van ons broers het dit reeds probeer. Kan jy ook daaraan deelneem?