Help diegene wat vergaderinge bywoon
1 Dawid het ’n hartsbegeerte uitgespreek toe hy gesê het: “Ek sal die HERE loof in die vergaderings [vergaderde menigtes, NW]” (Ps. 26:12). Dawid het die vergaderde menigtes as aanbidders van Jehovah geïdentifiseer. Het ons dieselfde hartsbegeerte as Dawid? Ons kan toon dat ons dit het deur gereeld vergaderinge by te woon waar ons Jehovah kan loof en ander kan aanspoor om dit ook te doen.—Hebr. 10:24, 25.
2 Daar is waarskynlik ’n paar persone in julle gemeente wat vergaderinge bywoon maar wat nog nie verkondigers van die goeie nuus is nie. Die jongste bywoningsyfers vir vergaderinge toon dat die openbare toespraak in talle gemeentes deur meer mense bygewoon word as wat daar verkondigers is. Wat kan ons doen om hierdie persone te help om aan die vereistes vir deelname aan die velddiens te voldoen? Sommige is kinders van aanbidders van Jehovah, maar talle is nuwe belangstellendes. Kan ons hierdie belangstellendes help? Party van hulle is moontlik persone wat nog nie studeer nie. Wanneer jy by die vergaderinge met hulle gesels, sal jy moontlik vind dat sommige graag sal wil hê dat jy ’n Bybelstudie met hulle hou.
3 Die broers se liefde vir mekaar en vir nuwelinge bly nie ongemerk nie. Soos een jongman gesê het nadat hy vir die eerste keer ’n vergadering bygewoon het: “Ek was verbaas dat hulle almal mekaar ken en dat vriendelike geselskap die saal gevul het.”Dit het die begeerte by hom gewek om meer vergaderinge by te woon. Hy kon sien dat die liefde wat die broers vir mekaar het opreg is.
MANIERE OM TE HELP
4 Ons kan toon dat ons ander liefhet en oor hulle besorg is deur voor en na die vergaderinge met hulle te praat. Paulus het sulke opregte belangstelling in die welsyn van ander getoon. In Romeine hoofstuk 16 het hy sy groete aan ’n paar persone oorgedra, wat getoon het dat hy hulle goed geken het en oor hulle fisiese en geestelike welsyn besorg was (Rom. 16:1-16). Hy het sy groete oorgedra aan sommige wat langer as hy “in Christus” was, wat toon dat sy belangstelling persone in alle stadiums van geestelike ontwikkeling ingesluit het. Sy opmerkings oor hulle openbaar dat hy tyd daaraan afgestaan en daarin belanggestel het om hulle te leer ken. Hy het hulle probleme verstaan en kon hulle geestelik help. As ons vroeg by die vergaderinge kom, bied dit ons ’n goeie geleentheid om ander beter te leer ken en aan te moedig. Doen jou bes om 15 tot 20 minute voor die aanvang van die vergadering te arriveer en bly ’n rukkie daarna sodat jy ’n groter deelname daaraan kan hê om ander aan te moedig.
5 Ons kan nuwer vergaderingbywoners aanmoedig deur vir hulle te wys hoe om vir die vergaderinge voor te berei. Hulle kan aangespoor word om kommentaar te lewer wanneer vrae tydens die vergaderinge gestel word en om by die Teokratiese Bedieningskool aan te sluit wanneer hulle aan die vereistes voldoen. ’n Paar praktiese wenke van ’n ervare verkondiger kan nuwelinge help om toesprake voor te berei en kort antwoorde in hulle eie woorde te gee.—Kyk Skool-handleiding, Studie 4, 7 en 18.
6 As ons, as ’n deel van Jehovah se vergaderde menigtes, opregte liefde aan mekaar betoon, groei ons geestelik, en dit het ’n sterker band van eenheid tot gevolg (Gal. 6:10). Ons begeerte om by gemeentelike bedrywighede betrokke te wees word sterker en ons streef daarna om ’n groter deelname aan die predikings- en dissipelmaakwerk te hê. Laat ons derhalwe ons liefdevolle pogings voortsit om nuwelinge te help om Jehovah te prys en te eer.