Hou aan vrug dra met volharding

¹ Toe die apostel Paulus minder as 30 jaar na die dood en opstanding van Jesus Christus aan die gemeente in Kolosse geskryf het, kon hy sê dat die waarheid van die evangelie vrug dra en deur die hele wêreld versprei (Kol. 1:5, 6). Op ’n baie groter skaal het Jehovah se Getuies vandag letterlik “die uiterste van die aarde” met die goeie nuus van die Koninkryk bereik (Hand. 1:8; Joh. 14:12). Gedurende die 1989-diensjaar het die gemiddelde aantal Koninkryksverkondigers in die wêreld met 5,6 persent toegeneem, en ons het ’n hoogtepunt van 3787 188 verkondigers in 212 lande bereik!

² In lande waar dit verbode is om God se Koninkryk te verkondig en verslae onvolledig is, is ’n selfs groter vermeerdering, naamlik 7,6 persent, gerapporteer! Ondanks die baie probleme wat in daardie lande voorkom, gaan die verkondigers voort om “met volharding vrug [te] dra” (Luk. 8:15). In sommige plekke het die druk afgeneem, maar moeilike omstandighede duur onveranderd voort in ander lande.

³ In lande waar daar groter vryheid is om met die Koninkrykspredikingswerk voort te gaan, het ons met ander probleme te kampe. Ons vind gereeld mense wat nie belangstel nie en onverskillig is, veral waar daar materiële voorspoed is. Jehovah se knegte moet op hulle hoede wees dat hulle nie ook sulke gesindhede ontwikkel nie. Ons wil nie hê dat materiële belange, plesier, ontspanning en ander afleidinge inbreuk maak op ons teokratiese bedrywighede nie. Anders kan ons onverskillig raak en uit die oog verloor hoe belangrik dit is om met volharding vrug te dra.—Luk. 21:34-36.

VOLHARDING EN INSPANNING NODIG

⁴ Volharding is ’n vereiste—hetsy die goeie nuus teëgestaan word of ons relatiewe vryheid het om ons Christelike verantwoordelikhede na te kom. In party lande werk ons broers al dekades lank onder ongunstige toestande. Hulle volharding onder sulke moeilike omstandighede het hulle ’n goedgekeurde posisie gegee, en nou maai hulle oorvloedige seëninge (Rom. 5:3-5, NW; Gal. 6:9). Ongeag watter moeilikhede ons ondervind, ons wil volhard. Die Koninkryksgetuienis moet gegee word, en ons almal moet voortgaan om ons onkreukbaarheid te toon. As ons volhard, sal ons ons siel, of die lewe, verkry.—Mark. 13:10; Luk. 21:19.

⁵ Ons kan toon dat ons geestelike dinge nie as vanselfsprekend aanvaar nie deur ons ywerig in Jehovah se diens in te span en nie moeg te word om die predikingswerk te doen nie. In party lande waar vervoer ’n probleem skep, materiële benodigdhede ontbreek en ekonomiese probleme ondervind word, word die goeie nuus sonder ophou gepreek. In ’n paar van daardie lande bestee gemeenteverkondigers gereeld gemiddeld 14 tot 17 uur per maand aan die velddiens. Hulle pioniergeledere neem ook voortdurend toe. Dit laat dié van ons wat baie materiële geriewe het, stilstaan en dink. Kan ons ons gereelde deelname aan die uiters belangrike Koninkrykspredikings- en dissipelmaakwerk vergroot?

KAN ONS MEER DOEN?

⁶ As ons meer tyd aan die velddiens wil bestee, sal dit dalk vereis dat ons ons rooster effens moet verander. Gestel ons het op Sondae ’n uur aan die veldbediening bestee. Kan ons dalk daardie tyd nou verleng deur nog ’n uur te werk om herbesoeke te doen of ’n Bybelstudie te hou? Of as ons ’n Bybelstudie hou, kan ons ’n uur of wat voor die studie inpas om van huis tot huis te werk of ’n paar herbesoeke te doen? Nadat ons op Saterdag twee uur aan tydskrifwerk bestee het, kan ons miskien tydskrifte aflewer op ’n tydskrifroete wat ons begin het of ’n paar herbesoeke probeer doen. Diegene wat in ’n dorpsgebied woon, vind dit dalk gerieflik om ’n ruk lank aan straatgetuieniswerk deel te neem. Op hierdie en ander maniere sal ons dalk in staat wees om ons deelname aan die velddiens te vergroot. Goeie resultate behoort proporsioneel toe te neem.

⁷ As ons meer tyd aan die velddiens bestee deur herbesoeke te doen, sal dit ongetwyfeld daartoe lei dat meer Bybelstudies gehou word. Dit sal mettertyd beteken dat meer mense die waarheid aanvaar en ons help om die Koninkrykspredikingswerk te verrig.—Matt. 28:19.

GEBED ONONTBEERLIK

⁸ As ons wil aanhou om met volharding vrug te dra, moet ons Jehovah se seën vra en die leiding van sy gees aanvaar. Ons moet ons bediening in gebed met Jehovah bespreek. Wanneer ons oor ons veldbediening tot Jehovah bid, word ons daaraan herinner dat ons sy medewerkers is (1 Kor. 3:9). Met Jehovah se hulp kan ons in ons bediening volhard selfs wanneer ons nie onmiddellike resultate sien nie. In party gebiede het vermeerdering eers gekom nadat Koninkryksverkondigers baie jare lank getrou volhard het. Met die oog op die toekoms is dit noodsaaklik om altyd goddelike leiding en hulp te soek, sodat ons nie uitsak nie maar ons bediening vervul (2 Tim. 4:5). Die Koninkrykspredikings- en dissipelmaakwerk lewer steeds baie vrugte op.

