’n Voorbeeld wat noukeurig gevolg moet word
1 Jesus was ongetwyfeld die grootste mens wat nog geleef het. Hy het ’n volmaakte voorbeeld vir sy dissipels gestel. Hoewel ons nie aan sy standaard van volmaaktheid kan voldoen nie, word ons aangespoor om ‘sy voetstappe noukeurig te volg’ (1 Pet. 2:21, NW). Dit moet ons begeerte wees om Jesus so noukeurig moontlik na te volg en die waarheid ywerig aan ander bekend te maak.
2 Jesus was nie net ’n prediker nie; hy was ’n voortreflike leermeester. ‘Die skare was verstom oor sy manier van leer’ (Matt. 7:28, NW). Waarom het hy soveel welslae behaal? Kom ons kyk noukeurig na sy “manier van leer”.
3 Hoe ons Jesus kan navolg: Jesus is deur sy Vader geleer (Joh. 8:28). Sy beweegrede was om Jehovah te eer en Sy naam te verheerlik (Joh. 17:4, 26). In ons predikings- en onderrigtingswerk moet ons beweegrede ook wees om Jehovah te eer en nie die aandag op onsself te vestig nie.
4 Alles wat Jesus geleer het, was op God se Woord gebaseer. Hy het voortdurend verwys na wat in die geïnspireerde Skrif geskryf was (Matt. 4:4,7; 19:4; 22:31). Ons wil diegene wat na ons luister na die Bybel rig; sodoende toon ons vir hulle dat die dinge wat ons verkondig en aan ander leer op die hoogste gesag gebaseeris.
5 Jesus het kort, praktiese, eenvoudige uitdrukkings gebruik. Toe hy byvoorbeeld verduidelik het hoe ons God se vergifnis kan verkry, het hy ons aangemoedig om self vergewensgesind teenoor ander te wees (Matt. 6:14, 15). Ons moet die Koninkryksboodskap in eenvoudige, alledaagse terme probeer verduidelik.
6 Jesus het op bekwame wyse illustrasies en vrae gebruik om die denke van ander te stimuleer (Matt. 13:34, 35, vgl. NW; 22:20-22). Illustrasies oor gewone, alledaagse sake kan mense help om ingewikkelde Bybelleerstellings te verstaan. Ons moet vrae vra sodat diegene wat na ons luister, aangemoedig word om na te dink oor wat hulle hoor. Uitlokvrae kan hulle help om tot die regte gevolgtrekkings te kom.
7 Jesus het tyd ingeruim om moeilike sake te verduidelik aan diegene wat meer inligting gevra het. Diegene wat werklik belanggestel het, soos sy dissipels, kon verstaan wat Jesus geleer het (Matt. 13:36). Ons moet eweneens hulpvaardig wees wanneer vrae in alle opregtheid gevra word. As ons nie die antwoorde ken nie, kan ons navorsing oor die onderwerp doen en later met die inligting terugkeer.
8 Jesus het praktiese lesse gebruik om te onderrig. ’n Voorbeeld hiervan was toe hy sy dissipels se voete gewas het, al was hy hulle Meester (Joh. 13:2-16). As ons ’n nederige gesindheid openbaar, sal diegene wat geleer word, aangespoor word om toe te pas wat hulle leer.
9 Jesus het mense se harte probeer bereik en ’n beroep op hulle liefde vir regverdigheid gedoen. Ons wil ook harte bereik. Ons probeer ’n beroep doen op die ingebore begeerte van alle mense om iemand hoër te aanbid en om in vrede en geluk met ander te lewe.
10 Gedurende Desember kan ons wat ons oor Jesus geleer het aan ander verkondig deur die boek Die grootste mens wat nog geleef het aan te bied. As ons Jesus se onderrigmetodes volg, kan dit opregtes aanspoor om te luister terwyl ons verduidelik wat hy geleer het.—Matt. 10:40.