Bou jou lewe om Jehovah se diens

¹ Jesus het sy gehoor met twee soorte bouers vergelyk. Die een het sy lewe op die rots van gehoorsaamheid aan Christus gebou en kon die storms van teenstand en verdrukking weerstaan. Die ander een het op die sand van selfsugtige ongehoorsaamheid gebou en kon nie onder druk staande bly nie (Matt. 7:24-27). Omdat ons in die voleinding van hierdie stelsel van dinge lewe, ondervind ons baie storms van teëspoed. Op die horison is die donker wolke van die groot verdrukking vinnig besig om saam te pak. Sal ons tot die einde toe volhard sonder dat ons geloof skipbreuk ly? (Matt. 24:3, 13, 21). Baie hang af van hoe ons nou ons lewe bou. Dit is dus dringend dat ons ons afvra: ‘Bou ek my Christelike lewe stewig om gehoorsame diens aan God?’

² Wat beteken dit om ons lewe om Jehovah se diens te bou? Dit beteken dat ons Jehovah die middelpunt van ons lewe moet maak. Dit behels dat die Koninkryk vir ons die hoofsaak word. Dit sluit gehoorsaamheid aan God in al ons daaglikse bedrywighede in. Dit vereis dat ons ons heelhartig toelê op ons persoonlike, gesins- en gemeentelike studie van die Bybel en op ons veldbediening en dít die voorkeur gee (Pred. 12:13; Matt. 6:33). So ’n weg van gehoorsaamheid het ’n rotsvaste geloof tot gevolg wat ondanks storms van teëspoed nie sal wankel nie.

³ Dit is ’n vreugde om te sien hoe miljoene mense hulle lewe en hulle toekomsverwagtinge rondom diens aan God bou, net soos Jesus gedoen het (Joh. 4:34). Hulle hou by ’n vaste rooster van teokratiese bedrywighede en geniet gevolglik ryk seëninge. Een moeder het verduidelik hoe sy en haar man hulle twee seuns met welslae grootgemaak het om Jehovah te dien: “Ons het ons lewe met die waarheid gevul—na al die byeenkomste toe gegaan, vir die vergaderinge voorberei en hulle bygewoon en velddiens ’n gereelde deel van ons lewe gemaak.” Haar man het bygevoeg: “Die waarheid is nie ’n deel van ons lewe nie, dit is ons lewe. Alle ander dinge draai daarom.” Kom Jehovah se diens ook eerste in julle gesin?

⁴ Stel ’n weeklikse rooster op wat prakties is: Jehovah se organisasie help ons om ’n goeie geestelike roetine te volg deur vyf vergaderinge per week te reël. Christene wat hulle lewe om die aanbidding van Jehovah bou, reël hulle sekulêre en gesinsake só dat hulle al hierdie belangrike vergaderinge kan bywoon. Hulle laat nie toe dat minder belangrike sake inbreuk maak op hulle gereelde bywoning nie.—Fil. 1:10; Heb. 10:25.

⁵ Ryp Christene besef dat dit net so belangrik is om ’n vaste rooster op te stel vir persoonlike en gesinstudie, wat voorbereiding vir die vergaderinge insluit, as om gereelde maaltye op vasgestelde tye elke dag te hê (Matt. 4:4). Kan jy ten minste 15 of 20 minute elke dag vir persoonlike studie opsy sit? Die sleutel is om nie toe te laat dat ander dinge inbreuk maak op die tyd wat jy vir studie opsy gesit het nie. Maak dit ’n nuttige gewoonte. Dit beteken dalk dat jy elke oggend vroeër moet opstaan as wat jy tans opstaan. Die 17 000 lede van die wêreldwye Bethelgesin staan vroeg in die oggend op om die dagteks te bespreek. As ons vroeg wil opstaan, moet ons natuurlik ’n redelike tyd in die aand gaan slaap sodat ons die volgende dag uitgerus kan begin.

⁶ As jy ’n gesinshoof is, moet jy die inisiatief neem om jou gesin se rooster vir teokratiese bedrywighede te beplan en te reël. Party gesinne lees die Bybel, die jaarboek of ander publikasies saam wanneer hulle ná aandete ontspan. Baie ouers wat gesien het hoe hulle kinders geestelike sterk Christene word, sê dat die gesinstradisie om elke week ’n geestelike aandjie saam te geniet een faktor was wat bygedra het tot hulle sukses. Een vader het gesê: “Ek dink dat die geestelike ontwikkeling van ons kinders grootliks toe te skryf is aan ons gereelde gesinstudie op ’n Woensdagaand wat ons sowat 30 jaar gelede begin het.” Al drie sy kinders is op ’n vroeë ouderdom gedoop, en later het al drie die voltydse bediening betree. Buiten die gesinstudie kan julle velddiensaanbiedings of vergaderingdele oefen en ander heilsame aktiwiteite saam geniet.

⁷ Het jy in jou weeklikse rooster ‘tyd uitgekoop’ vir die Koninkrykspredikingswerk? (Kol. 4:5). Die meeste van ons lei ’n besige lewe en het gesins- en gemeentelike verantwoordelikhede om na om te sien. As ons nie definitiewe reëlings tref om elke week aan die predikings- en onderrigtingswerk deel te neem nie, sal ander dinge baie maklik die plek van hierdie noodsaaklike bedrywigheid inneem. Die eienaar van ’n groot beesplaas het gesê: “Om en by 1944 het ek besef dat die enigste manier waarop ek velddiens gedoen sal kry, sal wees om ’n spesifieke dag daarvoor opsy te sit. Tot vandag toe neem ek nog steeds ’n dag gedurende die week af vir velddiens.” Een Christen- ouer man vind dat hy gemiddeld 15 uur per maand aan die bediening kan bestee omdat hy ’n vaste rooster vir getuieniswerk het. As hy enige sekulêre sake op ’n Saterdag moet doen, reël hy om dit ná velddiens in die oggend te doen. Kan jy en jou gesin ten minste een dag elke week vir velddiens opsy sit en dit ’n deel van julle geestelike lewenswyse maak?—Fil. 3:16.

