Reël nou om die “Liefhebbers van Vryheid”- Streekbyeenkoms vir 1991 by te woon
1 Met die oog op hedendaagse wêreldtoestande is dit nie verbasend dat mense in baie lande groter vryheid begeer nie. Maar waar kan ware vryheid gevind word? Jesus Christus het gesê: “As julle in my woord bly, is julle waarlik my dissipels. En julle sal die waarheid ken, en die waarheid sal julle vrymaak” (Joh. 8:31, 32). Hierdie vryheid is nie die beperkte soort vryheid waarop mense hoop wanneer hulle een politieke heerser of regeringsvorm ten gunste van ’n ander verwerp nie. In plaas daarvan spreek dit die kern van die mens se probleme aan. Jesus het die vryheid van slawerny aan sonde bespreek. (Sien Johannes 8:24, 34-36.) Wanneer iemand dus ’n ware dissipel van Jesus Christus word, lei dit tot ’n merkbare verandering in sy lewe, ’n bevryding.
2 ’N DRIEDAAGSE BYEENKOMS: Die reeks “Liefhebbers van Vryheid”-Streekbyeenkomste vir 1991 sal Vrydag om 10:20 vm. begin en die byeenkoms sal Sondagmiddag omstreeks vieruur afsluit. Sorgvuldig gekose inligting wat noodsaaklik is vir ons geestelike gesondheid sal tydens elke sessie aangebied word. ’n Verskeidenheid onderwerpe sal beklemtoon hoe ons die vryheid kan verkry waarvan Romeine 8:21 praat. Besielende inligting sal bespreek word en in die vorm van toesprake, demonstrasies, onderhoude en ’n drama aangebied word.
3 Neem jou voor om nie eers een sessie te mis nie. Dit kan persoonlike opofferinge en aanpassings in jou rooster verg. Jy sal moontlik spesiale reëlings met jou werkgewer moet tref. Talle offer finansiële voordele op om al die sessies by te woon. Jehovah sal beslis diegene seën wat dit ’n saak van innige gebed maak en ’n opregte poging aanwend om daar te wees.—Luk. 13:24.
4 KOM VROEG: Jehovah se Getuies is daarvoor bekend dat hulle daarna strewe om betroubaar en stiptelik te wees (Luk. 16:10). Dit is ook belangrik wanneer jy die streekbyeenkoms bywoon. Kom elke dag vroeg en neem jou sitplek in voor die program begin. Dit vereis dat jy genoeg tyd moet toelaat om die nodige sake af te handel, soos om jou voertuig te parkeer en geskikte sitplekke vir jou gesin te kry.
5 Die bywoning van die streekbyeenkoms bied ons ’n goeie geleentheid om aangename assosiasie te geniet. Maar as ons tot laat in die nag saam met vriende kuier, kan dit ons pogings om die volgende dag betyds te wees in die wiele ry. Dit kan baie spanning en frustrasie tot gevolg hê as ’n mens die oggend laat begin en dus moet jaag. Dit is nuttig om ’n redelike tyd te stel om te gaan slaap as jy dit wil vermy. Deur getrou by ’n rooster te bly, is daar ’n groter kans dat almal ’n goeie nagrus sal kry en die volgende dag vroeg sal kan begin. Dit voorkom dat hulle daar aankom terwyl die program aan die gang is, wat steurend is en ’n ontstigting kan wees vir dié wat reeds sit. As ons elke dag vroeg kom, kan ons ook assosiasie met ons broers en susters geniet. Christelike liefde en bedagsaamheid, asook respek vir Jehovah en die geestelike dinge wat hy voorsien, moet ons aanspoor om ons bes te doen om betyds te wees.
