Bou geloof in God se Woord
1 Sterk geloof is nou nodiger as ooit tevore. Baie mense het hoegenaamd geen geloof en geen toekomshoop nie. Godsdiens- en politieke leiers het al so dikwels valse verwagtinge gewek dat baie mense nie eens hul wanhoop wegsteek nie. Dit is inderdaad soos die apostel Paulus verduidelik het: “Geloof is nie die deel van almal nie” (2 Thess. 3:2). Maar Jehovah se Getuies het wel geloof. Ons het algehele vertroue dat die beloftes in God se Woord in vervulling sal gaan.
2 Sterk geloof maak Jehovah se Getuies opvallend anders as ander mense. Dit beweeg ons om goeie werke te doen wat ander sowel as onsself tot voordeel strek en God vereer. Ons verkry sulke geloof as ons toelaat dat God se Woord ’n kragtige invloed op ons lewe uitoefen. Die hedendaagse internasionale broederskap van ware Christene toon die waarde daarvan om geloof in die Bybel as die geïnspireerde Woord van God te bou.—2 Tim. 3:16.
WAAROM ONS ANDER MOET HELP OM GELOOF TE BOU
3 Aangesien lewe op die spel staan, het ons goeie rede om ander te help om hulle geloof op te bou. Daarom sal ons in Maart Die Bybel—God se woord of die mens s’n? vir die eerste keer in die veld aanbied. Die doel van hierdie nuwe boek is om mense te help om te sien dat die Bybel God se Woord is. Dit bespreek en weerlê baie van die valse beskuldigings wat teen God se Woord ingebring word. Dit gee bevredigende antwoorde op ’n aantal vrae soos: Is die Bybel onwetenskaplik? Weerspreek hy homself? Is dit net mites en legendes? Het die wonderwerke in die Bybel werklik plaasgevind? Het argeologie die geskiedkundige akkuraatheid van die Bybel weerlê? Boonop lewer hierdie publikasie talle goeie bewyse dat die Bybel geïnspireer is. Dit vestig ook die aandag op die onfeilbare profesieë van die Bybel en die merkwaardige deurlopende harmonie daarvan.
4 Die omvattende praktiese wysheid van die Bybel en die krag daarvan om mense ten goede te verander, is slegs ’n deel van die getuienis wat bewys dat die Bybel God se Woord is. Dit is ons verantwoordelikheid om mense bewus te maak van hierdie getuienis. Voor ons dit kan doen, moet ons hulle eers leer om in die Bybel te glo.
5 Hoe is die meeste van ons gehelp om geloof in God se Woord op te bou? Heel waarskynlik was dit deur middel van ’n tuisbybelstudie wat iemand geduldig met ons gehou het. Wanneer ons dus ’n Bybel of ’n boek by iemand laat, is dit nie die einde van ons pogings om hulle geloof op te bou nie; dit is slegs die begin. Indien ons voordeel getrek het uit ’n studie wat iemand met ons gehou het, moet ons so gou moontlik teruggaan na diegene by wie ons lektuur laat en ’n tuisbybelstudie aanbied wat hulle sal help om hul geloof op te bou.
NUWE BOEK HELP OM GELOOF OP TE BOU
6 Geen opregte persoon wat die getuienis eerlik beoordeel, kan weier om te aanvaar dat die Bybel God se Woord is nie. Hierdie nuwe boek bevat heelwat van daardie getuienis, sodat dit navorsing vergemaklik. Ons wil ander aanspoor om die Bybel as God se Woord te aanvaar en om volgens die geïnspireerde raad daarin te lewe. Diegene wat dit doen, sal met vreugde die psalmis se innige gebed hulle eie maak: “Aanskou dat ek u bevele liefhet; o Here, maak my lewend na u goedertierenheid. Die hele inhoud van u woord is waarheid, en al u regverdige verordeninge is tot in ewigheid.”—Ps. 119:159, 160.
7 Deur sy Woord, die Bybel, voorsien Jehovah liefdevol leiding aan almal wat sy beskerming gedurende die “groot verdrukking” wil geniet (Matt. 24:21). In Maart kan ons ander aanspoor om God se Woord te lees en te bestudeer deur die boek Die Bybel—God se woord of die mens s’n? teen ’n bydrae van R2,50 aan te bied.