Moenie moeg word nie
1 Die jaarboek vir 1991 toon dat opwindende uitbreiding wêreldwyd plaasvind. Daar is verkondigerhoogtepunte in een land na die ander.
2 Maar wat is die geval in julle gebied? Is daar gebrek aan belangstelling? Staan die mense onverskillig teenoor die Koninkryksboodskap? Is daar min mense tuis? Reageer min mense gunstig? Indien wel, kan julle deur Paulus se raad in Galasiërs 6:9 aangespoor word: “Laat ons nie ophou om goed te doen nie, want op die regte tyd sal ons maai as ons nie moeg word nie” (NW). Om goed te doen, sluit beslis in dat ons die goeie nuus van die Koninkryk van huis tot huis verkondig. Ons moet aanhou om met dringendheid te preek totdat Jehovah sê die werk is klaar (Jes. 6:8). Skaapgeaardes word nog selfs in moeilike gebiede gevind.
3 Wat kan ons doen sodat ons nie moeg word in die bediening nie? Dit kan help as ons ons benadering of inleidings verander. Die Redenering-boek het uitstekende wenke. Het jy hulle al probeer? ’n Baie kort maar direkte benadering kan meer huisbewoners se aandag trek. Laat mense weet dat jy hulle besoek omdat jy persoonlik in hulle en hulle welsyn belangstel.
BIED DIE “NASIES”-BOEK AAN
4 Gedurende Januarie kan ons toon dat ons oor ander besorg is deur die boek “Die nasies sal weet dat ek Jehovah is”—Hoe? saam met die boekie Onsigbare geeste—Help hulle ons? Of benadeel hulle ons? aan te bied. Ons beveel God se Koninkryk aan en ondersteun dit as ons die goeie nuus verkondig. Die “Nasies”-boek is ’n uitstekende instrument om ander te help om meer aangaande Jehovah en sy Koninkryksreëling te leer.
5 Aangesien die meeste van ons met die “Nasies”-boek vertroud is, sal ons party van die uitstekende gesprekspunte kan gebruik. Jy kan na paragrawe 2 en 4 in hoofstuk 1 verwys. Die eerste wêreldmoondheid in Bybelse geskiedenis moes deur ondervinding leer dat Jehovah Koning is en dat sy naam nie gesmaad en geminag moet word nie. Destyds het Jehovah sy volk gered, en hy sal dit by Armageddon weer doen. Jy kan ook na hoofstuk 21 of 22 verwys wat die Messias se regering en mense se geluk onder goddelike regering bespreek.
6 Dit sal ons beslis persoonlik aanmoedig en versterk as ons weekliks aan die Koninkrykspredikingswerk deelneem. Daarbenewens kan ons ons geestelikheid op ’n hoë vlak hou deur ’n volgehoue studie van God se Woord en gereelde deelname aan gemeentelike vergaderinge.—Hebr. 10:23-25.
SPOOR ANDER AAN OM STERK TE BLY
7 Jy kan jouself help en ander aanspoor deur saam met hulle in die veldbediening te werk (Gal. 6:10). Vra gerus die pioniers en die ouere manne of jy saam met hulle kan werk. Diegene wat ongereeld of dalk onbedrywig is, sal ook deur jou belangstelling in hulle geestelike welsyn aangespoor word.
8 In hierdie moeilike tye moet ons almal in Jehovah se diens volhard en nie moeg word nie. Sulke volharding sal ons in staat stel om ons Christelike ywer te handhaaf ten spyte van moeilikheid of ander se onverskilligheid (Hebr. 10:36-39, NW). Vra Jehovah om krag (Jes. 40:29-31). Vra sy hulp om te volhard, en behou ’n positiewe gesindheid. Onthou, ons doen God se werk. Hy sien wat ons in sy diens doen, en hy vergeet nie (Hebr. 6:10). Laat ons dus nie moeg word nie! Laat ons eerder “altyd volop te doen hê in die werk van die Here” deur op Jehovah te vertrou om ons te versterk sodat ons sy ‘goeie werk’ kan doen.—1 Kor. 15:58, NW; Gal. 6:9, NW.