Help waarheidsoekers in hulle soeke na God
1 Jesus het gesê: “Die goeie nuus [moet] eers in al die nasies verkondig word” (Mark. 13:10). Dit het beteken dat sy dissipels met mense van baie verskillende tale, kulture en godsdiensagtergronde in aanraking sou kom. Dit beteken ook dat sy hedendaagse dissipels, Jehovah se Getuies, die toewysing het om allerlei mense te leer. Die wêreld se miljarde mense, van alle godsdiensagtergronde, het kennis nodig wat slegs God kan gee—kennis van hom en van sy Seun, Jesus Christus.—Spr. 2:1-6; Joh. 17:3.
2 Aangesien dit Jehovah God se wil is dat alle soorte mense gered moet word en tot juiste kennis van die waarheid moet kom, is dit ’n voorreg vir ons om baie meer te help om lowers van hom te word (1 Tim. 2:3,4). Gedurende November sal ons, met behulp van die boek Die mensdom se soeke na God en die Nuwe Wêreld-vertaling van die Christelike Griekse Geskrifte, baie in die Christendom sowel as diegene van nie-Christelike en Godlose agtergronde kan help om Jehovah “met gees en waarheid” te begin aanbid.—Joh. 4:23.
3 Die mensdom se soeke na God het ons gehelp om ’n duideliker begrip van ander godsdienste en hulle geskiedkundige agtergrond te hê. Dit is ’n hulpmiddel om die goeie nuus op doeltreffende wyse te verkondig aan almal wat ons teëkom. Dit beantwoord honderde vrae oor die basiese opvattings van die wêreld se hoofgodsdienste. Watter onderwerpe in hierdie waardevolle hulpmiddel kan ons gebruik om opregte mense aan te moedig om meer omtrent God te leer?
4 ’n Fundamentele vraag wat regdeur die boek bespreek word, is: Het die mens ’n onsterflike siel wat ná sy dood voortleef en na ’n hiernamaals gaan? Byna elke godsdiens leer daardie opvatting in die een of ander vorm. Ander vrae wat in die boek bespreek word, is: Is daar ’n plek soos die hel waar siele gepynig word? Wat is die ware hoop vir die dode? Is daar een God of is daar baie gode? Die aandag kan gevestig word op die vrae op bladsye 17 en 18 van die boek. Selfs wanneer ons met ’n ateïs of ’n agnostikus praat, kan die inligting op bladsy7, paragraaf9, sy belangstelling wek en dalk tot ’n goeie bespreking lei.
5 Ons moet natuurlik altyd taktvol wees. Ons wil nie argumente uitlok nie, maar wil eerder met mense redeneer. Ons het alle rede om entoesiasties te wees oor die aanbieding van hierdie boek. As ons goed vertroud is met die inhoud daarvan, sal ons geleenthede vind om die belangstelling te wek van opregte mense van baie godsdiensagtergronde. Mag ons ywer vir hierdie diens aan die dag lê. Die hele mensdom moet na God soek en nou sy guns probeer verkry. Wêreldgebeure toon dat Armageddon vinnig nader kom. Dit is ’n tyd vir ywerige optrede.
6 Mag ons daarin volhard om waarheidsoekers te vind en hulle verhouding met die God van waarheid te versterk. Hy kan gevind word!