Nuwe kringbyeenkomsprogram
1 Watter wonderlike voorreg is dit vir ons om Jehovah te dien! Daar is geen beter leefwyse nie. Sê ons nie soos die getroue seuns van Korag aan Jehovah: “Waarlik, een dag in u tempel is beter as duisend daarbuite” nie? (Ps. 84:11, NAV). Dan sal ons verheug wees oor die kringbyeenkomsprogram vir die 1988-diensjaar, wat in September begin, en die tema “Die oortreffende waarde van diens aan Jehovah” beklemtoon.—Filip. 3: 7, 8, NW.
2 Die doel van die program is om ons te help om die unieke voorreg om Jehovah op hierdie spesifieke tydstip te dien, meer te waardeer. Jesus Christus het die volmaakte voorbeeld van doelgerigte diens aan God gestel Christene moet nie net sy gesindheid aankweek nie, maar dit ook behou (Filip. 2:5-8). Die kringbyeenkomsprogram sal ons help om ons persoonlike diens aan God te ontleed, om positiewe eienskappe wat so noodsaaklik is vir heelhartige diens uit te ken en om te sien waar ons vooruitgang kan maak.
3 Ons het al dikwels die woord “pioniergees” gehoor. Wat is die pioniergees? Hoe kan al Jehovah se knegte toon dat hulle dit het? Hierdie en ander soortgelyke vrae sal beantwoord word. Skriftuurlike raad sal gegee word oor hoe ons teenstand teen ons bediening moet beskou en hoe ons dit die hoof kan bied. Jongmense sal bemoediging ontvang en gehelp word om hulle waardebegrip ten opsigte van dinge wat verband hou met sport, rolprente en televisieprogramme te ondersoek. Daarbenewens sal die talle geleenthede wat ouer mense het om heelhartige diens te lewer, bespreek word, asook wat sommige van hulle wel doen.—Jes. 48:17,18.
4 ’n Gedeelte van die byeenkomsprogram sal spesifiek aandag skenk aan gesinsake. Dit het die titel: “Hoe om ’n huisgesin op te bou wat Jehovah dien.” Die noodsaaklikheid van onderskeidingsvermoë en goeie kommunikasie in die gesin sal bespreek en toegelig word. Vrae oor skoolopleiding vir kinders in Christengesinne sal aandag geniet.
5 Hierdie byeenkomsprogram behandel probleme waarvoor ons nou te staan kom. Praktiese oplossings sal realisties aangebied word. Ons moet almal vaste planne maak om hierdie kringbyeenkoms by te woon en des te meer ag gee op wat ons hoor (Hebr. 2:1). Ons sal gevolglik ’n beter besef hê van die uitmuntende waarde wat dit het om ’n kneg van ons Grootse Skepper, Jehovah, te wees.