Gaan sonder ophou voort met die bediening
1 Die gedaante van hierdie wêreld verander vinnig terwyl die einde al nader kom (1 Kor. 7:31). Wêreldskokkende gebeure vind plaas ter vervulling van Bybelprofesie. Terwyl ons die gebeure in die wêreld om ons sowel as binne die teokratiese organisasie beskou, besef ons hoe dringend dit is dat ons “die goeie nuus” van die Koninkryk verkondig.—Mark. 13:10, NW.
2 Dit is ons Leier en Voorbeeld, Jesus Christus, wat die bevel gegee het om dissipels te maak. Gevolglik het hy die sukses van daardie werk gewaarborg toe hy belowe het: “Ek is met julle al die dae tot aan die voleinding van die wêreld” (Matt. 28:19, 20). Jesus se dissipels het sy woorde ernstig opgeneem, en selfs toe hulle hewig vervolg is, ‘het hulle nie opgehou om te leer, en die evangelie te verkondig dat Jesus die Christus is nie’ (Hand. 5:42). Wat ’n goeie voorbeeld het hulle tog nie vir ons gestel nie!
3 Wanneer ons die 1990 Yearbook lees, sien ons dat Jehovah ons bediening geseën het deur ’n puik vermeerdering in nuwe dissipels teweeg te bring. In sommige lande is die vermeerdering wat gerapporteer word werklik uitsonderlik. Die totale wêreldwye vermeerdering oortref verreweg wat enigeen van ons ons net ’n paar jaar gelede kon voorstel (Jes. 60:22). Maar wat van ons plaaslike gebied? En wat van ons individuele bediening? Verheug ons ons oor ons aandeel in die bediening sowel as oor die gesamentlike bediening van al ons medewerkers? Gaan ons persoonlik sonder ophou met die bediening voort?
ONS PERSOONLIKE DEELNAME
4 Dit is vanselfsprekend dat nie alle gebiede ewe produktief is nie. (Vergelyk Mattheus 13:23.) Maar dit is ook so dat sommige gebiede, soos Ierland en Quebec, eers na baie jare se harde werk deur ywerige bedienaars produktief geword het. Daar is baie teenstanders in party gebiede, en in ander staan die mense oor die algemeen onverskillig teenoor die Koninkryksboodskap en gee hulle nie daaraan gehoor nie. Op ander plekke weer is daar soveel werkers in die veld dat daar min gebied is om te dek. Maar ons moet nooit ons ywer laat verflou nie, ongeag die soort gebied waarin ons werk. Die apostel Paulus het geskryf: “Laat ons nie moeg word om goed te doen nie, want op die regte tyd sal ons maai as ons nie verslap nie” (Gal. 6:9). Sy vermaning geld vir alle Christene. Hoe sal ons dit kan doen? Wat sal ons help om sonder ophou met die bediening voort te gaan?
5 Ons kan bedrywig bly en welslae in ons bediening behaal as ons op Jehovah vertrou en op sy krag staatmaak om ons te ondersteun. Ons moet ook altyd onthou dat dit Jehovah is wat die veld produktief maak (1 Kor. 3:6). Ons gebede om hulp word verhoor deurdat Jehovah raad en praktiese instruksies voorsien, asook ’n oorvloed van Bybellektuur vir ons persoonlike gebruik sowel as om ander te help om hom te leer ken. Maak ons ten volle gebruik van hierdie voorsiening?
BEHOU DIE REGTE GESINDHEID
6 As ons ’n negatiewe gesindheid het, kan dit ’n groot struikelblok wees, sodat ons nie produktief in die bediening is nie. As ons ’n ongunstige siening van die mense in ons gebied het omdat hulle vantevore nie wou luister nie, sal daardie gesindheid weerspieël word in ons stemtoon, gesigsuitdrukking en gebrek aan ywerige voorbereiding vir die velddiens. Ons het opdrag ontvang om te preek en te onderrig, en ons is nog nie meegedeel dat die werk klaar is nie. Ons begeerte om gehoorsaam en onderdanig aan goddelike leiding te wees, behoort ons te beweeg om sonder ophou met die bediening voort te gaan.
7 Jehovah se voorneme dat die goddelose gewaarsku en dissipels ingesamel word, sal uitgevoer word voor die einde kom. Ons kan nou in die vreugde van die bediening deel en uitsien na die ewige seëninge onder God se volk as ons ons geloof en liefde openbaar deur sonder ophou met die bediening voort te gaan.