6 LUISTER AANDAGTIG: Om te luister, beteken in werklikheid om aandag te skenk met ons verstand en ons hart, met ons ore en ons verstandelike vermoëns. Ons moet luister en ‘die woord van Jehovah hoor’ (Jer. 2:4). In Jesaja 55:2 het Jehovah Israel beveel: “Luister aandagtig na My.” Die woord “aandagtig” word gedefinieer as “gerig met gespanne of noukeurige aandag”. As ons gedurende die byeenkoms aandag skenk, sal ons “luister en meer onderrig opneem” (Spr. 1:5, NW). Dit verg gewoonlik meer inspanning en konsentrasie om by ’n streekbyeenkoms te luister en te leer as by die Koninkryksaal. Waarom? Ons sit langer, en daar is meer dinge wat ons aandag aftrek omdat daar meer mense is. As ons nie aandag skenk nie, sal ons nie ten volle baat vind by die ryk geestelike voedsel wat voorsien word nie (1 Pet. 2:2). Wat kan ons doen? Dit is baie goed om te sien dat baie byeenkomsgangers die nuttige gewoonte aangeleer het om gedurende die program aantekeninge te maak. Hoewel sommige van die toesprake by die streekbyeenkoms mettertyd in die publikasies sal verskyn, sal ander nie. Almal word aangemoedig om hulle dit ten doel te stel om kort aantekeninge gedurende die streekbyeenkoms te maak, omdat dit ’n goeie manier is om jou aandag te bepaal by dit wat gesê word.
7 Aantekeninge hoef nie omvattend of uitvoerig te wees nie. Gewoonlik sal ’n frase of twee voldoende wees vir ’n sleutelgedagte. Selfs jong kinders sal meer by die toesprake baat vind, en dit sal hulle help konsentreer as hulle ’n aantekeningboek en ’n pen of potlood het sodat hulle die spreker se sleutelgedagtes en sleuteltekste of nuwe gedagtes wat aangebied word, kan neerskryf. Ouere manne vind dit nuttig om netjiese aantekeninge te hê sodat hulle ’n interessante hersiening van die byeenkomsprogram op die Diensvergadering ná die streekbyeenkoms kan hou. Hulle kan ook baie van die gedagtes wat by die byeenkoms aangebied word in hulle onderrigtings- en herderswerk insluit.
8 WEES VERENIG IN SANG EN GEBED: ’n Deel van ons aanbidding behels dat ons Jehovah eer deur tot sy lof te sing, net soos Jesus en sy apostels gedoen het (Mark. 14:26). Wat Paulus in 1 Korinthiërs 14:15 oor sang gesê het, toon blykbaar dat dit ’n gereelde aspek van Christenaanbidding was. (Sien ook Ons Koninkryksbediening vir Februarie 1990, bladsy 4 en Maart 1991, bladsy 3.) Streekbyeenkomste bied ons ’n unieke geleentheid om met duisende van ons broers en susters verenig te wees en Jehovah deur sang sowel as gebed te loof. Sommige het egter ’n gebrek aan waardering vir hierdie belangrike aspekte van ons aanbidding getoon. Hoe? Deur sonder rede gedurende of ná die openingslied en -gebed by die byeenkoms op te daag. Aan die einde van die program verlaat sommige hulle sitplekke gedurende die lied en voor die gebed. By seldsame geleenthede is daar moontlik goeie rede hiervoor. Maar toon dit behoorlike respek en waardering vir Jehovah se tafel wanneer sommige die voorreg om saam te sing en saam te bid prysgee net sodat hulle vroeg by hulle motors kan kom of kan eet?—Matt. 6:33.
9 Ons moet versigtig wees dat ons nie in die najaging van persoonlike gerief toelaat dat die wêreld se “ek eerste”-gesindheid of goddelose eienskappe soos hebsug en selfsug ons geestelike groei belemmer nie. In onlangse jare kon baie van ons broers en susters in Oos-Europese lande uiteindelik die vryheid geniet om te sing en te bid. Net soos hulle verheug was dat hulle in groot getalle kon sing en bid, moet ons nou ook dieselfde gees van waardering vir heilige dinge toon en nooit ons geleenthede om saam te sing en te bid lig opneem nie.
