Goeie nuus vir die sagmoediges
1 Ons lewe in ’n tyd waarin oordeel binnekort voltrek gaan word (Eseg. 9:5,6). Dit is dringend dat sagmoediges in die hele wêreld ingelig word sodat hulle hulle kan voorberei vir wat voorlê. Weens sy liefderyke goedhartigheid het Jehovah sy volk beveel “om goeie nuus aan die sagmoediges te verkondig” (Jes. 61:1,2, NW). Ons tydskrifte help ons om hierdie goeie nuus wyd en syd bekend te maak.
2 Die Wagtoring en Ontwaak! voorsien vaste geestelike voedsel wat ons versterk en aanspoor. Die Wagtoring troos sagmoediges met die goeie nuus dat God se Koninkryk die aarde binnekort in ’n paradys gaan omskep. Die Ontwaak! bou vertroue op in die Skepper se belofte van ’n vreedsame en veilige nuwe wêreld. Wêreldwye verspreiding van hierdie tydskrifte is een van die vinnigste maniere waarop die goeie nuus na die sagmoediges gebring kan word. Watter gesprekspunte in die jongste tydskrifte kan ons gebruik?
3 Jy kan “Die Wagtoring” van 1 Mei aanbied deur die artikel “Vind baat by daaglikse Bybellees” te gebruik en die vraag te vra:
◼ “Watter voordeel dink jy hou dit vir ons in om die Bybel te lees? [Laat die huisbewoner antwoord.] Die Bybel self, in Romeine 15:4, help ons om oor dié vraag te redeneer. [Lees Romeine 15:4.] Die meeste mense in ons gemeenskap het ’n Bybel, maar daar is min wat die tyd vind om dit gereeld te lees. Ons glo dat die enigste betroubare hoop vir die toekoms in die Bybel gevind kan word, en ons sal geseën word as ons dit lees.” Lewer verdere, gepaste kommentare en bied dan die intekening aan. As die intekening van die hand gewys word, kan jy twee tydskrifte aanbied.
4 “Die Wagtoring” van 15 Mei het ’n interessante artikel met die titel: “’n Nuwe lewe vir ons voorouers.” Jy sal moontlik met hierdie inleiding belangstelling kan wek:
◼ “Baie het al dikwels gewonder watter soort mense hulle voorouers was. Aangesien hulle dood en begrawe is, kom die meeste mense tot die slotsom dat ons nooit sal weet nie. Dink jy daar bestaan ’n moontlikheid dat ons ooit ons voorouers sal leer ken?” Laat die huisbewoner antwoord. Lees Johannes 5:28, 29 en verduidelik hoe God belowe het om aan hulle ’n nuwe lewe in ’n paradysaarde te gee.
5 Jy kan die “Ontwaak!” van 8 Mei aanbied deur ’n vraag te stel:
◼ “Wat dink jy is nodig om die lewe werklik die moeite werd te maak?” Laat die huisbewoner antwoord. Verwys na die artikel “Wat is die sin van die lewe?”, bladsy 26, en lees Salomo se woorde in Prediker 2:11. Vestig dan die aandag op sy raad in hoofstuk 12, vers 13. Nooi die huisbewoner om ’n intekening op die tydskrif te neem. As hy nie genoeg geld het nie, kan jy ’n halfjaarlikse intekening of twee tydskrifte aanbied.
6 As jy die tydskrifte voor 14 Mei aanbied, moet jy nie vergeet om eksemplare van die Koninkryksnuus Nr. 34 by jou te hê en dit aan te bied vir enigeen wat nog nie een het nie. Ons moet altyd gereed wees om ons lektuur aan te bied en besef dat dit moontlik gelees kan word deur ander in die gesin sowel as deur vriende wat hulle dalk besoek (1 Tim. 6:18). Die goeie nuus wat ons na sagmoediges bring, kan hulle lewens red.—1 Tim. 4:16.