⁹ Jesus het beklemtoon hoe belangrik dit is dat ons gedurig moet bid (Luk. 18:1). Paulus het vermaan: “Bid sonder ophou” (1 Thess. 5:17). Daar is dringende redes waarom ons nou in gebed moet volhard. Dit behels baie verantwoordelikhede om elke jaar na die groeiende kudde om te sien. Ons wil ander help om met volharding vrug te dra. Daar moet aandag geskenk word aan die verskillende behoeftes van individuele verkondigers en van die organisasie in sy geheel. Aangesien donasies nodig is om die werk te steun en verdere publikasie van Bybelse lektuur moontlik te maak, moet ons bid dat Jehovah sal voortgaan om godvresende mense te beweeg om in dié opsig vrygewig te wees.—2 Kor. 9:8-11.

¹⁰ Namate beter teokratiese ontwikkeling as ooit tevore in sekere dele van die wêreldveld moontlik word, neem die skriftuurlike vermaning in Kolossense 4:2 groter betekenis aan: “Volhard in die gebed en waak daarin met danksegging.” Ons moet ten behoewe van ál ons broers bid dat hulle kan voortgaan om vrug te dra en ander skaapgeaarde mense kan help wat in gebiede gevind word waar dit in die verlede moeilik was om te getuig.

OPENBAAR DANKBAARHEID

¹¹ Hoe dankbaar is ons tog vir die oorvloed geestelike voorsienings wat ons so baie geniet! Ons wil Jehovah hiervoor bedank, en ons bid ook om sy voortdurende seën op die werk van die getroue dienskneg en sy Bestuursliggaam. Hulle nederige, onvermoeide arbeid ten behoewe van ons en van skaapgeaarde mense in alle wêrelddele word baie hoog op prys gestel.

¹² Geweldig baie Koninkryksaad is al in die vorm van tallose publikasies versprei (Matt. 13:3-8, 18-23). Tog is daar ’n voortdurende aanvraag na Bybels en Bybellektuur in die veld. Die wêreldrapport toon dat heelwat plant- en natmaakwerk in die vorm van herbesoeke en tuisbybelstudies gedoen is. Terwyl ons voortgaan om ons kant in hierdie belangrike aspekte van ons bediening te bring, dank ons Jehovah vir sy seën wat dinge laat groei. Trouens, ons bid om daardie seën.—1 Kor. 3:6, 7.

ANDER BEHOEFTES

¹³ Omdat Christene in die wêreld is maar nie deel daarvan is nie, sal hulle voor verdere toetse en beproewinge te staan kom, en dit sal nog erger word gedurende hierdie laaste dae. Party verduur nou vervolging en ander probleme. Ander moet hulle Christelike bedrywighede voortsit in lande wat deur oorlog geteister word. Ons broers is deur rampe soos aardbewings, tifone en orkane getref. Wanneer dit gebeur, moet ons vir ons broers in sulke gebiede bid. (Vergelyk Handelinge 12:5; 2 Korinthiërs 1:11.) Soms is dit nodig om hooggeplaaste amptenare te nader of aan hulle te skryf oor die verbod op ons werk, die vervolging van ons broers of ander sake wat Koninkryksbelange beïnvloed. Onder sulke omstandighede doen ons dít waartoe ons persoonlik in staat is, en ons bid vir hierdie individue sodat hulle ons medeknegte goedgesind sal wees.—1 Tim. 2:1, 2.

¹⁴ Daar word baie druk op gesinne uitgeoefen wat in Satan se goddelose wêreld lewe (2 Kor. 4:4). Egpare het dalk ernstige probleme. Hulle moet aangemoedig word om in gebed goddelike leiding te vra, en ons kan ook vir hulle bid (1 Kor. 7:5; 1 Pet. 3:7). Gesinshoofde wat Jehovah se leiding vra om hul huisgesin goed te beheer, moet besef dat hy na hulle opregte gebede sal luister (Rigt. 13:8; Filip. 4:6, 7). Oud en jonk het met moeilike situasies te kampe—by die skool, by die werk, wanneer ons op reis is of in ander omstandighede. Gebed help ons om die gees van hierdie goddelose wêreld te weerstaan en aanhoudend vrug te dra terwyl ons voortgaan om te doen wat welgevallig in God se oë is.—Matt. 6:13; Ef. 6:13-18; 1 Joh. 3:22.

¹⁵ Jehovah is die groot Hoorder van die gebed (Ps. 65:3). Ons moet te alle tye ons sorge op hom werp (Ps. 55:23). Ons het geleenthede om deur middel van gebed te toon dat ons besorg is oor al die Koninkryksbelange en die welsyn van ons broers in alle wêrelddele. Wanneer ons nadink oor die werk van diegene wat die leiding in die gemeente neem en dié wat die wêreldwye uitbreidingsprogram rig, wanneer ons aandag gee aan diegene wat geestelik siek is of wanneer ons omsien na ander probleme, hetsy groot of klein, moet ons almal sulke sake in gebed aan Jehovah meld (1 Thess. 5:25, NW; Jak. 5:14-16). Ja, ons moet ons kommernisse op Jehovah werp met die volle vertroue dat hy ons, ongeag wat ons volgens sy wil vra, sal verhoor (1 Pet. 5:7; 1 Joh. 5:14). Mag ons ywerig in Koninkryksdiens wees en voortdurend op Jehovah vertrou om ons te help sodat ons kan aanhou om met volharding vrug te dra.