Dankbaar vir wat ons het
1 “God beveel sy eie liefde by ons aan daarin dat Christus vir ons gesterf het terwyl ons nog sondaars was” (Rom. 5:8). Hoe dankbaar behoort ons almal tog te wees vir die hoogste offer wat Jehovah God en sy Seun ten behoewe van ons gebring het! Deur middel van Christus se vergote bloed kry ons die geleentheid om die ewige lewe te ontvang, iets wat geen mens ons kan gee nie.
2 Hoe kan ons ons waardering toon? Daar is baie mense wat na ware kennis dors, wat slegs in God se Heilige Woord voorkom. Dit is Jehovah se wil dat hulle tot ’n kennis van die waarheid kom (1 Tim. 2:4). Ons toon ons waardering vir die waarheid deur ‘die goeie nuus van die Koninkryk van God bekend te maak’ (Luk. 4:43). Heelhartige deelname aan hierdie werk toon dat ons waardeer dat Christus vir ons gesterf het en dat ons hom wil navolg deur getrou sy opdrag uit te voer om dissipels van ander te maak.—Matt. 28:19,20.
3 Wat is van die fasette van die predikingswerk waaraan ons kan deelneem? Is dit vir ons moontlik om van tyd tot tyd as hulppioniers te dien? Ná party die koste bereken het, kan hulle moontlik die gewone pionierdiens betree. Deur hierdie uitstekende geleenthede te benut, kan ons meer tyd aan die verkondiging van die goeie nuus van die Koninkryk bestee. In die verlede het jy dit dalk oorweeg om die pionierdiens te betree, maar daar was struikelblokke. Miskien het jou omstandighede verander. Indien wel, het jy al ernstig daaroor nagedink om die pionierdiens te betree of om as hulppionier te dien?
4 Ons dankbaarheid verinnig wanneer ons sien wat om ons plaasvind. Daar is ’n wêreldwye toename in geweld, haat en tweedrag. Paulus het ons tyd gepas beskryf as “kritieke” tye wat “moeilik is om deur te kom” (2 Tim. 3:1). Te midde van hierdie onrusbarende toestande het ons ’n oorvloed van goeie nuus om aan ander mee te deel. Ons het twee uitstekende tydskrifte, Die Wagtoring en die Ontwaak! Gedurende April sal ons intekeninge op Die Wagtoring aanbied. Waar mense die aanbod van die hand wys, kan ons twee tydskrifte by hulle laat. Ons het ook brosjures oor ’n aantal onderwerpe. Hierdie publikasies kan ware verkwikking bring vir dié wat dit lees. Dankbaarheid vir wat ons het, behoort ons te beweeg om dit mildelik aan ander mee te deel.—Heb. 13:16.
5 In die gebied waar jy woon, toon mense dalk min belangstelling in geestelike dinge. In teenstelling hiermee is daar gebiede wat vrugbaar is. Baie belangstellendes word in ons swart veld gevind. Is dit moontlik dat jy, as jy ander swart tale kan praat, in ’n gebied êrens in hierdie land kan werk waar jou hulp werklik nodig is? Jou kringopsiener het dalk wenke in hierdie verband of jy kan aan die takkantoor skryf.
6 Ons het alle rede om dankbaar te wees vir wat ons het, waarlik ’n oorvloed van goeie dinge. Die beste manier waarop ons ons dank aan Jehovah kan betoon, is deur sy naam en voornemens aan ander bekend te maak.—Jes. 12:4,5.