⁸ Ondersoek jou lewensroetine: Daar is dinge wat ons pogings teëwerk om ons lewe om Jehovah se diens te bou. Onvoorsiene omstandighede kan ons goed beplande rooster vir studie, vergaderinge en velddiens omvergooi. En ons Teenstander, Satan, sal alles in sy vermoë doen om “ons weg [te] versper” en ons planne te dwarsboom (1 Tess. 2:18; Ef. 6:12, 13). Moenie toelaat dat hierdie struikelblokke jou ontmoedig sodat jy tou opgooi nie. Bring die nodige veranderinge aan sodat jy jou rooster van teokratiese bedrywighede kan uitvoer. Vasbeslotenheid en volharding is nodig om dít te doen wat werklik die moeite werd is.

⁹ Ons moet nie toelaat dat wêreldse invloede en die slegte neigings van ons onvolmaakte vlees veroorsaak dat bedrywighede wat nie van ’n geestelike aard is al hoe meer van ons tyd en aandag in beslag neem nie. Selfondersoek is nodig. Jy kan jou afvra: ‘Het my lewenswandel geleidelik ongebalanseerd, of as ’t ware uit fokus, begin word? Het ek my lewe begin bou om die dinge in hierdie wêreld wat sal verbygaan? (1 Joh. 2:15-17). Hoeveel tyd wy ek aan persoonlike strewes, plesierreise, sportaktiwiteite of ander vermaak—waaronder die tyd wat ek televisie kyk of deur die Internet blaai—in vergelyking met tyd wat ek aan geestelike bedrywighede bestee?’

¹⁰ Wat moet jy doen as jy agterkom dat jou lewe met al hoe meer onbelangrike bedrywighede gevul word? Net soos Paulus gebid het dat sy broers “reggehelp” word of “in lyn gebring word”, kan jy ook Jehovah vra om jou te help om weer sy diens die middelpunt van jou lewe te maak (2 Kor. 13:9, 11, voetnoot in naslaanuitgawe). Wees dan vasbeslote om by jou voorneme te bly en die nodige veranderinge aan te bring (1 Kor. 9:26, 27). Jehovah sal jou help om nie na regs of na links af te wyk van gehoorsame diens aan hom nie.—Vergelyk Jesaja 30:20, 21.

¹¹ Bly besig in God se vreugdevolle diens: Miljoene jaag geluk ten alle koste na en ontdek dan namate hulle die einde van hulle lewe nader dat die materiële dinge wat hulle so ywerig nagejaag het nie vir hulle blywende geluk gebring het nie. Dit was “’n gejaag na wind” (Pred. 2:11). Aan die ander kant, as ons Jehovah altyd die middelpunt van ons lewe maak en ‘hom altyddeur voor ons stel’, ervaar ons diep bevrediging (Ps. 16:8, 11). Dit is so omdat Jehovah die rede vir ons bestaan is (Op. 4:11). Sonder hom, die Grootse Voornemer, het die lewe geen sin nie. Diens aan Jehovah vul ons lewe met nuttige, sinvolle bedrywighede wat ons sowel as ander op ’n blywende manier, ja, ’n ewige manier, tot voordeel strek.

¹² Dit is belangrik om nie oorgerus te raak en ons gevoel van dringendheid aangaande die vinnig naderende einde van Satan se wêreld te verloor nie. Ons daaglikse lewe word beïnvloed deur ons beskouing van die toekoms. Die mense in Noag se dag, wat nie geglo het dat daar ’n aardwye vloed sou wees nie, “het geen ag daarop geslaan” nie en het persoonlike strewes—om te eet, te drink en te trou—die middelpunt van hulle lewe gemaak, totdat die vloed “hulle almal weggesleur het” (Matt. 24:37-39). Vandag sal diegene wat hierdie wêreld die middelpunt van hulle lewe maak hulle toekomsvooruitsigte voor hulle oë sien verbrokkel tydens die grootste vernietiging wat die mens nog beleef het, “die dag van Jehovah”.—2 Pet. 3:10-12.

¹³ Hou dus aan om jou lewe te bou om die lewende God, Jehovah, en die uitvoering van sy wil. Daar is geen belegging wat jy in hierdie wêreld kan maak wat so ’n betroubare Finansier soos Jehovah het nie. Hy kan nie lieg nie—hy sal sy beloftes nakom (Tit. 1:2). Hy kan nie sterf nie—niks wat ’n mens by Jehovah belê, sal jy verloor nie (Hab. 1:12, NW; 2 Tim. 1:12). Die lewe van gehoorsaamheid en geloof wat ons nou opbou, is net die begin van ’n lewe wat vir ewig sal duur in die vreugdevolle diens van ons gelukkige God!—1 Tim. 1:11; 6:19.

[Lokteks op bladsy 3]

“Die waarheid is nie ’n deel van ons lewe nie, dit is ons lewe. Alle ander dinge draai daarom.”