Dien met ’n volkome hart
1 Dawid is ’n goeie voorbeeld van iemand wat Jehovah met ’n volkome hart gedien het. Sy leiding het ’n diepgaande invloed op die hele nasie Israel gehad. Hulle het ook met ’n volkome hart vrywillig bydraes vir die bou van Jehovah se tempel gegee. Dawid het later gebid dat hulle hierdie gesindheid “vir ewig” sou hê.—1 Kron. 29: 9, 18.
2 Waarom is dit nou, net soos in eertydse Israel, belangrik om Jehovah met ’n volkome hart te dien? Kortom, diegene wat Jehovah met ’n volkome hart dien, dra sy goedkeuring weg. Die siener Hanani het koning Asa meegedeel: “Want die HERE—sy oë deurloop die hele aarde om diegene kragtig te steun wie se hart onverdeeld op Hom gerig is.”—2 Kron. 16:9.
ONDERSTEUN KONINKRYKSWERK
3 Ons kan vandag met ’n volkome hart dien deur die Koninkrykspredikingswerk wat oor die hele aarde gedoen word te ondersteun (Matt. 24: 14). Dit is belangrik dat ons hierdie werk geldelik ondersteun, maar as ons ons krag, tyd, bekwaamhede en spraakvermoë gebruik om die goeie nuus aan ander te verkondig, het dit selfs groter waarde (2 Kor. 9:7). Ervaar jy die vreugde wat ’n mens kan geniet as jy jou met ’n volkome hart in Jehovah se groot werk inspan?
4 Ons word aangemoedig om gedurende Julie hartgrondige beroepe op regskape mense te doen wanneer ons oor die Bron van ware vrede en veiligheid praat en die boek en brosjure op ons lektuuraanbod aanbied. Namate geweld wêreldwyd toeneem, raak mense al hoe meer besorg oor die vooruitsigte op ware vrede en veiligheid. Ons het die geleentheid om te toon dat ons hart volkome op Jehovah gerig is deur ’n volle aandeel in die velddiens te hê en deur sagmoediges na die ware Bron van vrede te rig.
KAN JY BINNEKORT ’N PIONIER WEES?
5 Kan jy jou velddienstyd vermeerder? Aangesien Julie vyf naweke het, is dit dalk ’n uitstekende maand vir jou om jou bedrywigheid in die velddiens te vermeerder sodat jy aan die vereistes vir die pionierdiens kan voldoen.
6 Talle is besig om hulle velddiens te vermeerder sodat hulle aan die begin van die nuwe diensjaar in September gewone pioniers kan word. Het jy al daaroor gedink? Kan jy jou rooster so aanpas dat jy ’n gewone pionier kan wees? Sal jy, indien nodig, bereid wees om jou lewenstyl te vereenvoudig sodat jy meer tyd vir Jehovah se diens het? (Matt. 6:22, NW). As jy dit werklik wil doen en pionierdiens binne jou bereik is, moet jy Jehovah in gebed nader en om sy hulp en leiding vra (Spr. 16:3). Praat met die ouere manne oor die moontlikheid dat jy aan die gewone pionierdiens kan deelneem. As jy sien dat jou omstandighede jou sal toelaat om ’n gewone pionier te word, moet jy seker maak dat jy jou aansoekvorm ten minste 30 dae voordat jy wil begin, instuur.
7 Mag ons almal, hetsy jonk of oud, toon dat ons Jehovah met ’n volkome hart dien. Ons moet nooit toelaat dat ons hart verdeeld word nie (Mark. 12: 30). Ons ywerige ondersteuning van die Koninkrykspredikingswerk sal ons help om ons hart volkome op Jehovah gerig te hou.