10 ONS CHRISTELIKE MANIERE: Ons Christelike maniere en voorkoms by streekbyeenkomste het ons nog altyd ’n goeie reputasie as Jehovah se Getuies besorg. Dit is omdat ons aanbidding van Jehovah vir ons ’n saak van erns is en omdat ons nie die bywoning van ’n byeenkoms as bloot ’n sosiale uitstappie beskou nie. Wanneer ons by sulke spesiale geleenthede bymekaarkom, moet ons ons Christelike waardigheid en ’n geestelike gemoedstemming behou en ons te alle tye as bedienaars gedra.—1 Kor. 10:31-33.
11 As ons dit nie doen nie, benadeel ons die geluk van ander en struikel ons selfs nuwelinge. Erken ons en betuig ons waardering vir selfs klein vriendelike gebare teenoor ons? Ons moet bewus wees van ander om ons en respek en bedagsaamheid betoon. Almal moet besef dat wanneer die program aan die gang is dit tyd is om te luister en nie om rond te loop en te gesels nie.—Deut. 31:12.
12 Nog ’n gebied waarop ons Christelike maniere Jehovah God kan loof, is in ons optrede teenoor diegene wat vir ons huisvesting verskaf. Nie net ons kleredrag en gedrag moet sindelikheid en bedagsaamheid weerspieël nie, maar ook die manier waarop ons ander se eiendom behandel. Is daar rede waarom ’n gehuurde kamer nie netjies en skoon gelaat moet word nie? Onbedagsame optrede doen afbreuk aan ons goeie naam. Dit moet ons almal se voorneme wees om ons by die volgende streekbyeenkomste so te gedra dat ons “die leer van God, ons Verlosser, in alles kan versier”.—Tit. 2:10.
13 VIR OUERS: Jong kinders en tieners is welkom, en daar word van hulle verwag om na die “Liefhebbers van Vryheid”-Streekbyeenkoms te kom. Die vryheid wat die wêreld bied, kan tot hulle geestelike dood lei, net soos Adam die vryheid verloor het wat die mens in die begin gekry het. Jehovah se liefdevolle organisasie het ons almal van die regte beskouing oor hierdie saak voorsien. Hoe bemoedigend is dit tog om jongmense te sien wat geleer het om noukeurig aandag te skenk by alle Christelike vergaderinge en wat intens belangstel in die byeenkomsprogram (Ps. 148:12, 13). Maar baie hang van die ouers se voorbeeld en toesig af. Baie jongmense is goed opgelei om aantekeninge te maak. Indien jy jou kinders nog nie geleer het om aantekeninge te maak nie, kan jy gerus die tyd gebruik wat voor julle streekbyeenkoms oorbly om dit te doen. Selfs klein kindertjies kan aangemoedig word om teksverwysings en verwante sleutelwoorde wat die spreker gebruik neer te skryf. Sommige ouers reël om hoofgedagtes van die dag se program te hersien nadat hulle na hulle verblyfplek teruggekeer het of terwyl hulle huis toe ry.
14 Die meeste ouers besef natuurlik dat kinders die natuurlike neiging het om spelerig te wees. Hulle het ’n gebrek aan lewensondervinding en is onvolwasse. Hulle moet derhalwe geleer word wanneer om aandag te skenk en hoe om hulle by vergaderinge te gedra. Dit verg goeie toesig deur hulle ouers. Sommige ouers was nalatig op hierdie gebied. Hoewel ouers dalk gedurende gebed behoorlike eerbied vir Jehovah toon, speel hulle kinders soms en trek hulle ander se aandag af. Ouers moet weet wat hulle kinders selfs gedurende gebede doen. En wat doen hulle wanneer hulle gedurende die program hulle sitplekke verlaat? Word kinders gedurende of ná die byeenkomsprogram sonder toesig gelaat? (Spr. 29:15). Sommige kinders het hulle ongedissiplineerd en wanordelik gedra en was selfs oneerbiedig teenoor ouer broers en susters wat hulle vriendelik probeer reghelp het. Sulke wanordelikheid en gedrag wat nie by Christene pas nie, is dikwels die gevolg van permissiwiteit en ’n gebrek aan dissipline by die huis. Dit moet beslis reggestel word. Alle Christenouers moet te alle tye streng toesig oor hul kinders hou terwyl hulle hulle “in die tug en vermaning van die Here” opvoed.—Ef. 6:4.
