Laat jou lig voortdurend skyn

¹ Wat is lig? Die woordeboek definieer dit as “iets wat sig moontlik maak”. Maar ondanks die mens se gevorderde tegnologie ken hy steeds nie ten volle die antwoord op die vraag wat Jehovah geopper het soos dit in Job 38:24 opgeteken staan nie. Kan ons sonder lig klaarkom? Sonder lig kan ons nie bestaan nie. Lig is noodsaaklik vir fisiese gesigsvermoë, en die Bybel deel ons mee dat “God” geestelik gesproke “lig is” (1 Joh. 1:5). Ons is heeltemal afhanklik van die Een wat ‘vir ons lig geeʼ.—Ps. 118:27.

² In fisiese sin is dit waar, maar in geestelike sin selfs nog meer. Valse godsdiens het die meeste mense mislei en hulle in geestelike duisternis gelaat sodat hulle ‘langs die muur rondtas soos blindesʼ (Jes. 59:9, 10). Jehovah ‘stuur sy lig en waarheidʼ uit omdat hy deur sy ongeëwenaarde liefde en medelye beweeg word (Ps. 43:3). Letterlik miljoene waarderende mense het gunstig daarop gereageer en “uit die duisternis tot in sy wonderbare lig” gekom—1 Pet. 2:9.

³ Jesus Christus speel ʼn baie belangrike rol daarin om hierdie lig na die wêreld te bring. Hy het gesê: “Ek het as ʼn lig in die wêreld ingekom, sodat elkeen wat geloof in my stel nie in die duisternis sal bly nie” (Joh. 12:46). Al sy tyd, energie en middele was daarop gerig om die lig van waarheid bekend te maak. Hy het oor die lengte en breedte van sy geboorteland gereis en in feitlik elke stad en dorp gepreek en onderrig. Hy het genadelose vervolging van alle kante verduur, maar hy het onwrikbaar gebly by sy opdrag om die lig van waarheid te versprei.

⁴ Jesus het met ʼn spesifieke doel voor oë dissipels uitgekies, opgelei en georganiseer. In Matteüs 5:14-16 lees ons sy instruksies aan hulle: “Julle is die lig van die wêreld. . . . Laat julle lig . . . voor die mense skyn, sodat hulle julle voortreflike werke kan sien en heerlikheid kan gee aan julle Vader wat in die hemele is.” Net soos Jesus moes hulle “ligte in die wêreld” wees en die lig van waarheid wyd en syd versprei (Fil. 2:15). Hulle het daardie verantwoordelikheid met graagte aanvaar en dit as hulle hoofdoel in die lewe beskou. ʼn Ruk later kon Paulus sê dat die goeie nuus “verkondig is in die hele skepping wat onder die hemel is” (Kol. 1:23). Die hele Christengemeente was verenig in die vol-brenging van daardie groot werk.

⁵ Ons moet vandag dankbaar wees dat ons onder diegene is wat “die werke wat tot die duisternis behoort, [afgelê]” het (Rom. 13:12, 13). Ons kan ons waardering toon deur die voorbeeld na te volg wat deur Jesus en die getroue Christene in die verlede gestel is. Dit is nou dringender en belangriker as ooit tevore in die mensegeskiedenis dat ander die waarheid hoor. Geen ander bedrywigheid kan naastenby vergelyk word met hierdie werk wat die drin-gendheid en verreikende voordele daarvan betref nie.

⁶ Hoe kan ons as ligte skyn? Die belangrikste manier om ons lig te laat skyn, is om aan die Koninkrykspredikingswerk deel te neem. Elke gemeente het gereelde, georganiseerde reëlings om die predikingswerk in sy toegewese gebied te doen. ʼn Groot verskeidenheid lektuur word in groot hoeveelhede en in baie tale beskikbaar gestel. Omvattende opleiding word deur die vergaderinge voorsien, en diegene wat ervare is, verleen persoonlike hulp om ander op te lei. Daar is ʼn geleentheid vir mans, vrouens, ouer persone en selfs kinders om ʼn deelname daaraan te hê. Elkeen in die gemeente word uitgenooi om na gelang van sy vermoëns en omstandighede daaraan deel te neem. Al die werksaamhede van die gemeente is op die predikingswerk toegespits, met voorsienings om elke lid te help om op die een of ander manier ʼn aandeel daaraan te hê. Gereelde, noue omgang met die gemeente is die beste manier om te verseker dat ons lig aanhou skyn.

