Bied die goeie nuus aan—Op biddende wyse
1 Die apostel Paulus het aanmoedigende raad vir die Filippense geskryf: “Ek is tot alles in staat deur Hom wat my krag gee” (Filip. 4:13, NAV). Ons moet ook volkome op Jehovah vertrou om ons krag te gee om die goeie nuus met vrymoedigheid aan te bied. Hoe kan ons dit doen?
2 Jesus het beklemtoon hoe belangrik dit is dat ons “gedurig moet bid en nie moedeloos [moet] word nie” (Luk. 18:1). Paulus het vermaan: “Bid sonder ophou” (1 Thess. 5:17). Ja, gebed versterk ons. Ons moet die goeie nuus op biddende wyse aanbied. Ons kan bid om geleenthede om vir ander te getuig, om wysheid en onderskeidingsvermoë in die huis-tot-huiswerk en dat ons daarin sal slaag om die hart van ons Bybelstudente te bereik. Aangesien dit dringend nodig is om die goeie nuus van die Koninkryk te verkondig voordat die einde kom, moet ons ook bid dat die Koninkryksbelange wêreldwyd bevorder word (Matt. 24:14). Ons moet ‘wakker bly’ in gebed om geestelike lomerigheid te vermy en groter waardering te kry vir die voorreg om met ander oor Jehovah se voornemens te praat.—Kol. 4:2, NW; wAF62 bl. 492-3.
TYDENS BYBELSTUDIES
3 Waarom is gebed so belangrik wanneer ’n mens ’n Bybelstudie hou? As ons die studie met gebed begin, bring dit ons in die regte gemoedstemming, en dit help die student om te besef dat die dinge wat gesê word belangrik is. Hy leer om hom tot Jehovah te wend vir leiding. Die student leer ook deur ons voorbeeld hoe om te bid.—Luk. 11:1.
4 Wat is party dinge wat gepas in gebede by tuisbybelstudies ingesluit kan word? Jesus se modelgebed en Paulus se gebed ten behoewe van die Filippense is uitstekende voorbeelde (Matt. 6:9-13; Filip. 1:9-11). Ons gebede hoef nie lank te wees nie, maar hulle moet aan spesifieke dinge aandag gee. Dit is belangrik dat ons gepaste lofuitinge tot Jehovah insluit vir sy tallose uitstekende werke. Ons kan erkenning uitspreek vir sy grootheid, majesteit en volmaakte eienskappe (Ps. 145:3-5). Dit sal voordelig wees as ons die student by name noem, miskien sy omstandighede meld en bid dat hy geestelike vooruitgang maak. Namate hy vooruitgang maak, kan ons Jehovah se seën vra op sy pogings om vergaderinge by te woon en om die waarheid wat hy leer aan ander te verkondig. Smeek Jehovah ook om die wêreldwye predikingswerk te seën.
VIR ONS BROERS EN SUSTERS
5 Jehovah se hele volk is ons medewerkers (1 Kor. 3:9). Wanneer wêreldlike owerhede probeer om die prediking van die goeie nuus te dwarsboom, word ons dus beweeg om te bid “vir konings en almal wat hooggeplaas is”. Om watter rede? “Sodat ons ’n rustige en stil lewe kan lei in alle godsvrug en waardigheid” (1 Tim. 2:1, 2). Sulke gebede is in werklikheid ten behoewe van ons broers in alle wêrelddele. Ons bid dat die owerhede goedgesind teenoor ons werk moet wees.
6 Ons kan deur middel van gebed vra dat ons broers wat onder moeilike omstandighede preek en diegene wat dalk geestelik siek is, versterk word sodat hulle ’n groter aandeel aan die bediening kan hê (2 Thess. 3:1, 2). Dit is ook goed om te bid vir gemeentelike ouere manne, reisende opsieners en die Bestuursliggaam—“diegene wat hard werk onder julle”.—1 Thess. 5:12, NW.
7 Ons moet te alle tye ons bekommernisse op Jehovah werp (Ps. 55:23; 1 Pet. 5:7). Ons word verseker dat as ons iets volgens sy wil vra hy ons sal verhoor (1 Joh. 5:14). As ons Jehovah vra om ons te help om ons bediening ten volle te vervul, moet ons vertrou dat hy sal luister en ons weg suksesvol sal maak.—2 Tim. 4:5.