15 JOU VOLLE SAMEWERKING WORD WAARDEER: Dit het baie beplanning en werk geverg om te sorg dat daar genoeg sitplek, lektuur, voedsel en ander voorsienings is vir almal wat die byeenkoms bywoon. Om die doeltreffendheid van hierdie reëlings te verseker, is elke gemeente na ’n spesifieke byeenkoms aangewys. Jou volle samewerking is belangrik om te voorkom dat ons mekaar verdring. Daar kan natuurlik omstandighede wees wat dit vir party nodig maak om ’n byeenkoms in ’n ander gebied by te woon. Die meeste sal egter die byeenkoms kan bywoon waarheen hulle aangewys is.—1 Kor. 13:5; Filip. 2:4.
16 Jou volle samewerking word versoek wat die hou van sitplekke betref. Hou asseblief in gedagte dat SITPLEKKE SLEGS GEHOU MAG WORD VIR JOU EIE GESIN EN PERSONE WAT SAAM MET JOU IN JOU MOTOR RY. Moet asseblief nie vir ander sitplekke hou nie. Soms word ekstra sitplekke bespreek vir niemand in die besonder nie. Dit is liefdeloos en verwar die saalwagters en ander wat na oop sitplekke soek. Ooreenkomstig Bybelse raad moet ons daarna strewe om broederlike geneentheid te toon en ten volle met die goedgekeurde reëling vir die hou van sitplekke saamwerk. Niemand is geregtig op meer sitplekke as wat vir sy eie gesin of motorgroep nodig is nie.—2 Pet. 1:7.
17 Sitplekke mag nie oornag gehou word nie. Geen byeenkomsfasiliteit sal voor 7:00 vm. oop wees vir enigiemand behalwe die vrywilligerwerkers wat voor daardie tyd aan diens is nie. Hierdie werkers mag nie sitplekke hou tot ná 7:00 vm. nie, wanneer ander toegelaat sal word om in die gebou in te gaan. Die saalwagters sal voor 7:00 vm. op hulle aangewese plekke wees om te verhinder dat die Genootskap se riglyne oor die hou van sitplekke veronagsaam word. Gee asseblief die saalwagters julle volle samewerking terwyl hulle hulle toewysing uitvoer tot voordeel van almal wat teenwoordig is.
18 Daar word voorgestel dat goeie oordeel aan die dag gelê word oor persoonlike items wat na die byeenkomsterrein gebring word. In die verlede het sommige groot koelhouers of ander groot items gebring wat nie onder hulle sitplek kon inpas nie. Dit is in die gangetjies of op stoele neergesit. Dit het veroorsaak dat ander nie ’n sitplek gehad het nie en het soms brand- en veiligheidsregulasies geskend. Ons moet bedagsaam wees in sulke aangeleenthede.
19 Soos verlede jaar sal die Genootskap voedsel teen ’n redelike koste beskikbaar stel aan diegene wat die byeenkoms bywoon. Watter wonderlike voorsienings is dit tog wat dit vir ons makliker maak om by die program baat te vind en dit te geniet. Sulke hulp van God se organisasie sal ons ongetwyfeld aanspoor om ons waardering op praktiese maniere te betuig (Spr. 11:25). Moet asseblief nie voedsel of ander byeenkomsvoorsieninge vermors nie.
20 Jehovah se volk waardeer dit beslis dat hulle by goeie fasiliteite bymekaar kan kom om baat te vind by die geestelike program wat voorberei is. Ons waardeer ook die talle dienste en geriewe wat by sulke samekomste voorsien word. Reëlings word met baie sorg en teen aansienlike koste vir die Genootskap getref vir genoeg sitplek, die installering van duur klankstelsels, ’n doeltreffende departement vir voedselverskaffing en die hantering van ’n aantal ander reëlings en dienste wat dit aangenaam en geestelik verkwikkend maak om die byeenkoms by te woon.