⁷ Ons kan op maniere skyn wat nie ʼn mondelinge getuienis behels nie. Ons kan bloot deur ons gedrag ander se aandag trek. Dit is wat Petrus in gedagte gehad het toe hy gemaan het: “Handhaaf voortreflike gedrag onder die nasies, sodat hulle ... as gevolg van julle voortreflike werke waarvan hulle ooggetuies is, God . . . sal verheerlik” (1 Pet. 2:12). Baie oordeel ʼn werk of ʼn organisasie volgens die gedrag van diegene wat daaraan verbonde is. Wanneer waarnemers mense sien wat sedelik rein, eerlik, vredeliewend en wetsgehoorsaam is, beskou hulle sulke mense as anders en maak hulle die gevolgtrekking dat hierdie mense volgens baie hoër standaarde lewe as die waarvolgens die meeste mense lewe. ʼn Man laat dus sy lig skyn wanneer hy sy vrou op ʼn liefdevolle manier eer en koester; die vrou doen dieselfde deur haar man se hoofskap te eerbiedig. Kinders is opvallend anders wanneer hulle hulle ouers gehoorsaam en geslagsonsedelikheid en dwelmmisbruik vermy. ʼn Werknemer wat pligsgetrou, eerlik en bedagsaam is, word hoog op prys gestel. Deur hierdie Christelike eienskappe aan die dag te lê, laat ons ons lig skyn en beveel ons ons lewenswyse by ander aan.

⁸ Om te getuig, beteken om met ander te praat oor wat ons uit God se Woord geleer het. Dit word van die verhoog af of by die deure gedoen, maar dit word geensins tot sulke geleenthede beperk nie. Ons daaglikse bedrywighede bring ons in aanraking met talle mense. Hoeveel keer per dag praat jy met jou buurmense? Hoe dikwels klop iemand aan jou deur? Met hoeveel verskillende mense kom jy in aanraking wanneer jy jou inkopies doen, die bus neem of jou sekulêre werk doen? Kan jy, as jy ʼn jongmens op skool is, die aantal mense tel met wie jy elke dag praat? Die geleenthede om met ander te praat, is feitlik onbeperk. Al wat jy moet doen, is om aan ʼn paar skriftuurlike gedagtes te dink, ʼn Bybel en ʼn paar traktate byderhand te hou en die inisiatief te neem om te getuig wanneer jy die geleentheid kry.

⁹ Al is dit redelik maklik om informele getuieniswerk te doen, is party huiwerig om dit te probeer. Hulle is dalk terughoudend en hou vol dat hulle te skaam of te senuweeagtig is om vreemdelinge te nader. Hulle is dalk bang om die aandag op hulleself te vestig of dat hulle ʼn kwaai reaksie sal kry. Diegene wat ervare in informele getuieniswerk is, sal jou verseker dat daar selde enige rede tot kommer is. Ander is basies net soos ons; hulle het dieselfde behoeftes, ervaar dieselfde bekommernisse en wil dieselfde dinge vir hulleself en hulle gesinne hê. Die meeste sal gunstig reageer op ʼn vriendelike glimlag of ʼn hartlike groet. Jy sal dalk ‘vry-moedigheid bymekaar moet skraapʼ om aan die gang te kom (1 Tess. 2:2). Maar as jy eers op dreef kom, sal jy dalk verbaas en verheug wees oor die resultate.

¹⁰ Ons word geseën wanneer ons ons lig laat skyn: Hier is ʼn paar voorbeelde van verkwikkende ondervindinge wat die resultaat van informele getuieniswerk is: ʼn Vyf-en-vyftigjarige vrou het die straat probeer oorsteek. Net toe ʼn motor haar sou raakry, het ʼn suster haar arm gegryp en haar uit die pad geruk en gesê: “Wees asseblief versigtig. Ons lewe in gevaarlike tye!” Sy het toe verduidelik waarom die tye so gevaarlik is. Die vrou het gevra: “Is jy een van Jehovah se Getuies?” Nadat die vrou een van ons boeke by haar suster gekry het, wou sy een van Jehovah se Getuies ontmoet, en hierdie voorval het dit moontlik gemaak.

¹¹ ʼn Suster het ʼn gesprek aangeknoop met ʼn vrou in ʼn dokter se wagkamer. Die vrou het aandagtig geluister en toe gesê: “Ek loop Jehovah se Getuies kort-kort raak; maar as ek ooit die een of ander tyd in die toekoms een van Jehovah se Getuies word, sal dit wees oor wat jy my nou vertel het. Wanneer ek na jou luister, is dit asof ek ʼn lig in ʼn donker plek begin sien.”

