Ons het die gemeente nodig
1 Die seuns van Korag het eenkeer hulle waardering vir Jehovah se gemeente so uitgedruk: “’n Dag in u voorhowe is beter as duisend [elders]” (Ps. 84:11). In hulle oë kon die wêreld hulle niks aanbied wat hiermee vergelyk het nie. As jy ook so daaroor voel, moet jy die gemeente die middelpunt van jou lewe maak.
2 Die Christengemeente het van sy ontstaan af getoon dat dit Jehovah se seën geniet (Hand. 16:4,5). Nie een van ons moet die gemeente as vanselfsprekend aanneem of meen dat dit bloot ’n manier is om ons fisies bymekaar te bring nie. Die gemeente is die saamtrekpunt vir Jehovah se Getuies in elke gemeenskap. Dit maak verenigde omgang moontlik sodat ons deur Jehovah onderrig en vir Koninkryksbedrywigheid georganiseer kan word.—Jes. 2:2.
3 Die Christengemeente is ’n basiese kanaal om ons die waarheid te leer (1 Tim. 3:15). Jesus se volgelinge moet ‘almal een wees’—in eenheid met God, met Christus en met mekaar. (Joh. 17:20,21; vergelyk Jesaja 54:13.) Ongeag waar ons in die wêreld gaan, ons broers glo die Bybel se leringe en beginsels, en hulle tree in ooreenstemming daarmeeop.
4 Ons word opgelei en toegerus om ons toewysing om dissipels te maak te volbring. Die Wagtoring, Ontwaak! en Ons Koninkryksbediening gee ons elke maand nuttige inligting om ons te help om besprekings uit die Bybel te begin. Die vergaderinge word voorberei om ons te wys hoe ons belangstelling kan vind en kan kweek. Die vermeerdering wat ons oor die hele wêreld sien, bewys dat ons Goddelike ondersteuning in hierdie werk het.—Matt. 28:18-20.
5 Deur die gemeente ontvang ons daaglikse bemoediging om ons “tot liefde en voortreflike werke aan te spoor” (Heb. 10:24, 25). Ons word versterk om beproewinge getrou te verduur. Liefdevolle opsieners help ons om druk en sorge die hoof te bied (Pred. 4:9-12). Ons word die nodige raad gegee wanneer ons gevaar loop om af te dwaal. Watter ander organisasie voorsien sulke liefdevolle sorg?—1 Tess. 5:14.
6 Dit is Jehovah se wil dat ons na aan sy organisasie bly om ons eenheid te bewaar (Joh. 10:16). Een manier waarop die gemeente ons help om met die ‘getroue slaaf’-klas in aanraking te bly, is deur reisende opsieners vir ons bemoediging uit te stuur. Wanneer ons op liefdevolle leiding reageer, skep dit ’n hegte verhouding tussen ons wat ons help om geestelik sterk te bly.
7 Die gemeente is onontbeerlik vir ons geestelike oorlewing. Dit is onmoontlik om Jehovah daarsonder op aanvaarbare wyse te dien. Laat ons dus vashou aan wat Jehovah voorsien het. Mag ons in ooreenstemming met die doelwitte daarvan optree en in opregtheid die raad toepas wat ons daar ontvang. Dit is slegs op hierdie manier dat ons kan toon hoe belangrik die gemeente vir ons is.—Ps. 27:4.