21 Hierdie onkoste word gedek deur julle vrywillige bydraes en ondersteuning van die Genootskap se werk wat wêreldwyd gedoen word. Met die oog op die hoë koste van al die fasiliteite en ander noodsaaklikhede sal jy moontlik graag voor die tyd ’n bydrae wil stuur na die byeenkomsstad waar julle gemeente die byeenkoms gaan bywoon. As jy graag ’n tjek wil uitskryf, kan dit aan die “Watch Tower Convention” uitgemaak word. Gerieflikheidshalwe sal bydraebussies wat duidelik gemerk is oral by die byeenkoms beskikbaar wees. Alle bydraes word baie waardeer en die Genootskap wil julle graag by voorbaat bedank vir julle ruimhartige en verenigde ondersteuning van Koninkryksbelange op hierdie wyse. Een persoon het waardering uitgespreek vir die feit dat daar nie ’n spesifieke bedrag as bydrae gevra word nie: ‘Dit is so aangenaam om te weet dat dit aan ons oorgelaat word—aan die diepte van ons waardering. Dit is dus met dankbaarheid dat ons aangespoor voel om meer as gewoonlik te gee.’ Ons is vol vertroue dat almal sal besef wat hulle persoonlike verantwoordelikheid met betrekking tot hierdie uitgawes is en hulle hulle volle samewerking sal gee soos hulle omstandighede hulle toelaat.—Luk. 6:38.
22 KOM NA DIE “LIEFHEBBERS VAN VRYHEID”-STREEKBYEENKOMS! As ons die “Liefhebbers van Vryheid”-Streekbyeenkoms bywoon en goed aandag skenk aan die program sal dit ons waardering vergroot vir die vryheid wat deur Christus kom en ons help om ons Christelike vryheid reg te gebruik. Tref nou reëlings om teenwoordig te wees vir die openingslied en om al die sessies tot die slotgebed Sondagmiddag by te woon.
[Venster op bladsy 6]
Herinneringe in verband met die Streekbyeenkoms
HUISVESTING: Die meeste verkondigers sal hulle eie reëlings vir huisvesting tref. As jy egter wil hê dat die byeenkomsorganisasie vir jou huisvesting moet reël, kan jy ’n Kameraansoekvorm by die gemeentelike sekretaris kry. Gemeentelike sekretarisse moet seker maak dat hulle die Kameraansoekvorms onmiddellik na die gepaste byeenkomsadres stuur.
KINDERWAENTJIES: Kinderwaentjies mag op baie plekke nie in openbare vergaderplekke gebruik word nie. Brandregulasies verbied dat hulle in deurgange, paadjies of tussen rye sitplekke staan. Aangesien groter skares samedromming kan veroorsaak, is kinderwaentjies potensieel gevaarlik nie net vir die kind nie, maar ook vir enigiemand wat daaroor kan struikel. Moet hulle dus asseblief nie na die byeenkomsterrein bring nie. Babastoeltjies of reisstoeltjies is egter toelaatbaar, aangesien dit aan stoele langs die ouers vasgemaak kan word. Ons sal julle samewerking op hierdie gebied waardeer.
DOOP: Doopkandidate moet probeer om hulle sitplekke in die aangewese gedeelte in te neem vóór die program Saterdagoggend begin. Elkeen wat beplan om hom te laat doop, moet ’n beskeie baaikostuum en ’n handdoek saambring. Ná die dooptoespraak en gebed deur die spreker sal die sessievoorsitter kortliks instruksies aan die doopkandidate gee en dan die lied aankondig. Aan die begin van die laaste vers sal die saalwagters die doopkandidate na die doopplek lei terwyl die res van die gehoor die lied klaar sing. Aangesien doop as simbool van ’n mens se toewyding ’n intieme en persoonlike saak tussen die individu en Jehovah is, is daar geen voorsiening vir gesamentlike doop waartydens twee of meer doopkandidate mekaar omhels of hande vashou terwyl hulle gedoop word nie. Die doopkandidate hoef nie ’n brief van die ouere manne te bring wat sê dat hulle gedoop mag word nie. Gemeentelike ouere manne moet ook nie ’n lys inhandig met die name van diegene wat gedoop gaan word nie.