¹² ʼn Goedhartige daad kan ʼn trapklip wees om ander die waarheid te help leer. Terwyl twee susters ná velddiens huis toe geloop het, het hulle ʼn bejaarde vrou gesien wat siek gelyk het toe sy van die bus afgeklim het. Hulle het die vrou gaan vra of sy hulp nodig het. Sy was so verbaas dat twee volslae vreemdelinge belangstelling in haar toon dat sy daarop aangedring het om te weet wat tot so ʼn goedhartige daad aanleiding gegee het. Dit het die weg gebaan vir ʼn getuienis om gegee te word. Die vrou het haar adres gegee en hulle hartlik uitgenooi om haar te besoek. ʼn Studie is begin. Die vrou het kort voor lank vergaderinge begin bywoon en maak nou die waarheid aan ander bekend.

¹³ ʼn Bejaarde suster doen vroeg in die oggend getuieniswerk op die plaaslike strand. Sy ontmoet huisbediendes, kinderoppassers, bankklerke en ander wat in die oggend langs die strand gaan stap. Sy hou Bybelstudies terwyl hulle op die bankies sit. Etlike mense het al die waarheid by haar geleer en is nou Jehovah se Getuies.

¹⁴ By haar sekulêre werk het ʼn suster ʼn mede-werker oor ʼn politieke party hoor praat wat volgens haar die wêreld se probleme kan oplos. Die suster het die geleentheid gebruik en haar van beloftes vertel oor wat God se Koninkryk gaan doen. Hierdie bespreking by die werk het tot ʼn gereelde tuisbybelstudie aanleiding gegee, en die vrou en haar man het op die ou end Getuies geword.

¹⁵ Moet nooit vergeet dat jy ʼn Getuie is nie! Toe Jesus sy dissipels as “die lig van die wêreld” beskryf het, het hy geredeneer dat hulle ander moet help om baat te vind by die geestelike verligting van God se Woord. Hoe sal ons ons bediening beskou as ons Jesus se raad toepas?

¹⁶ Party mense kies ʼn deeltydse betrekking wanneer hulle werk soek. Hulle beperk die tyd en inspanning wat hulle daaraan bestee, omdat hulle verkies om die meeste van hulle tyd te gebruik om bedrywighede na te streef wat hulle lonender vind. Het ons ʼn soortgelyke beskouing van ons bediening? Gee ons die voorkeur aan ander belange, hoewel ons dalk verplig voel en selfs gewillig is om tyd vir die bediening in te ruim?

¹⁷ Met die wete dat daar nie so iets soos ʼn deeltydse Christen is nie, het ons ons toegewy, ‘onsself verloënʼ en ingestem om Jesus “voortdurend” te volg (Matt. 16:24). Ons begeerte is om voort te gaan om alles met ons “hele siel” te doen en elke geleentheid te benut om ons lig te laat skyn sodat ons mense kan bereik waar hulle ook al is (Kol. 3: 23, 24). Ons moet wêreldse gesindhede weerstaan, ons ywer behou wat ons aan die begin gehad het en seker maak dat ons lig voortdurend helder skyn. Party het dalk toegelaat dat hulle ywer verkoel en hulle lig net ʼn dowwe skynsel word wat skaars oor ʼn kort afstand sigbaar is. So iemand het dalk hulp nodig om verlore ywer vir die bediening te herwin.

¹⁸ Party is moontlik geneig om terug te hou omdat ons boodskap vir baie ongewild is. Paulus het gesê dat die boodskap oor die Christus “dwaasheid [is] vir die wat vergaan” (1 Kor. 1:18). Maar ongeag wat ander gesê het, het hy kragtig verklaar: “Ek skaam my nie oor die goeie nuus nie” (Rom. 1:16). Iemand wat hom skaam, voel minderwaardig of onwaardig. Hoe kan ons ons hoegenaamd skaam wanneer ons praat oor die Allerhoogste Soewerein van die heelal en die wonderlike voorsienings wat hy vir ons ewige geluk gemaak het? Dit is ondenkbaar dat ons minderwaardig of onwaardig sal voel wanneer ons ander van hierdie waarhede vertel. Ons moet eerder genoodsaak voel om ons uiterste bes te doen en ons oortuiging te openbaar dat ons ons “oor niks hoef te skaam nie”.—2 Tim. 2:15.

¹⁹ Die lig van waarheid wat nou in lande oor die hele aarde skyn, bied die hoop op die ewige lewe in ʼn paradysagtige nuwe wêreld. Laat ons toon dat ons die vermaning om ons lig voortdurend te laat skyn ter harte geneem het! As ons dit doen, sal ons rede hê om ons te verheug net soos die dissipels wat elke dag ‘sonder ophou voortgegaan het om te leer en die goeie nuus oor die Christus, Jesus, bekend te maakʼ.—Hand. 5:42.