Bied die Goeie Nuus Aan—Deur goeie onderrigmetodes
1 ’n Belangrike doelwit in die verkondiging van die goeie nuus is om dissipels te maak. Met die oog hierop moet ons belangstellendes leer om die dinge wat Jesus ons beveel het te onderhou (Matt. 28:19). Die apostels het in hierdie opsig ’n goeie voorbeeld gestel want “hulle het nie opgehou om elke dag in die tempel en van huis tot huis te leer nie” (Hand. 5:42). Paulus het in sy bediening dieselfde gedoen (Hand. 18:11; 20:20). Ons wil die goeie voorbeeld van hierdie getroue onderrigters van die goeie nuus navolg.—1Kor. 11:1.
2 Twee uitstekende onderrigmetodes wat Jesus en sy apostels bekwaam gebruik het, was: (1) die gebruik van vrae en (2) beklemtoning van spesifieke gedagtes wanneer ons uit die Bybel lees of aanhaal. Hoe kan ons hierdie metodes gebruik in ons huis-tot-huis-werk en wanneer ons Bybelstudies hou?
VAN HUIS TOT HUIS
3 Wanneer ons ’n geleentheid het om met ’n huisbewoner te praat, is dit goed om sy beskouing oor die onderwerp te kry sodat ons ons aanbieding kan aanpas om in sy spesifieke behoeftes te voorsien. Gepaste beskouingsvrae kan in hierdie verband nuttig wees. Die huisbewoner se antwoorde op vrae oor die huidige wêreldtoestande kan ons van nuttige inligting vir ons bespreking voorsien. Trouens, vrae wat die huisbewoner nooi om kommentaar te lewer, het daartoe gelei dat party huisbewoners meer geneig is om te luister na wat ons sê.
4 Maar hoe kan ons weet watter vrae ons moet stel? Dit is goed om tydens ons velddiensvoorbereiding ’n paar minute te neem om te dink oor die soort mense in die gebied, hulle algemene menings en sake wat hulle raak.
Dink dan aan beskouingsvrae wat gevra kan word om hulle in ’n gesprek te betrek.—Kyk Skoolhandleiding, bladsye 51, 52.
5 Ons huis-tot-huisbediening bied ook die geleentheid om tekste te lees wat God se gedagtes oor ’n spesifieke onderwerp kan gee. Die manier waarop ons die tekste lees, is belangrik. Ons wil hê dat die luisteraars die spesifieke gedagtes wat ons hulle leer, moet onthou. Om dit te doen, moet ons behoorlike nadruk gebruik en spesifieke woorde beklemtoon. Dit kan gedoen word deur sleutelwoorde met meer intensiteit of stemsterkte te lees, of deur die aandag te vestig op wat ons volgende gaan lees. Nadat ons die teks gelees het, kan ons ook die sleutelwoorde herhaal om ’n gedagte verder te beklemtoon.—Kyk Skoolhandleiding, bladsye 126,127.
BY BYBELSTUDIES
6 Die gebruik van vrae is belangrik wanneer Bybelstudies gehou word. Goed gestelde vrae kan die student laat dink en hom help om ’n duideliker begrip van die waarheid te kry. Gepaste bykomende vrae wat nie voorkom in die publikasie wat bestudeer word nie, kan gestel word. Op bladsy 51 van die Skoolhandleiding is daar nuttige wenke wat jy van tyd tot tyd kan hersien.
7 Dit is noodsaaklik dat die Bybel goed gebruik word. Al word party tekste dalk in die publikasies aangehaal, kan dit soms voordelig wees om die student direk uit die Bybel te laat lees. Maak seker dat die sleutelwoorde behoorlik beklemtoon word sodat die Bybelstudent sal begryp waarom die teks aangehaal word en die toepassing daarvan sal verstaan.
8 Mag ons bekwame gebruik van vrae en behoorlike beklemtoning wanneer ons tekste lees, ons help om in ooreenstemming met Jesus se bevel voort te gaan om dissipels te maak.—Matt. 28:19.