VRYWILLIGERDIENS: Vrywilligerhulp is nodig om ’n streekbyeenkoms glad te laat verloop. Selfs as jy net vir ’n gedeelte van die byeenkoms kan werk, sal jou dienste waardeer word. As jy kan help, moet jy asseblief by die Vrywilligerafdeling aanmeld wanneer jy by die byeenkoms aankom. Kinders onder 16 jaar kan ook bydra tot die sukses van die byeenkoms, maar hulle moet saam met ’n ouer of ander verantwoordelike volwassene werk. Ons wil alle vrywilligers aanmoedig om betyds te wees vir hulle werktoewysing. Dit is uiters noodsaaklik dat departementele opsieners of opsieners van ’n deel van ’n departement voor die tyd by hulle toewysing is. As daar om die een of ander rede ’n vertraging is, moet hulle asseblief die byeenkomsopsiener daarvan in kennis stel.
LIEDERE: Aangesien sang ’n deel van ons aanbidding is, moedig ons almal aan om die volgende liedere wat deel van die program sal wees te oefen: 19, 34, 172, 85, 136, 117, 121, 13, 155, 113, 105, 215, 174, 10, 53, 191, 212. Ons stel voor dat julle die Genootskap se kassette gebruik wanneer julle die liedere oefen.
PROGRAMTYE: Dit is verstandig en toon waardering as ons in ons sitplek is wanneer die program begin. Dit sal 10:20 vm. op die eerste dag wees. Tref reëlings om tot aan die einde van die sessies te bly. Die slotlied en gebed sal om 4:00 nm. op die laaste dag wees.
LAPELKAARTE: Dra asseblief die spesiaal ontwerpte lapelkaarte by die byeenkoms en terwyl julle na en van die byeenkomsterrein reis. Dit gee ons dikwels die geleentheid om ’n goeie getuienis te gee terwyl ons reis. Julle moet die lapelkaarte by julle gemeente kry, aangesien dit nie by die byeenkomste beskikbaar sal wees nie.
BETHELVERGADERING: Daar sal op die tweede dag ’n vergadering gehou word vir enige toegewyde verkondiger tussen 19 en 35 jaar wat graag in Bethel wil dien. Aankondigings oor die presiese tyd en plek van hierdie vergadering sal by die byeenkoms gedoen word.
PIONIERIDENTIFIKASIE: Alle gewone en spesiale pioniers, reisende opsieners, sendelinge en Bethelwerkers moet hulle identifikasiekaart (S-202) na die byeenkoms saambring. Diegene wat ten tyde van die streekbyeenkoms wat hulle bywoon reeds ses maande in voltydse diens is, kan byeenkomskaartjies ter waarde van R20 ontvang wanneer hulle hulle identifikasiekaart toon. Pas die kaart so goed op soos jy kontant sal oppas. Dit kan nie by die byeenkoms vervang word nie. Enige gratis publikasie of ander lektuur teen pioniertarief sal net by die boekekamer vir die pioniers beskikbaar wees.
’N WOORDJIE VAN WAARSKUWING: Sluit te alle tye jou motor en moet nooit enigiets oop en bloot in jou motor laat nie, ongeag waar jy parkeer. Sluit jou besittings in die bagasiebak toe, indien moontlik. Pas ook op vir diewe en sakkerollers wat deur groot byeenkomste gelok word. Dit beteken dat geen waardevolle artikels onbewaak op sitplekke by die byeenkomste gelaat moet word nie. Wees asseblief versigtig.